ابتسامة حزن

ابتسامة حزن/الحلقة"28"

اماني:تي وين نلقاه ما خلتش مكان ما دورت فيه..اووف...اها توا عرفت وين نلقاه.

قربت بشويش من سراج ومدت يدها تحت مخدته.

اماني:وأخيراً لقيته
سراج:"مسك يدها وشدها...طاحت عليه" مستنيك من بدري.
اماني:هيييي...حول نبي نطلع اطلق يدي...تو يشوفنا حد يفهمنا غلط
سراج:والله انتي الي جيتيني ولالا...حتى كان خطرتلي حاجه...مش غلطتي محد قالك خشي لداري.
اماني:"عضت يده"تي اطلق يا صايع.
سراج:ااخخخخ ياعن$*#&...تي انتي بنت ولا فار.
اماني:هاهاها خفيف ظل المهم فوني خذيته.."تفتح في الباب تبي تطلع".
سراج:"صبا بسرعه حط يديه ع الباب...ودفها عليه" عليا انا الحركات هذينا.
اماني:سراج حول راه خيرلك.
سراج:خفت..."قرب منها واااجد وجهه مقابل وجهها"
اماني:سس سراج ما تغلطش...حول راه نعيط.
سراج:هههههههه يا خوافه معقولة انا متخلف نبحت في فار زيك...والفون خوذيه خلاص الي لازمتني خذيتها.
اماني:"فرحت انه عطاها الفون وأخيراً"

طلعت من الدار ما لقتش إسراء رقت فوق بروحها...

انا:ها شن صار..
اماني:عطاني الفون.
سجود:وأخيراً.

وقعدنا نهدرزو شوي وجتني اماني راقيلها.

انا:كنك شن صار اخرى.
اماني:الحقير عطاني الفون بلا الشفره.
انا:ههههه مضحكه تستاهلي.
اماني:والله نوريه.
سهى:اماني شن رايك تباتي اليوم..
اماني:ماهو القصه في إبراهيم مسكين ما تريحش في حوشه...
سجود:باتي معانا.
اماني:لالالا ما نقدرش...ماما كان تعرف تديرلي قصه.
انا:تو نقوللها بايته عندي.
اماني:باه تمام.

واقنعت ماما تخلي اماني.

وروحو كلهم واماني نزلت لوطه مع البنات.

_________

ايمان:حبيبي امتى تبي تحكي مع بابا.
معتز:قريب ان شاء الله.
إيمان:لك سنتين وانت تقولي قريب.
معتز:حبيبي انا مازلت ما كونت روحي...حوشي مش كامل...وحتى ما عندش راتب مازلت ما كملت جامعه.
إيمان:باهي ع الاقل احكي مع بابا وبعدين ساهل نستناك.
معتز:ان شاء الله خير.

________

منيه:يا هلا شن جوك جمال.
جمال:تمام شن جوك انتي.
منيه:تمام الحمد لله....شن تدير هنا صقع.
جمال:انتي الي شن تديري في الجنان...مش قاعده في حوشكم راه في شباب في الحوش.
منيه:تغار عليا.
جمال:ترا خشي جوا مش ناقص نفسيات.
منيه:جمال انت مش فاهمني معقوله.
جمال:يا بنت الناس خطيني والله ماني فاهم حتى روحي عشان نفهمك.
منيه:جمال انا انحبك.
جمال بصوت عالي:تي تعرفي تقلبي وجهك جوا...
منيه:لا ما نعرفش...نبي ناخذ منك قرار توا تحبني ولالا.
جمال:ياعنجد صحة الوجه الي عندك...يا فرخه خطيني...ما عندش خلوق للحب والكلام الفاضي هذا.
منيه:شكلك مجروح بس عادي انا ندوايك.
جمال:منيه اقلبي وجهك ما تخلينش نرتكب جريمه.
مراد:شن في.
منيه:اا جمال كلمني قال نبيك ضروري شوي جيته.
مراد خو منيه:"بحت في جمال بنظره تخوف" عارف الساعه كم توا يا باشا.
جمال ببرود:"بحت في ساعته"الساعه 1:46.
مراد:"انفصل وقرب من جمال ع اساس يبي يضرب".
جمال:"يدخن ويحرقله في دمه ببروده" نعم يا بابا في شي.
مراد:"مد يده يبي يضرب جمال بوكس بس جمال فصعها له"
جمال:"عزق الدخان" مره ثانيه افهم المواضيع صح وبعدين تصرف..توا مشيتها المرا الجايه بتنكسر يدك.."ودفه بالقوه لين طاح".
مراد:لا فاهم صاح.
جمال:خوذ اختك وربيها وبعدين تعال كلمني.
منيه:مراد خلاص...الموضوع مش مستاهل.
مراد:اقلبي خلقتك جوا.
منيه بصوت عالي:مش خاشه.
مراد:تعلي في صوتك عليا.."وانفصل عليها".
وجمال بكل برود ولع دخانه وطلع وسيبهم.

__________

أحمد:بكره العمال جايين.
ماما:خليهم يجو لكن قول لباتك يديرلها دروج بره ما تخشش عليا.
أحمد:حاضر غير رطبي الامور انتي ما تقعدش فاصله.
ماما:لا مش فاصله...خليه يعيش حياته مش شوري بيه.
أحمد:باه..

________

إبراهيم:حبيبي شن رايك بكره نمشو ♥للبحر♥
انا:وشن خطره توا.
إبراهيم:ههههه...بس هكي قلت نديرو جو لاماني ونطلعو كلنا مع بعضنا.
انا:فكره حلوه...لان اماني تموت في البحر.
إبراهيم:تمام.."وطلع الدخان يبي يولعه"
انا:إبراهيم اطلع بره.
إبراهيم:هههههه عجبتني اطلع بره...ولا ترديلي في الموقف الي درته لك في المدرسة.
انا:ههههه تعرف نسيته انا اصلا.
إبراهيم:تي تعالي باللهي...معش حصلتك من هلك.
انا:ههههه إبراهيم في واحد معانا.
إبراهيم:مش براني ههه.

________

اماني:نبي نمشي نشرب ميه تو نجي.
إسراء:خوذي راحتك حبي.

وطبعاً البنات كانن يشلطن كلهن الا اماني المسكينه اكيد رايفت علي حبيبها هههه

مشت اماني للمطبخ شربت ميه وتسمع في صوت في الجنان...بحتت من روشن المطبخ لقاته زياد يحكي مع حبيبته...

وقعدت تسمع عجبها الحوار.

شوي وجتها خبطه على ضهرها.

اماني:اهااا يا حماار.
سراج:اسلوبك يا فارا.
اماني:بارد...مكسورتك معش تمدها فاهم.
سراج:وانتي معش تمدي وذنك عند الناس قصقصه.
اماني:مش شورك انت داك خشمك.
سراج:يا فرخه ما تستفزينش.
اماني:حول من قدام وجهي...نبي نخش نرقد.
سراج:خشي مرقد جدي.
اماني:ههههه اجمعين.
سراج:ام السانين.
اماني:"عطاته نظرة استكراد وخشت"

_________

ثاني يوم مشينا للبحر كلنا معانا علي وافنان.....واماني انسجمت اخر انسجام.

إبراهيم:تعالي خشي معاي للبحر.
انا:لالا ما نعرفش.
إبراهيم:انا معاك بلا خوف.
انا:إبراهيم ما نبش توا عدي انت بعدين تو نجيك انا.
إبراهيم:باه براحتك.

خشن البنات ودارن جو سمح وانا نتفرح عليهن من بعيد...وحتى الشباب خشو مع بعضهم...وعلي وافنان يتمشو ع الشط

وعلي المغرب ردينا للشاليه و بدو الشباب يشوو...وانا خشيت جوا لان ما تحملتش ريحة الشوايات كبدي وجعتني طول.

درنا السلطات ووتينا كل حاجه...وطبعاً انا ما كلتش معاهم.

خشيت جوا حسيت روحي تعبانه بكل خشيت للدار الي فيها دبشي انا وابراهيم اتكيت وغفيت...نضت لقيت الوقت متأخر...وما لقيتش إبراهيم.

انا:اكيد قاعد على الشط...

طلعت نبي نشوفه..

و...

#يتبع