حبك طريقي

الفصل السادس والثلاثون

توجه علاء ونورين الي مطعم بجوار الشركه وجلسوا على الطاوله
اقترب منهم الجارسون :تطلبوا ايه
علاء :تحبي تشربي حاجه قبل الأكل
نورين :لا شكرا
علاء :لا اشربي ليمون هدى أعصابك ونظر للجارسون :٢ ليمون لو سمحت
ذهب الجارسون واتي بالليمون ووضعه أمام نورين وعلاء
علاء :اشربي بقى واهدي واحكي لي ايه اللي وصلك العصبيه دي
قصت له نورين ما حدث وما قالته لها شيرين
نورين :انا سكت وعديت كل كلامها بس لما جابت سيره بابا وماما الله يرحمهم مقدرتش امسك اعصابي ومحستش الا وانا برميها بالميه وهي على الأرض وشعرها في أيدي ثم تنهدت وابتسمت ابتسامه سخريه :تفتكر ذنبي ان بابا وماما ماتوا وانا صغيره تعرف تيته عزيزه كانت بتحكي لي عن بابا الله يرحمه انه كان ظابط كبير وكان غني اوي واتجوز ماما وكانت صغيره وهو كان أكبر منها بكتير وكانت بنت السواق اللي بيشتغل عنده بس هو اتجوزها عشان جدي قبل ما يموت وصاه عليها وانها ملهاش حد في الدنيا
علاء :ملهاش حد ازاي امال تيته عزيزه راحت فين
نورين :تيته عزيزه مش جدتي والده ماما هي كانت بتشتغل عند بابا داده لاخته ولما اتجوز ماما خلاها تيجي تقعد معاها لانه اتجوزها في اسكندريه وهو كان قاعد في القاهره وكان بيغيب عنها كتير لانه كان متجوز غير ماما بس مراته مكنتش بتخلف وبعد ٣سنين جواز ماما حملت فيا وهو فرح اوي وقال لها لو ولد هنسميه حسام ولو بنت هنسميها نورين وفي يوم وهو جاي لها اسكندريه عمل حادثه ومات وماما لما وصلها الخبر تعبت وجالها السكر وهي حامل فيا
وانا كمان جالي السكر وبعد ما ماما ولدتني بكام شهر ماتت هي كمان وفضلت مع تيته عزيزه هي اللي ربتني
علاء :طيب ليه بعد ما والدك اتوفى والدتك ما رحتش لأهله مش بتقولي انه كان غني
نورين :ماما كانت تعبانه قبل الولاده وبعدها كانت عايزه تروح لهم بس ملحقتش وماتت حتى تيته عزيزه بعد وفاه ماما راحت لهم بس هما سابوا البيت ونقلوا في مكان احنا مانعرفوش وتيته عزيزه دورت عليهم كتير بس للاسف موصلتش لحاجه
علاء :طيب ممكن اسالك سؤال
نورين :اتفضل
علاء :هي تيته عزيزه صرفت منين
نورين :تيته عزيزه كانت متجوزه من عمو ابراهيم الله يرحمه وكان له معاش وكمان جوز بنتها ماما مديحه كان بيشتغل وكمان اللي نفعنا ان الشقه كانت تمليك وعشنا مع بعض بس لما جيت ادخل الجامعه جيت انا وتيته عزيزه هنا خصوصا انها تعبت وكان لازم تتعرض على دكاتره هنا
علاء وهو ينظر لها :طيب ممكن تاكلي بقى يا نور
نورين :نور انت نسيت اسمي ولا ايه يا بشمهندس
علاء :انا عارف انك نورين بس انا عايز اقولك اسم محدش قاله لك قبل كده هحكي لك حكايه عارفه والدتي دكتوره نورا اسمها اصلا انوربن ووالدي دكتور حسام اول ما شافها حبها بس سماها نورا عشان كان عايز يقولها اسم محدش قاله لها قبل كده طب انت حتى فيكي شبه كبير منها فرق بس العيون هي عيونها زرقا وانت عيونك
نورين :مالها
علاء :حلوه حلوه اوي هه ايه رايك
نورين :في ايه
علاء :اقولك نور
نورين :وقت البريك خلص وعدي كمان نص ساعه احنا لازم نرجع الشركه
علاء :لا انت مش هترجعي الشركه انت هتروحي وانا هوصلك
نورين :انا
علاء :مش عايز اعتراض انت هتروحي ترتاحي وبكره نبقى نتقابل عند الاسانسير وقفت نورين ولكنها شعرت بالدوار وكادت تسقط فلحقتها يد علاء
علاء :انت اخذتي الدوا
نورين :لا
علاء بغضب :لا ليه اتفضلي خديه دلوقت
تناولت نورين علاجها ونظر لها علاء :بقيتي احسن
نورين :اه الحمد لله
علاء :يلا بينا عشان تروحي انصرف علاء ونورين وقام علاء بايصالها للمنزل ثم عاد مره اخرى الي الشركه وفي طريقه لمكتبه وجد سيرين وهي تتحدث
في الهاتف وتضحك
علاء :سيرين انت جيتي امتى وجيتي لوحدك ازاي
سيرين في الهاتف :طيب يا يويا هكلمك تاني واغلقت الهاتف ونظرت لعلاء
انا جيت من نص ساعه وبابي اللي جابني لاني كنت عنده في المستشفى
علاء :وايه اللي بيضحكك اوي كده
سيرين :اصلي عرفت ان نورين ضربت شيرين
علاء :هو الموضوع لحق يتعرف
سيرين :ده نزل على النت الحق بقى هات تسجيل الكاميرات عشان نعملها حصري شاهد قبل الحذف
علاء :كويس انك فكرتيني بموضوع الكاميرات ده عشان احذف اللي حصل
سيرين :ليه يا ابيه دا انا هجيب لك عليها لايكات بالهبل
علاء :بطلي انت هبل هي فين شيرين
سيرين :اهي عندك مستموته في مكتب جاسر انا عارفه انتم ماسيبتوش نورين تخلص عليها ليه
نظر لها علاء وتركها ودخل مكتب جاسر وجد شيرين وهي تبكي وعندما رأته ركضت اليه مصطنعه الحزن :شفت يا علاء مش قولت لك الأشكال دي ماتنفعش تبقى سكرتيره ليك انت لازم ترفدها بس قبل ما ترفدها لازم تيجي تعتزر لي وتبوس رجلي كمان
علاء :انسه شيرين
شيرين :نعم
علاء :سلمي العقود والورق اللي عندك للمهندس جاسر واتفضلي مع السلامه واي مستحقات ليكي تعالي بكره ساويها مع الحسابات
شيرين بصدمه :انت بتتكلم جد يا علاء
علاء :اظن الكلام ده مفيش فيه هزار وانا حذرتك قبل كده من طريقه تعاملك مع الموظفين وأننا كلنا هنا زي بعض ومحدش بيشتغل عند حد وكلنا بتشتغل مع بعض فلما تعاملي سكرتيرتي بالطريقه دي يبقى انت ملكيش شغل هنا اتفضلي مع السلامه
نظرت شيرين له وأخذت حقيبتها وانصرفت وقبل انصرافها :ماشي يا علاء
جاسر :ليه كده يا علاء ازاي تطرد شيرين دي معاها كل أسرار الشركه
علاء:ماتقدرش تعمل حاجه
جاسر :معقول يا علاء عشان نورين تطرد شيرين
علاء :مش عشان نورين بس شيرين بتعامل الموظفين معامله وحشه وبعدين انا زهقت منها ومن طريقتها بقولك ايه قفل على الموضوع ده انا ماشي
جاسر :براحتك يا باشا
وهتف علاء باسم سيرين :سيرين سيرين
أتت سيرين على صوته :نعم يا ابيه
علاء :يلا يا حبيبتي عشان نمشي
سيرين وهي تنظر لجاسر اه يلا يا حبيبي
وذهب علاء وسيرين
سيرين لنفسها :وبعدين بقى كده مش هينفع انا قاعده في مكتب جاسر ومفيش حد بيدخل فيه غير اللي شغالين في الشركه انا مش عارفه انفذ الخطه بتاعتي يعني انا ابقى حاطه الخطه ومعرفش انفذها
علاء :سرحانه في ايه يا سيري
سيرين :لا يا ابيه مش سرحانه معاك
في المستشفى
يجلس حسام داخل مكتبه وهو يفكر في نورا
حسام لنفسه :معقول اكون بحبها امال ليه اضايقت لما عرفت ان الزفت ده عايز يتقدم لها
دخل عليه المكتب فجأه عمرو
عمرو :الكلام ده بجد يا حسام
حسام :كلام ايه
عمرو :الزفت اللي اسمه مراد ده طلب ايد ثريا
حسام :هو كمان هو ايه اللي بيحصل هي شوطه ولا ايه
عمرو :انا مش مرتاح للموضوع ده ولازم اعرف فيه ايه واكيد مفتاح اللغز ده مع سيرين
حسام :اشمعني سيرين
عمرو :دايما بيتكلموا مع بعض وبيتقابلوا انا هعرف واعرفك ولو طلع اللي في دماغي هعرفهم ان الله حق سلام
حسام :رايح فين
عمرو :همشي انا معنديش عمليات النهارده وهروح اقرر سيرين
ذهب عمرو الي المنزل
في منزل شيرين
شيرين :كده يا علاء انا تطردني عشان حته بت سنكوحه تربيه شوارع ماشي انا هعرفك مين هيا شيرين الكاشف
وقامت بالتقات هاتفها وقامت بإجراء اتصال
شيرين :الو عامر بيه معايا
عامر :انا مش مصدق نفسي معقول شيرين بنفسها بتتصل بيا
شيرين :انا موافقه على العرض بتاع حضرتك
عامر :وانا لسه عند كلامي والمبلغ اللي تطلبيه
شيرين :انا ميهمنيش الفلوس قد ما يهني اني ازل علاء واخلي مناخيره في الأرض
عامر؛:وانا اوعدك بكده
شيرين :تمام هقابل حضرتك بكره
عامر:وانا هنتظر بفارغ الصبر
شيرين:ابقى خلي البت السنكوحه دي تنفعك يا علاء
في منزل حسام ونورا
وصل علاء وسيرين الي المنزل وقابلهم عمرو عند الباب ودخلوا جميعا الي المنزل وجدوا نورا وحسام في غرفه الطعام
نورا :كويس انكم جيتوا عشان نتغدى سوا بس انت جاي بدري ليه يا علاء
علاء :مفيش حاجه يا ماما انا بس معنديش شغل مهم قلت اجي اتغدى معاكم بقى لي كتير ماكلتش معاكم
نورا :الف هنا يا حبيبي
جلسوا يتناولوا الطعام وقاطعهم رنين هاتف سيرين
سيرين :دي نورين وغمزت لعلاء
نورا :سلمي لي عليها
سيرين :الو ايوه يا نوري
نورين :الحقيني يا سيرين
سيرين :اهدي يا نورين بتعيطي ليه انا مش فاهمه حاجه
شعر علاء بالخوف من كلام سيرين
نورين :تيته تعبانه اوي ومش بترد عليا وانا مش عارفه اعمل ايه
اخذ علاء الهاتف من سيرين
علاء :مالك يا نور ايه اللي حصل
نورين :تيته تعبانه ومغمي عليها وانا مش عارفه اعمل ايه
علاء :طيب اهدي وانا هتصرف
حسام :في ايه يا علاء
علاء :بتقول ان جدتها مغمي عليها وهي مش عارفه تتصرف
حسام :يلا نروح لها بسرعه عمرو تعالي معانا عشان لو احتجنا ننقلها المستشفى
نورا :انا جايه معاكم
ذهب الجميع الي منزل نورين وفتحت لهم نورين وهي منهاره وأخذتها سيرين في حضنها
نورين :انا اسفه انا ملقتش حد استنجد بيه غيركم
نورين :يا حبيبتي ماتقوليش كده انت زي سيرين
علاء :ايه اللي حصل يا نور
نورين :لما جيت كانت كويسه وبعدين قالت إن قلبها بيوجعها وفجأه وقعت واغمى عليها
حسام :ان شاء الله خير هي فين
أشارت لهم نورين على الغرفه
حسام :تعالي معايا يا عمرو انت وعلاء وانت يا نورا خليكي مع نورين انت وسيرين
دخل حسام وعمرو وعلاء الي الغرفه وصدم علاء عندها وجدها عزيزه
حسام :معقول داده عزيزه
علاء :إنت تعرفها يا بابا
حسام :هه مش وقته يلا نشوف شغلنا الأول
في الخارج تجلس سيرين وهي تحتضن نورين وتجلس نورا بجوارهم وهي تحاول أن تطمئنها
خرج حسام وعمرو وعلاء من الداخل وعلى وجههم الحزن
ركضت نورين عليهم
نورين :ايه
تيته فاقت انتم مش بتتكلموا ليه
حسام :البقاء لله يا بنتي
نورين بانهيار :لا انتم مش فاهمين هي بس تعبانه شويه لا هي مش هتسبني لا يا تيته ماتسبينيش
وفجأه وقعت فاقده الوعي ولحقها علاء قبل وقوعها
ووضعها على الاريكه وقام عمرو بفحصها
عمرو :غيبوبه سكر لازم ننقلها المستشفى
حسام :انقلها يا علاء انت وعمرو وانا هكلم مصطفى عشان الإجراءات
سيرين :انا هاجي معاكم
نورا :وانا
حسام :لا يا نورا خليكي معايا عشان لازم نلاقي شويه ورق هنحتاجه
حمل علاء نورين ووضعها في السياره وتوجه الي المستشفى ومعه سيرين وعمرو
حسام :انت عارفه مين جدتها
نورا :مين
حسام :داده عزيزه
نورا :ايه داده عزيزه
حسام :تعالي يا نورا لازم نلاقي بطاقتها واي روشتات لها
دخلت نورا الي الغرفه ونظرت الي عزيزه وهتفت عزيزه سبتينا ليه معقول تكون نورين بنت بنتك
علاء :يلا يا نورا مش وقته دوري على اي ورق يفيدنا
قامت بالبحث عن الورق ولكنها صدمت عندما وجدت ورقه
نورا :حسام
حسام :ايوه
نورا :شهاده ميلاد نورين
حسام :ايه يعني مالها
نورا :بص على اسمها بالكامل
اخذ حسام الشهاده منها وقراها بصوت عالي
حسام :نورين علاء قدري حسين المنياوي