ابتسامة حزن

ابتسامة حزن/الحلقة"23"

إبراهيم:"بحت فيا باستغراب"شوي يا احمد خمس دقايق بس."وصبا تباعد شوي من حذا احمد"امل تعالي شوي.
انا:نعم.
إبراهيم:وين ان شاء الله.
انا:لحوش جدي.
إبراهيم:حوش جدك.
انا:اها.
إبراهيم:من شايلك
انا:منتصر راجل إيناس.
إبراهيم"بان في وجهه انه راقيله بس ما بش يبين قدام هلي...بحت في احمد"ربع ساعة تو نجيك يا احمد...ولا نتلاقو في الكافي.
أحمد:باه تم انتلاقو في الكافي.

إبراهيم:"مسك يدي بلقوه وطلع"اركبي.
انا:"ركبت في السياره بدون ما نحكي لانه كان راقيله بكل ما قدرتش انكلمه"
إبراهيم:مش عاجبك انا...مش راجل قدامك...
انا:عليش منفصل شن الغلط الي درته.
إبراهيم:لا ما درتي شي...اول حاجه طالعه بدون اذني...وتبي تركبي مع راجل اختك.
انا:تي راجل اختي قلتها بروحك...ليش تفكر بالطريقه هذي.
إبراهيم:عادي حتى انا و..
انا:كمل...انت ومن.
إبراهيم:قصدي يعني ك مثال انا و أي وحده من صبايا خوتي ممكن يصير بيننا شي...
انا:قصدك انت وافنان.
إبراهيم:كييف¿¿اا لا مش شرط افنان يعني قتلك ممكن...مفيش بيناتنا شي اصلا.
انا:ههه كنك ارتبكت قتلك افنان لان خوتك لخرين مش متزوجين.
إبراهيم:اهااا...اا فاهم عليك.
انا:"معش حكيت لان علامة الاستفهام الي كانت في راسي حولت...ولقيت الجواب على سؤالي"

تكي إبراهيم جاب حلو وحاجات نخش بيهن...ومشينا لحوش جدي.

اول ما وصلنا.

انا:تبي تطلع طول.
إبراهيم:نسلم ع الشباب وطالع.
انا:تعرفهم قصدك.
إبراهيم:اها...نشوف فيهم مع احمد...هذا معتز صح.
انا:"استكيت"اا اها هو.
إبراهيم:"نزل فتحلي الباب".
انا:"استغليت الفرصه قدام معتز ومسكت يده" وصلني لعند الباب قبل وبعدين سلم عليه.
إبراهيم:"استغرب الموقف"هههه تي حوش جدك راه كنك انتي.
انا:ههه امشي وانت ساكت.

ومعتز يبحت فينا وعيونه قريب يطلعن.

إبراهيم:السلام عليكم.
معتز:وعليكم السلام...شن جوك.
إبراهيم:الله يسلمك الحمد لله..شن امورك انت.
معتز:تمام والله الحمد لله...
انا:كيف حالك يا معتز.
معتز:"بحت فيا واستك" اا تمام يا امل شن جوك.
انا:الحمدلله"وبحتت في إبراهيم وقربت من وذنه وهو طبس لان هو اطول مني بواجد...وعليت صوتي عشان يسمعني"حبيبي ما تطولش عليا تمام...وبسته ع خده..
إبراهيم:"انصدم من الموقف"ان شاء الله حاضر.

خشيت وسيبتهم هما الاثنين مصدومين.

سلمت على الكل...وقعمزت جنب إيناس.

إيناس:وين اختفيتي..
انا:إبراهيم قالي تو نشيلك انا.
إيناس:شكله غيور...
انا:اها بكل...القيت معتز بره.
إيناس:هيييي...عليك اكشن...شن صار.
انا:.......
إيناس:وووك مقوى عينك.
انا:هههههه...خليه بيش يعرف اني نسيته.
إيناس:صحه لك.
انا:وين سناء.
أماني:في دارها مسكره على روحها.

صبيت خشيت عليها في الدار لقيتها راقده.

قربت منها.

انا:سوسو نبضي...نوضي غلاي.
سناء:واعيه..شن تبي.
انا:يا عليك ترحيب شن تبي.
سناء:"ناضت بحتت فيا" بعد الي درتيه تبيني نستقبلك بالاحضان.
انا:نعم شن الي درته.
سناء:جمال في المستشفى بسببك يا مدام.
انا:بس انا ما غلطتش...وحتى اني ما قلتلش انحبك ولا شي هو معيش روحه في وهم.
سناء:عليك قوة عين وصحة وجه والله ما تحشمي.
انا:سناء افطني لروحك ما درت شي انا لين تقوليلي هكي.
سناء:اطلعي ما نبش نشوف وجهك.
انا:سناء.
سناء:قتلك اطلعي انا.
انا:"خنقتني العبره وطلعت من الدار مشيت للحمام طول"

ما توقعتش الموقف هذا من سناء...يعني تعاملني بالطريقه هذي وهي عارفه ليش انا رافضه جمال...معقوله الناس يتغيرو بالطريقه هذي...بس ليش الي نحبهم كلهم يتخلو عني...قعدت نبكي في الحمام معش طلعت.

رن فوني...

انا:الو
إبراهيم:شن صارلك منبدري هههه صدمتيني.
انا:وينك انت.
إبراهيم:في الكافي نرجى في احمد...كنه صوتك تبكي انتي.
انا:تعال......تعال توا ضروري.
إبراهيم:باهي جايك بس كنك شن صار ليش تبكي.
انا:تعال بس.
إبراهيم:حاضر..يلا جايك توا.

صلحت شكلي...وطلعت خذيت دبشي.

إيناس:كنك.
انا:ما تسألينش توا.....بكره نحكيلك كل حاجه.
إيناس:تعالي في الجنان تو نحكو.
انا:باه تعالي.

طلعت انا وايناس للجنان وحكيتلها كل شي....شوي وخشت ايناس وقعدت نستنى في إبراهيم في الجنان.

وخش معتز.

انا:"طبست راسي ما بتش نبحت فيه"
معتز:خير وين ماشيه.
انا:مروحه.
معتز:المغرب ما لهش شي مذن..غريبه مروحه بدري.
انا:ما يخصكش.
معتز:اها شكلك متعاركه مع سناء.
انا:وكيف عرفت.
معتز:هههههه مش فايتني شي راه وعارف زواجك بالغصب...سمعت سناء تحكي لخالي محسن...ليش تديري في طروح قدامي ع اساس تحبيه المسكين بروحه انصدم.
انا:كنت ما نحبش بس توا نموووت فيه...على الأقل محترم العلاقه يلي بيننا.

ورن فوني...حطيته على السبيكر لان عارفه إبراهيم كيف رح يبدى المكالمه.

انا:الو
إبراهيم:حبيبي قاعد برا انا.
انا:يلا حياتي طالعه.

وسكرت وبحتت في معتز...

انا:سلملي على ايمان...يلا سلام.
معتز:"قعد يبحت فيا بدون ما يحكي لان إبراهيم سكته بدون ما يقصد طلع ورايا وقعد يبحت في السياره".

ركبت في السياره...ودموعي قعدن ينزلن بدون ما نفطن لروحي.

إبراهيم:"مسحلي دموعي"شن في ليش هذا كله..
انا:إبراهيم اطلع هيا نبي نروح تعبانه.
إبراهيم:باهي اهدي بس.
انا:"بحتت لقيت معتز مصبي عند الباب" إبراهيم...
إبراهيم:عيونه.
انا:انت تحبني صح.
إبراهيم:أكيد شن السؤال الغبي هذا.
انا:"ابتسمت...وقربت منه وبسته".
إبراهيم:هههه انتي اليوم مش طبيعيه...بس ياريتك ديما هكي.
انا:رح نبدو صفحه جديده...اعتبر اليوم فرحنا.
إبراهيم:ههههه...تمام معناتا نمشو للمزرعه.
انا:هههه لالا عاد...اطلع توا بس..الناس تشوف فينا.
إبراهيم:تمام.

________

إيناس:سناء ليش الحركات هذينا...معقوله تديري هكي لأمل
سناء:تي تعرفي تخطيني....مصبيه مع اختك انتي.
إيناس:سناء ركزي...راه مش غلطت امل...بعد تجي للصح هي غلطتك انتي...انتي الي عيشتيه في وهم المسكين.
سناء:عارفه عارفه غلطتي"وتمت تبكي"
إيناس:"شدت سناء وحضنتها"خلاص الي صار صار وجمال توا كويس.

__________

وصلنا للحوش....خشينا ونحن راقيين ع الدروج رفعني إبراهيم...

انا:هههه تو يشوفونا يا مريض.
إبراهيم:خليهم يشوفو عريس انا اليوم.
انا:هههه صدق روحه.

وصلنا قدام باب الشقه ورن فون إبراهيم.

إبراهيم:"فتح الباب" خشي تو نلحقك.

#يتبع