ابتسامة حزن

ابتسامة حزن/الحلقة"33"

شوي ودق باب الحوش طلع اكرم فتح وخش.

بابا:السلام عليكم.
انا:"بحتت في اماني واميره...وحتى هنا دارن نفس اللقطه.
ماما:وعليكم السلام.
اكرم:بحت فيه بنظره مستفزه وخش للدار.
بابا:كيف حالكم..
ماما:الله يسلمك الحمد لله.
بابا:بنيت بوها...معقوله ما تدورش باتك.
انا:"خشيت جوا بلا ما نحكي اي شي".
ماما:امل تعالي هنا.
انا:"ما بتش نرد"
بابا:"سلم علي البنات وجاني في الدار"

دق علي الباب.

انا:تفضل.
بابا:مش مرايفه علي بابا.
انا:لالا.
بابا:تبي تزعليني منك.
انا:وانت فكرت فيا نزعل ولا لا...ولا ما تحسش بيها إلا لما تجيك.
ماما:امل...شن الكلام هذا...تحشمي علي وجهك باتك هذا.
انا:"صبيت خشيت للحمام وخبطت الباب بالقوه"

وقعدت نبكي...يعني صح انا زعلانه منه بس في الاخير هو بابا.

طلعت من الحمام لقيته ماشي...خشيت للدار لان ماما تمت تعطي فيا في نظرات يخوفن.

قعدت شوي ورن فوني.

انا:الو.
إبراهيم:هلا حبيبي شن الجو.
انا:تمام.
إبراهيم:كنه صوتك هكي.
انا:لا ما كني شي مريضه بس.
إبراهيم:امل مش عيل انا تمشيني بالجو.
انا:بابا جاء.
إبراهيم:قتلم من الاول عند هلك مش رح تتريحي.
انا:إبراهيم ما تزيدهش عليا.
إبراهيم:آسف...توا نبي نسكر.
انا:تمام خوذ راحتك.
إبراهيم:ردي بالك من روحك.
انا:ان شاء الله.
إبراهيم:انحببك.
انا:"ما بتش نرد عليه بالعاني".

سكرت من إبراهيم وقعدت مكسده علي النت وجت اماني كسدت معايا..هدرزنا لعند الساعه 1:30 وبعدين رن فون اماني ومشت تحكي..وانا رقدت.

________

ثاني يوم نضت علي هرجة الحوش منقلب تخبيط.

طلعت من الدار بجتت في ماما لقيتها سارحه و باين علي وجهها الزعل.

انا:صباح الخير.
ماما:صباح النور.
انا:شني هذا شن في.
ماما:العمال يشتغلو فوق.
انا:ماما انتي زعلانه.
ماما:لالا..عليش نبي نزعل.."وصبت خشت لدارها".

مشيت للمطبخ خذيت فنجان قهوت وقعمزت نتفرج علي الTv..

________

علي العصر رنت عليا بسمه...عازمين عمامي وعماتي...وقالت ضروري نجي معاهم.

اماني:رني علي راجلك قوليله فكيني من تسكير الرأس.
انا:تي باهي تو نقوله وسعي بالك.

رنيت علي ابراهيم قلتله وقالي امشي بس مع خوتك مش سياره اخرى.

وشالنا اكرم...انا والبنات وماما.

ليا زمان علي جو عيت عمي علي مرايفه عليهم واااجد...لان حوشهم زي حوش الجد لان هو اكبر واحد في عمامي..

هديل:"جت قعمزت جنبي" شن جوك امولي.
انا:تمام الحمد.
هديل:قالولي حامل.
انا:اها.
هديل:ما شاء الله ربي يتمم عليك.
انا:تسلمي.

الهام:"تبحت فينا من بعيد وعيونها يبن يطلعن من الغيره".
اماني:كنك انتي بشوي علي روحك تو تموتي.
الهام:والله كان ما خربت عليها ما يقعد اسمي الهام.
بسمه:الهام الراجل ما يبكش خلاص شوفي غيره.
الهام:ما فضيتش عشان تاخذه مني..احمد ليا انا بس.

انا:"صبيت من تلا هديل وقعمزت جنب الهام" كنك يا حاله ما تقوليش مازلتي علي نفس السيره.
الهام:انتي خطيني...تو قاعده تهدرزي معاها تقول حبايب..
انت:ههههه خفي علينا.
بسمه:فوتيها تتعبي كان تبي تراضيها.

وخش ايمن..

ايمن:السلام عليكم.
نحن:وعليكم السلام.
ايمن:اووه العسل...شن جوك.
انا:تمام الحمد لله...شن جوك انت.
أيمن:تمام والله....موني ترا صبي يا قزمه ديريلنا قهوه.
اماني:منش...قالها الطويل.
ايمن:هههه تي غير صبي هيا قهوتك سمحه عجبتني.
بسمه:اوووه خلاص شكله طاح..
انا:ههههه في الاول موني وتوا قهوتك سمحه...نعليا نا.
ايمن:ما نلقش خير منها.
اماني:"تزلطت وطلعت".

خشت للمطبخ وبدت تديرله في قهوه..

أيمن:صدقت روحها.
اماني:بلا سماطه.
ايمن:باهي كيف يصير في الشرط الي يومتها.
اماني:شن تبي.
ايمن:من الأخير...نبي اميرة اختك.
اماني:طيح سعدك...اميرة مازالت صغيره وبعدين بينكم واجد.
ايمن:عاجبتني ونبيها.
اماني:والمطلوب مني.
ايمن:نبي رقمها.
اماني:وكان ما وافقتش مش شوري راه.
ايمن:باه بس حاولي تقنعيها.
اماني:تمام..هاك القهوه..والرقم تو نبعثه لك.
ايمن:تم...شكراً يا عسل.
اماني:عفواً.

________

سهى:شفتنه كيف راقيله من امس ما نزلش شكله الموضوع كبير.
سجود:يستر الله.
سهى:غير افطنن راه ماما تعلم بالموضوع تديرلنا قصه.
سجود:لالا كوني هانيه.
إسراء:يا بنات ضروري نمشو لأمل نشوفوها كنها.
سهى:صح ضروري لكن شن نقولو لماما.
سجود:ماشيين تهدرزو مع البنات عادي.
إسراء:خلاص بكره نمشولها.
سهى:خلاص تم.

_________

في الليل روحنا للحوش...وخشيت رقدت طول من التعب.

اماني:الو حبيبي.
حمزة:خيرات يا عمري شن الجو.
اماني:تمام الحمد لله شن جوك انت.
حمزة:تمام.
اماني:حبيبي امتى تبي تحكي مع خوتي.
حمزة:ان شاء الله قريب بس مش عارف شن نبي نحكي مع اكرم متحشم منه.
اماني:عليش متحشم عادي.
حمزة:ما عشان شافنا يومتها.
اماني:اها...باهي بس شن تبي تدير في الاخير لازم تحكي معاه.
حمزة:ان شاء الله خير....حبيبي في رقم خش عليا انتظار شوي ونرد عليك.
اماني:تمام خوذ راحتك.

سكر حمزة وبعده طول رن فون اماني.

اماني:هييي هذا شن يبي

ما بتش ترد في الاول لكن بعد سكن ردت.

اماني:الو..
سراج:مشغول مع السيد هذا.
اماني:شن دخلك مع من مشغول.
سراج:دخلني ونص.
اماني:تي انت شن قصتك معايا.
سراج:يا فرخه افهمي...لعند امتى بنقعد انلمحلك.
اماني:شن نفم.
سراج:اماني انا انحبببك...فيك حاجه جذبتني من اول مره شفتك فيها.
اماني:"نصدمت من الموقف وسكرت في وجهه وقفلت الفون".

________

علي العصر كنا مكسدات ودايرات قهوة...شوي سمعت صوت الباب.

اميره:تو نصبي انا.

صبت اميره فتحت الباب.

#يتبع