ابتسامة حزن

ابتسامة حزن/الحلقة"40"

اماني:"التفتت لقتني وراها"...ليش تلحقي فيا.
انا:مع من تحكي قوليلي اختك انا.
اماني:سراج.
انا:في حاجه بينكم.
اماني:لالا مافي شي.
انا:وليش تحكو بعد مافيش شي زي ما قلتي.
اماني:امل مش ناقصتك راه.
انا:اماني بعد يصير معاك حاجه زي هكي احكيلي بيش نقدر نساعدك...ما تخبش عليا انا اختك معقوله بنضرك.
اماني: انا مانحبش...بس هو قالي يحبني.
انا:بس باين في عيونك.
اماني:شن الي باين.
انا:تحبيه.
اماني:لالا مافيش منه الكلام هذا.
انا:اماني تحسابيها ماشيه عليا واضح في عيونك.
اماني:امل خطيني مش ناقصه تحقيقاتك.

أميرة:اامل...تعالي شوفي جمال يبكي.
انا:جايه.."ومشيت"

اماني:"بحتت في فونها لقت سراج مازال ع الخط" هيييي ليش ما سكرت.
سراج:صار باين في عيونك.
اماني:بلا براده.
سراج:ههه..شكلك ما شفتش الهديه.
اماني:اها امس روحت تعبانه وما شفتهش.
سراج:اها.اكرم قاعد.
اماني:لالا عليش تسأل.
سراج:سؤال عادي.
اماني:باهي سد فضايح اليوم.
سراج:ههههه باه سلام معناتا.
اماني:سلام.

سكرت وقعمزت في الدار وقعدت تبحت في فون سراج وتتفرج علي الصور.

________

احمد:ليش ما تردي.
هديل:احمد فوتني خلاص.
احمد:تي كيف نفوتك....فهميني شن صار باهي.
هديل:انت عارف الشاب يلي ضربته من.
أحمد:لا ما نعرفش...بس هذي اخرت الي يغلط.
هديل:هذا ولد خالي.
أحمد:وهو مهم عندك للدرجه هذي...تبي تنهي علاقتنا عشانه.
هديل:...
أحمد:نحكي معاك انا ردي.
هديل:"ساكته ما تبش تحكي"
أحمد:ماشي تمام خلي ولد خالك ينفعك...شوفي نصيبك يا ابله.
هديل:اا.
أحمد:"سكر في وجهها".

_________

خشيت للمطبخ ندير في العشاء...وخليت جمال مع أميرة.

اماني:"صبت تشوف في الهديه"
اميرة:شن هذي.
اماني:وطي صوتك ما نبش امل تسمع.
اميرة:ما تقوليش البارد هذا جايبلك هديه.
اماني:ما تقوليش بارد.
اميرة:ماشاء الله عليك طحتي بسرعه.
اماني:ما طحتش بس هو مش بارد.

وطلعت الهديه.

اماني:هييي..فون..يجنن نفس فون اكرم...خاطري فيه من زماان.
أميرة:عطيني نشوفه.
اماني:"عطاته لها"
اميره:اماني مفروض تحكي لأمل.
اماني:عارفه بس..مش عارفه كيف نقوللها.
اميرة:حاولي فرصتك اليوم احكيلها.
اماني:قولك هكي.
أميرة:اها.

_________

تعشينا وبرمت علي المطبخ....وخشيت رقدت جمال...وقعدت مكسده مع البنات...حسيت في عيونهن حاجات واااجد مخبياتهن عليا...بس ما بتش نسألهن...وخليتهن ع راحتهن امتى ما يبن يحكن يحكن.

شوي رن فوني.

انا:الو.
إبراهيم:شن جوك يا عمري.
انا:الحمد لله.
إبراهيم:جمال واعي ولا.
انا:لالا رقدته من بدري.
إبراهيم:شن نجيبلك معايا.
انا:كيف¿¿
إبراهيم:ما تبش تباتي.
انا:قصدك مش جاي.
إبراهيم:لا جاي بس نحسابك بايته قلت نجيبلك دبش لك ولجمال.
انا:اها باهي خلاص جيب لجمال بس انا نلبس من اماني.
إبراهيم:تمام...بس نديرلك رنه اطلعيلي انتي باهي.
انا:حاضر.

وسكرت وقعدت شوي وجاء إبراهيم...ولطعتله.

انا:يا هلا.
إبراهيم:اهلين..."وخش ورد الباب عشان ما نبانش على الشارع".
انا:"خذيت منه شنطة جمال وكان جايب معاه حاجات للفطور وقطن لجمال"مشيت شفت بابا
إبراهيم:اها..بس احمد وين ما شفتش غادي.
انا:احمد من اول ما طلع ما جش للحوش ما شافه حد.
إبراهيم:رنيت عليه لقيته مقفل.
انا:مش عارفه ممكن عنده شفره ثانيه.
إبراهيم:ممكن...خلاص توا خشي.
انا:حاضر.
إبراهيم:ردي بالك من روحك"وباسني وطلع"

سكرت الباب وراه وخشيت.

_______

هدرزت مع البنات شوي ورقدت...واماني رقدت واميرة طلعت للجنان...

اميرة:"قعمزت في الجنان وركبت السماعات وعلت الصوت ع الأخير وتمت تبكي"

بس شن في وليش اميرة تبكي...في شي في قلبها متعبها يمكن حتى هي مش فاهمه ليش..

رن فونها سكرت كم مرة وبعد سكن قفلت الفون بكل.

________

ثاني يوم...نضت علي صوت بكاء جمال.

دوشتله...ودوشت حتى انا...ومشيت فطرت.

والبنات مازالن راقدات.

خشيت علي ماما شلتلها الفطور..

انا:كيف حالك.
ماما:الحمدلله.
انا:ماما وجهك اصفر بكل...تحسي في حاجه.
ماما:لالا ما نحس في شي...غير منشغله علي باتك.
انا:ما تخافيش إبراهيم قالي كويس.
ماما:جاء إبراهيم امس.
انا:اها جاء في الليل جايب دبش لجمال.
ماما:اها..وكيف حاله...امولي متريحه انتي.
انا:الحمدلله إبراهيم مش مقصر معايا ومقدرني.
ماما:الحمد لله طمنتيني وانا نقول ظلمت بنيتي.
انا:انتي ما درتش هكي إلا عشاني وانا اليوم فرحانه لاني سمعت كلامكم.
ماما:ان شاء الله ديما فرحانه...عطيني جمال نمسكه لك وعدي وعي خواتك.
انا:حاضر.

عطيتها جمال ومشيت وعيت البنات.

وبرمت علي الحوش وبديت في الغداء.
_______

في المستشفى كانو اكرم وأيمن قاعدين مع بابا...وفجأة بابا تعب.

اكرم:اايمن اجري كلم الدكتور ولا الممرضه...بسرعه.
ايمن:هيا حاضر.

وطلع ايمن بسرعه كلم الدكتور وجاء.

اكرم:شوفه كان يحكي معايا توا...وتعب فجأة.
الدكتور:ماشي ممكن تطلعو.
اكرم:لا منش طالع باتي هذا.
ايمن:اكرم اطلع خلاص فكنا من المشاكل.

طلعو اكرم وايمن وقعدو يستنو في الدكتور...

شوي وطلع الدكتور.

أكرم:ها يا دكتور..كيف وضعه توا.
الدكتور:.....

# يتبع.

معلش اسمحولي اليوم نزلت حلقتين...بس من يوم الاحد رح نبدأ ننزل كيف قبل يعني...احد وثلاث وخميس وجمعه.

ما تنسوش
==> التصويت☆

==>والتعليق 💬