ابتسامة حزن

ابتسامة حزن/الحلقة"34"

علي العصر كنا مكسدات ودايرات قهوة...شوي سمعت صوت الباب.

اميره:تو نصبي انا.

صبت اميره فتحت الباب.

ماما:يا هلا..نور الحوش.
عمتي:منور بهله...كيف حالك.
ماما:الله يسلمك الحمد لله...كيف حالك انتي.
عمتي:الحمد لله.

وخشن عمتي والبنات سلمن...وانقلب الحوش هداريز وجو.

وانا قعمزت نهدرز مع عمتي وماما.

شوي جتني سهى.

سهى:صبي قاعدتلي مع العزايز...تعالي نبيك.
انا:كنك شن في.
سهى:صبي بس  نبي نحكي معاك.
انا:"عرفت ان الموضوع شوري انا و إبراهيم....صبيت طلعت معاها"

طلعنا قعدنا في الجنان.

سهى:امل احكيلي شن الي صار.
انا:في شن.
سهى:شن صار بينك وبين إبراهيم.
انا:مافي شي غير مرضت شوي...وقتله نبي نقعد عند ماما.
سهى:لالا..انتم متزاعلين...امل احكي ولا والله معاد نحكي معاك.
انا:اها صح.
سهى:شن السبب.
انا:........
سهى:هيييي الحقره هذي ما تحشم علي وجهها.
انا:سهى ما تحكش لحد الله يربحك ما نبش نخرب بيتها حرام.
سهى:انتي غبيه كان تخليها بتخرب بيتك انتي.
انا:مش مهم....المهم انتي ما تحكش لحد.
سهى:باه...لكن ضروري تعرفي إبراهيم مش شوره هيا الي تضايق فيه حتى من قبل دارتها له كم مره.
انا:اها...حتى هو قالها ليا.
سهى:باهي خلاص بعد عارفه انه مش غلطان روحي لحوشك.
انا:تو نروح...لكن الفتره هذي تعبانه...نبي نقعد مع ماما.
سهى: باه براحتك.

_______

افنان:مش قاعدين.
اسراء:انا بس قاعده.
افنان:وينهم.
إسراء:عند هل امل..
افنان:كنها حرجانه.
إسراء:لالا عليش تبي تحرج...مكسده عند هلها بس.
افنان:اها.

وقعدت افنان مع إسراء شوي...وبعد خشت اسراء للحمام...طلعت افنان ورقت فوق لشقتي.

ومن حظها لقت الباب مفتوح نساه إبراهيم.

خشت للشقه لقاته متكي في الدار.

افنان:السلام عليكم.
إبراهيم:شن جابك هنا.
افنان:رايفت عليك.
إبراهيم:اطلعي برا..
افنان:إبراهيم انا انحبك وانت تحبني ليش نخبو علي بعضنا.
إبراهيم:"معش عرف شن يقوللها"
افنان:حبيبي مازال في فرصه...انت طلق امل وعلي يطلقني.
إبراهيم:"ضربها كف" تعرفي تقلبي وجهك خير ما نكسرك...يحسبوك عليا وليه بعدها.
افنان:تضربني عشان بنت الشوارع هذي.
إبراهيم:بنت الشوارع هذي اشرف منك...اقلبي وجهك برا."ودفها شوي جت بطنها علي حافة الطاوله"..
افنان:اهااا....

وتمت تعيط.

إبراهيم:"انصدم من الموقف يلي حط فيه روحه" انتي حامل.
افنان:"تبكي بصوت عالي".
علي:شن في...انتي شن تديري هنا.
إبراهيم:"يبحت في افنان ومستك كيف قتل ولد خوه"
علي:"شد افنان شوره"ياعمري شن صار.
افنان:البيبي...البيبي ياعلي.
علي:"بحت في إبراهيم وبعدها طبس علي افنان رفعها وشالها للمستشفى".

__________

عمتي:روحي معانا اليوم خلاص سدك عاد.
انا:"ما عرفتش شن نقوللها بحتت في ماما فنصت فيا" اا حاضر.

ومشيت وتيت روحي وطلعت روحت معاهم.

رقيت علي الدورج لقيت باب الشقه مفتوح خشيت لقيت إبراهيم قاعد في الصالة وحالته حاله.

انا:إبراهيم كنه وجهك هكي شن في.
إبراهيم:"بحت فيا وصبى بسرعه وحضنني"
انا:حبيبي شن في...شن صار.
إبراهيم:ما كنش قصدي.
انا:شن الي ما كنش قصدك.
إبراهيم:افنان في المستشفى..
انا:كيف...كنها شن صارلها.
إبراهيم:مني انا...
انا:إبراهيم ركز في كلامك واحكي.
إبراهيم:.......
انا:هييي شن درت انت.
إبراهيم:قتلك ما كنش قصدي.
انا:باهي اهدى خلاص ان شاء الله خير...وسع بالك.

_______

بعد كم شهر وقرب من موعدي خلاص...نزلت كسدت مع البنات...وقعدنا نهدرزو.

شوي جو علي وافنان خشت تطنش سلمت علي البنات وتجلبتني انا...طبعاً لان البيبي نزل بسبب إبراهيم...بس تستاهل هيا الي جابتها لروحها.

بس انا ما بتش نعبرها...وعلي كذلك خش يطنش.

شوي وسمعت إبراهيم ينادي.

إبراهيم:امل..ااامل.

طلعته بسرعه.

انا:نعم.
إبراهيم:هيا ارقي ما تقعدش هنا مش متطمن عليك.
انا:عليش كنك.
إبراهيم:قتلك ارقي خلاص.

رقيت فوق...مع إبراهيم...

وشوي وطلع هوا وخلاني بروحي نتفرج علي الTv

شوي سمعت فوني يرن

انا:ايوه
ايناس:شن جوك امولي.
انا:تمام الحمد لله...شن جوك انتي.
إيناس:الحمد لله...قتلك بكرة نبو نمشو لعيت جدي..تمشي معانا
انا:مش عارفه انشوف إبراهيم قبل.
إيناس:يا مؤدبه...باهي شوفيه وقوليلي.
انا:حاضر.
إيناس:ماشي سلام.
انا:سلام.
_________

ثاني يوم مشيت لعيت جدي شالني إبراهيم وتلاقيت مع هلي غادي..

هدرزنا ودرنا جو حلو...وطبعاً حوش جدي من حادث جمال معش مشيتله.

سناء:امل.
انا:نعم.
سناء:تعالي نبي نهدرز معاك شوي.
انا:"مشيت قعمزت تلاها".
سناء:معلش سامحيني علي الموقف الي درته بس لاني كنت متأثرة علي جمال.
انا:عادي حبي مش مشكله.
سناء:رايفت عليك يا حاله.
انا:ههه وانا اكثر يا قلبي.
سناء:"بحتت في بطني لقتها كبيره"بنت ولا عيل.
انا:مش عارفه...إبراهيم قالي خليه مفاجأة.
سناء:وكيف درتو في الدبش.
انا:شرينا الوان مشتركه.
سناء:اها..فكره والله.
انا:ههه...خطرها جمال وينه مختفي ما شفتش بعد جيت.
سناء:جمال سافر.
انا:فترة راحه ولا.
سناء:لالا قالي اقامه...وحثل عمل غادي وجوا تمام
انا:"انصدمت من كلامها"اها..باهي ربي يوفقه.

وفي للليل رن عليا إبراهيم قالي اطلعي قاعد برا.

طلعت...وفي طريقي.

#يتبع