حيـاتـي💔(مكتملة)

الـحـلـقــة 39"قبل الاخيرة"

حياتي39

وصلنا لعمارة معلمة التطريز كان الجو حلو وأنا واعميمه طلعنا على رجلينا لأن سكنها ما كان بعيد واجد.

طبعاً دروج العمارة عندي معاهن موقف من زمان مع قيس لو تذكروه،، وشاء القدر أنه يصيرلي موقف أخره بس المره هذي مش مع قيس.

أثناء ونحنا نرقوا سمعت صوت يناديلي:-رجااااااء
أنا تلفتت جت عيني في عين الصابر زمطت ريقي وتنفست بصعوبه تلفتت لأعميمه لقيتها تبحت فينا هي ما تعرف الصابر بس ممكن فهمت الجو.

اعميمه:-رجو أنا توا نكمل طريقي،ما طوليش.
ومشت بـ خطوات بطيئة عارفتها قصقاصه زي سعاد.

الصابر:-شن اخبارك.
أنا نزلت عيوني:-بخير
الصابر:-ألف مبروك التخرج
أنا:-شكراً.....بارك فيك
الصابر:-جايبلك هدية بسيطه لو تقبليها مني....
وجاء يبي يقرب يعطيني كيس كان في يده.

أنا شيرتله بيدي:-لا ...... خليك مكانك.
الصابر تلفت وراه ورد بحت في كأنه ما توقع ردة فعلي:-كنك؟؟؟؟
ماتخافيش نعطيك هذي بس.

أنا:-لا ...... أسفه ما نقبلش في هدايا من غرباء.
الصابر ابتسم ابتسامه ألم وخيبة:-غريب!!!!!!!!!!!!!
أنا غريب يا رجاء!!!!!!!!!
بعد الحب هذا كله والصبر هذا نطلع غريب بالنسبه لكي!!!!!!!

أنا:-صبرك مش اكثر ولا اعمق من صبري........وصبري مستمر مش واقف عندك.
الصابر:-شن قصدك؟؟؟؟
ما فهمت؟؟؟؟؟؟؟؟؟
على فكرة صدمتيني والله.......

ولمحت دمعه من عينه فوراً وراها و حاول يتماسك:-ما كنت......أبداً ما توقعت تكون ردة فعلك هكي.........
قاسيه وجافه وغليظه وجارحه.
معقوله مش حاسه بلهفه زي اللهفه يلي حاس بيها أنا.

أنا:-اسمعني أنا أسفه لو كنت السبب في صبرك أو ضياع وقتك.
أنا حبيتك من قبل ما كذبت عليك بس النصيب غلبنا وأنت عارف الأسباب كويس.
واعتقد أني ما غلطت معاك.

الصابر:-عاااااااااااااارف
ومسك اعصابه:-بس...بس أنا نبي .... نبيك نبي نرد علاقتنا نبي نصلح كل شئ.
أنا نحبك وأنتي تحبيني ليش تحرمينا من بعضنا.
مستعد نحارب الدنيا بش نأخذك والله والله ايش ما تطلبي حاضر.

أنا:-الصابر.......اسمعني الحب يلي بينا انتهى وانتهى بجرح كبير وعميق منك.
أنت ما قصرت في حقي يوم أنا نعترف......وأنا حبيتك في ما مضى من قلبي وتمنيتك وبكيت عليك و سهرت الليالي أخره.........بس يلي درته أنت شئ صعب ينتسا.

الصابر:-بس.....ما تقعدي بالسواد هذا أختك تزوجت وربي يسعدها خلاص هذا كلام قديم.

أنا:-قديم عندك أنت.....لأن ما آثر فيك ولا جرح كرامتك ولا هز ثقتك في نفسك ولا خلا سمعتك في التراب.
بس مش قديم عليا و على عائلتي.
صعب تتقبلك العائله وصعب نتقبلك حتى أنا.
وصراحه أنا مش مستعده نخسر ولا حد من عائلتي.