ابتسامة حزن

ابتسامة حزن/الحلقة"38"

إبراهيم:"انصدم لما شافه ماسك يدها ويحكي معاها...وبصوت عالي"سراااج.
سراج:"طلق يد اماني"خشي جوا بسرعه.
اماني: اا.
سراج:خشي قلت بسرعه..." وبحت في إبراهيم" نعم شن في.
إبراهيم: تستعبط عليا انت.
سراج:لا كنك منفصل.
إبراهيم:"قرب من سراج وضربه كف" عارف هذي اخر مره نشوفك مقرب منها...تغفل فيا انا خوك معقوله.
سراج:"انصدم من ردة فعل إبراهيم" إبراهيم انا انحبها البنت..
إبراهيم:تحبها امشيلها من الباب الجو هذا فكني منه..اقسم بالله نشوفك قربت ولا جيت شور المكان الي هيا فيه ما تشوف مني خير.
سراج:باه اوكي تم.
إبراهيم:"خش للمطبخ وخلا سراج بروحه في الجنان".

_________

في الليل...

ماما:موني رني علي اكرم قوليله يجي يشيلكن..انا بايته مع اختك.
انا:خليهن حتى هن.
ماما:لا عيب يباتن عند العرب.
اماني:حاضر ياماما.

صبت اماني خذت فون اميرة رنت علي اكرم او وتن رواحهن.

وطلعن ومعاهن نجاة..

وهنا طالعات شافن سراج في الجنان.

اماني:هييي نسيت فوني..تو نلحقكن امشن انتن.
اميرة:باهي بسرعه بس.
اماني:باه."ودارت روحها خاشه جوا لحد ما شافت نجاة طلعت وبعدين مشت لسراج"
سراج:مش بايته.
أماني:لالا ماما بايته اليوم..وضروري نروح انا لان اميرة ما تعرفش شي في المطبخ.
سراج:اها..امتى بتجي.
اماني:مش عارفه...شن قالك إبراهيم...تعاركتو بسببي صح.
سراج:فداك يا عمري..
اماني:"تحشمت ونزلت راسها"
سراج:بيناتنا فون باهي.
اماني:علي حسب الجو.
سراج:هههه باهي امشي توا راه يشوفنا اكرم المرة هذي.
اماني:ههه ماشي سلام.
سراج:سلام.

طلعت ركبت في السياره.

أكرم:وين كنتي هذا كله.
اماني:نسيت فوني.
اكرم:اها..خطرها علي فونك ترا عطيه ليا شوي.
اماني:"خافت وما عرفتش شن تقول لاكرم"مافيهش شحن طافي.
اكرم:اها باه.

________

وطبعاً في الليل رقدت وما حستش بشي بكل وماما المسكينه قعدت تعاني في جمال.

وبعد اسبوع درنا اللمه في الصاله.

وجو المعازيم..والصاله تعبت.

جتني إيناس فوق قعدت معايا وتلعب في جمال...انقهرت لما شفتها تلعب فيه كان خاطرها في بيبي تلعبه ويقوللها ماما بس هذا حظها الله غالب.

انا:شن جو منتصر.
إيناس:تمام الحمد لله.
انا:مشى للدكتور.
إيناس:"ابتسمت" انا حامل توا.
انا:والله.
إيناس:هههه والله.
انا:ماشاء الله ربي يتمم عليك.
إيناس:ان شاء الله...بس ما تقولش لحد لأن منتصر قالي ما تحكش توا..
انا:حاضر.

_______

اماني:الو.
سراج:تعالي من عند المطبخ.
اماني:كنك شن تبي.
سراج:نبي نشوفك.
اماني:سراج انت بعقلك ولا فاقد.
سراج:عقلي معاك.
اماني:تي مش وقت سماطه.
سراج:تبي تجي ولا نخشلك جوا.
اماني:باه جايه هي.
سراج:نرجى فيك.

طلعت اماني...من عند المطبخ لقاته يستنى فيها.

سراج:"اول ما شافها قرب منها وحضنها"
اماني:سراج افطن لروحك كنك انت.
سراج:ليا اسبوع ما شفتك مرايف عليك.
اماني:باهي خلاص حول تو يشوفنا حد.
سراج:خلي الي يشوف يشوف مش شوري انا.
اماني:سراج بلا براده راه معش تشوف وجهي مره ثانيه.
سراج:اووف باه...امسكي جايبلك هدية"ومدلها كيس صغير"
اماني:بمناسبة شن.
سراج:مش شرط يكون في مناسبه.
اماني:لا ما نبيهش.
سراج:خوذيها وخشي جوا ما نبش نقاش.
اماني:باه"خذت منه الكيس وخشت بسرعه".

ماما:وين كنتي.
اماني:في الحمام.
ماما:الحمام مش من هنا.
اماني:لخبطت.
ماما:اها فكيني منهن لخبيطاتك هذين نعرفهن انا.
اماني:حاضر..."ومشت من تلا ماما عشان معش تسألها"

______

واول ما روحت رقيت فوق لشقتي.

إبراهيم:نورتي شقتك.
انا:تسلم يا عمري.
إبراهيم:عطيني جمال نلعب عليه.
انا:مش لعبه هوا.
إبراهيم:هههه باه عطيني.
انا:"عطيته جمال وخشيت نغير"

وطلعت لقيت جمال يبكي...و إبراهيم يتفرج ع الTv...

انا بصوت عالي:إبراهيم
إبراهيم:كنك فجعتيني.
انا:معقوله تخليه يبكي هكي قريب يموت مسكين.
إبراهيم:سكته مبش يسكت جو الدلع هذا ما يديرش ليا انا.
انا:إبراهيم مازال صغير حرام عليك."خذيت جمال وخشيت بيه للدار وسكرت الباب"

شوي وجاني إبراهيم

إبراهيم:زعلان مني السمح.
انا:"ما بتش نحكي معاه"
إبراهيم:تي عشان الفرخ هذا زعلانه.
انا:ولدك الفرخ.
إبراهيم:تي نبصر معاك..
انا:لالا ما تبصرش...خطاني.
إبراهيم:تي ولدي راه.
انا:عارفته ولدك...كان خليته يوم كامل معاك...راه توا ميت مسكين.
إبراهيم:ههه بعيد السو.
انا:....
إبراهيم:خلاص اسف حبيبي.
انا:معش تعاودها
إبراهيم:حاضر.

حطيت جمال في سريره وجا إبراهيم اتكى جنبي علي السرير واتكيت علي صدره..

انا:إبراهيم.
إبراهيم:عيونه.
انا:دخن.
إبراهيم:كييف¿
انا:دخن نحب ريحة الدخان على صدرك.
إبراهيم:مش كنتي تقولي ما تدخنش معش فهمتلك راي.
انا:كنت نتوحم وقتها.
إبراهيم:اها"وولع دخان وقعد يدخن"

______

طول الليل وإبراهيم مسكين ما رقدش من بكاء جمال...قهرة شوي طلع رقد في الصاله.

وقعدت نعاني بروحي..

ثاني يوم نضت راسي يبي يطربق...دوشت وبرمت علي الحوش...وبديت ندير في الغداء...وجمال مازال راقد.

شوي سمعت صوت فوني يرن.

مشيت نشوف فيه لقيته إيناس.

انا:الو.
إيناس:هلا امولي شن جوك.
انا:تمام الحمد لله...كنه صوتك تبكي انتي.
إيناس:لالا.
انا:ايناس ما تضحكش عليا قاعده تبكي انتي...كنك شن في.
ايناس:....

#يتبع