ابتسامة حزن

ابتسامة حزن/الحلقة"14"

جيت نبي نصبي..شوي كلمني أحمد.

احمد:استني تعالي قعمزي في موضوع ضروري تعرفنه.
انا:حاضر.
وقعمزت جنب ماما.
ماما:ان شاءالله خير بس.
أحمد:لا خير خير.
إيناس:باهي احكي رقدت عظامنا.
أحمد:عطيت قرار للعرب...قتلهم موافقين.
انا:كييف¿¿لالالا.
إيناس:تي كيف تأخذ قرار زي هذا بلا ما تسألها.
أحمد:بعد الي داراته تبيني نسألها...تي خليني نسقدها بدري قبل ما تدير حاجه توطيلي راسي.
إيناس:هي غلطه صغيره...تبي تخربلها حياتها عشان موضوع بسيط.
أحمد:خلاص انا حكيت للعرب...نظمي امورك انتي.
وطلع.
انا:تي كيف تبوني نتجوز واحد ما نعرفش.
ماما:الراجل محترم و ولد ناس..وبشغله و عنده حوش شن تبي بعد هذا كله...ولا تبي تديريلي حركات بنات تو نبيه ويبيني لالا ما عندش بنت تديرلي هكي.
انا:"صبيت خشيت للدار وسكرت علي روحي".
إيناس:ياماما مش هكي تخربولها حياتها مازالت صغيره والفرص تو يجنها.
ماما:كلمة احمد صاح...الي دارت هكي توا تدير اكبر منها قدام.
إيناس:لعند امتى تبي تقعدي تصبي مع عيالك...راه حتى نحن بناتك..مافش فرق.
وصبت خشت عليا في الدار.

انا:شن تبي.
إيناس:ما نبي شي بس نبي نكسد معاك.
انا:ما عندش جو خطيني.
إيناس:انتي قلتي معش نبيه معتز.
انا:وانتي قلتي معش نبيه منذر.
إيناس:"تغير وجهها"
انا:أسفه.
إيناس:كلامك صح نحن مشكلتنا نحبو بلا تفكير...بس انا توا معش نحب منذر...منتصر عوضني ع كل لحظه حلوه عشتها مع منذر.
انا:هههههه.
إيناس:ليش تضحكي.
انا:لا شي بس خطرتلي حاجه.
إيناس:عطيه فرصه بلكي يعوضك...خوذي نصيحتي.
انا:تمام.

كلام إيناس كان صح...لان انا لازم ننسى معتز بأي طريقه...بس مش نتزوج واحد ما نعرفش صعبه هذي.

___________

ومشى الوقت وجا يوم فرح إيناس...مشت للمزين...وكانت خايفه ومرتبكه...وطبعاً انا مشيت معاها.

ونحن في المزين...في وحده سكنتلي...شكلها تعرف ماما وبابا.

المرا:انتي بنت فاطمه.
انا:اها.
المرا:كيف حالها امك.
انا:تمام الحمد لله.
المرا:وباتك كيف حاله..قالولي مسافر.
انا:الله يسلمك الحمدلله...اها مسافر.
المرا:من هي الي خطبها.
انا:نعم..ع من تحكي.
المرا:باتك.
انا:ما خطبش حد...وممكن تخليك في حياتك...بلا قصقصه ودكت خشم...شن عندك عنده بابا جايه تسألي.
المرا:بشوي هو سؤال عليك قلة ادب وذوق.
انا:خليك في حالك ما تخلينش نحط دره كبدي فيك.

كملت الكوفيرا لإيناس...وطلعت تجنن الصراحه...وبدت فيا انا..وبعدها جا احمد شالنا للصاله.

أول ما خشت إيناس...شغلولها اسماء الله الحسنى...وبدن الزغاريط في الصالع كلها والجو كان يجنن.

مشيت معاها وصلتها للمسرح...وقعمزتها وقعدت واقفه جنبها لان كانت مرتبكه بكل.

لاحظت ان بسمه بنت عمتي خديجه مقعمزه مع هل العريس لا و دايره صداقات اخرى.