حبك طريقي

الفصل السابع والثلاثون

صدم حسام ونورا مما وجدوه
نورا :نورين تبقى بنت ابيه علاء الله يرحمه انا مش مصدقه
ثم بحثت في الورق مره اخرى
نورا :بص ايه ده كمان
حسام :ايه
نورا :قسيمه جواز ابيه علاء على صفيه عزيز عبد الغني توفيق ابيه علاء كان متجوز بنت عم غزيز السواق ابيه علاء كان متجوز على ثريا ازاي ومخلف منها كمان ثم نظرت لحسام الواقف في صمت :انت مش بترد عليا ليه هه
حسام :اهدي يا نورا انا كنت عارف
اتسعت عيون نورا من الصدمه :ايه كنت عارف كنت عارف ايه عارف ان ابيه علاء كان متجوز ومخلف طب وثريا
حسام :ثريا كمان كانت عارفه
نورا :كانت عارفه انا مش مصدقه انا مش فاهمه حاجه
حسام :اهدي يا نورا وانا هبقي افهمك بس مش وقته مصطفى جه بره ويلا نطلع عشان نخلص إجراءات الدفن والجنازه
في المستشفى
يقف علاء خارج غرفه العنايه المركزه وبعد وقت يخرج عمرو وحسام
علاء :ايه يا عمرو الاخبار
عمرو :هتفضل في العنايه المركزه لحد ما تفوق وحالتها تستقر
علاء :اشمعني المره دي دخلت العنايه وهتستني فيها
عمرو :الموضوع مش انها اخدت دوا من غير اكل لا الصدمه اللي حصلت لها أثرت عليها
علاء :يعني هي هتفوق امتى
عمرو :ان شاء الله تفوق على طول الخوف مش من السكر او التعب العضوي الخوف من الحاله النفسيه لما تفوق انا كلمت خالك عمرو انه يكون موجود عشان لو حصل اي حاجه
عند منزل نورين
نورا :خلاص يا حسام
حسام :ايوه يا نورا وهندفن بعد العشا
نورا :انا هروح المستشفى عشان اطمن على نورين
حسام :اللي عرفته محدش يعرفه يا نورا لحد ما تفوق ونبلغ ثريا ونشوف هنعمل ايه
نورا :اكيد لاني مش فاهمه حاجه وعايزه افهم الأول
حسام :لما ارجع هفمهك كل حاجه
في المستشفى
وصلت نورا الي المستشفى ووجدت علاء يقف أمام غرفه العنايه المركزه
نورا :ايه الاخبار نورين عامله ايه
علاء :لسه مافاقتش وعمرو بيقول هتفضل فيها لحد ما حالتها تستقر
نورا :ان شاء الله خير
علاء :عملتوا ايه انت وبابا
نورا :خلاص زمانهم بيدفنوا دلوقت نورين معدش ليها حد غيرنا واحنا لازم نعوضها كل اللي فات
علاء :قصدك ايه يا ماما يعني ايه نعوضها ونعوضها عن ايه واحنا دخلنا ايه
نورا :هه لا مفيش حاجه انا هروح مكتبي ولو حصل جديد بلغوني
بعد انتهاء مراسم الدفن عاد حسام الي المنزل
في غرفه ثريا
حسام :حبيبتي يويا عامله ايه النهارده
ثريا :انتم فين من بدري يا حسام وانا زعلانه من الواد علاء ماشفتهوش النهارده خالص
حسام :كان فيه موضوع كده
ثريا :فيه ايه يا حسام شكلك عايز تقول حاجه
حسام :دايما كشفاني كده
ثريا :دا انا اللي مربياك يلا بقى قولي فيه ايه
حسام :لاقيتها يا ثريا
ثريا :مين يا حسام صفيه لقيت صفيه وابنها
حسام :مش بالظبط
ثريا :يعني ايه
حسام :صفيه اتوفت بعد وفاه ابيه علاء بكام شهر بس سابت بنوته زي القمر
ثريا :بنت علاء
حسام :ايوه عارفه تبقى مين
ثريا :مين
حسام :نورين
ثريا :البنت اللي علاء حكي لي عنها
حسام :ايوه وكده عرفنا ايه سبب الشبه اللي بينها وبين نورا
وانت عرفت ازاي
سرد لها حسام ما حدث :ولقينا شهاده ميلاد نورين وقسيمه جواز ابيه علاء على صفيه وشهاده وفاه صفيه
ثريا :انا عايزه اشوفها وديني عندها يا حسام
حسام :انا كلمت عمرو وقالي انها مش هتفوق الا الصبح وان شاء الله الصبح هاخدك عندها
ثريا :عشان كده عزيزه مشيت وسابتنا وقالت إنها هتعيش مع بنتها
حسام :هي اللي ربت نورين
ثريا :اخيرا يا حسام بنت علاء هتبقى في حضني انا مشتاقه اشوفها اوي
مرت الساعات وأتى الصباح وقام عمرو بنقل نورين الي غرفه عاديه
في غرفه نورين نجد ثريا تجلس بجوار الفراش وبجوارها نورا وحسام وعلاء وعمرو يقفوا عند الباب
علاء :انا مش فاهم حاجة ازاي نورين تطلع بنت خالي
حسام :هي حكت لك حاجه عن نفسها او حياتها
سرد له علاء ما سردته له نورين عن حياتها
حسام :فعلا احنا بعد وفاه ابيه علاء الله يرحمه الفيلا جالها قرار ازاله واحنا سيبناها ومشينا
نورا :انت كنت عارف منين يا حسام ابيه علاء اللي قالك
ثريا :لا يا نورا انا اللي قلت له علاء قالي قبل ما يموت وانا قلت له يروح يجيب صفيه تيجي تعيش معانا بس مالحقش عمل حادثه وهو رايح عندهم
علاء :يعني الجزء اللي كنا بنورده للبنك من أرباح الشركه كان عشان كده
ثريا :ايوه نورين دلوقت شريكه في الشركه والمستشفى بنصيب علاء الله يرحمه
هنا تململت نورين وفتحت عيونها نظرت لها ثريا بحب
ثريا :حمد الله على السلامة يا بنتي
نورين :اه انا فين انا حلمت حلم فظيع تيته عزيزه انا هروح لها ونهضت نورين من على الفراش متجهه الي الباب
ثريا :رايحه فين يا بنتي
نورين :رايحه لتيته زمانها قلقانه عليا انا لازم امشي
حسام :اهدي يا نورين يا حبيبتي تيته عزيزه في مكان احسن من هنا
نورين :لا لا مش صحيح ده كان حلم وانا خلاص صحيت انا رايحه لها هي مستنياني وانهارت في البكاء
اخذتها ثريا في حضنها وهتفت :نورين يا حبيبتي احنا معاكي ومش هنسيبك
نورين وهي تبتعد عن ثريا وتصرخ :انتم ليه عايزنها تموت يا تيته تعالي قولي لهم انك موجوده قولي لهم انك مش هتسبيني تعالي يا تيته وركضت الي الباب فاصتدمت بعلاء الذي وقف أمامها وامسك يدها
علاء :اهدي يا نور احنا معاكي
نورين :سيبني يا علاء انا رايحه لتيته وحاولت الفرار من يده ثم انهارت قواها وسقطت بين زراعيه فاقده الوعي
وضعها علاء على الفراش
حسام :علاء روح انده لخالك عمرو
ذهب علاء وأتى بعمرو وقام بفحص نورين
ثريا :خير يا عمرو
عمرو :انهيار عصبي حاد هي مش مصدقه اللي حصل ورافضه الواقع ومش عايزه تعيشه فأنا هديها مهدئات لحد ما تستوعب اللي حصل وعقلها يقبله
مرت الايام ومازالت نورين تحت تأثير المهدئات وتنام طوال الوقت وتجلس بجوارها ثريا
دلف الي الغرفه حسام وعلاء
حسام :ازيك يا تيته ثريا اخبار الجمال النائم ايه النهارده
ثريا :زي ما هي تفوق ثواني وترجع تغيب عن الدنيا
حسام :معلش يا يويا لازم اعصابها ترتاح ثم نظر الي علاء :يمكن عايزه قبله حب حقيقيه عشان تصحى ثم غمز له
علاء :اتلم يا حسام بدل انت عارف
حسام :خلاص يا باشا انا بهزر معاك ثم نظر الي ثريا
:انا كلمت خالو عمرو وقالي انه هيبدأ يقلل المهدئات شويه شويه عشان تفوق وتستوعب الموقف حبه حبه هي فاكره ان خلاص مبقاش لها حد بعد وفاه تيته عزيزه واحنا لازم نوصل لها الحقيقيه عشان تهدأ واعصابها تهدي
هنا تذكر علاء حديثها في الهاتف مع إياد
علاء :إياد
حسام :إياد مين
علاء :اللي كانت بتكلمه في التليفون ازاي راح عن بالي
ثريا :وهنوصله ازاي
علاء :من تليفونها اكيد مسجله نمرته
حسام :صح عندك حق هو تليفونها فين
علاء :اكيد في شقتها تعالي معايا نروح ندور عليه
ذهب علاء وعمرو الي منزل نورين وفتحوا الباب بالمفتاح الذي اخذوه من نورا
علاء :دور كده عندك وانا هدور في الاوضه دي
دخل علاء الي غرفه نورين فهي غرفه بسيطه تحتوي على فراش صغير ومكتب وبعض الكتب والروايات في مكتبه صغيره اقترب من مكتبها وجد دفتر تدون فيه نورين بعض خواطرها فتحه علاء وظل يقلب في صفحاته حتى وجد
النهارده حصلت حاجه مش عارفه حلوه ولا وحشه قابلت واحد اول مره اشوفه كنت هقع وانا داخله الاسانسير بس هو لحقني بايده ولقيت نفسي ببص في عيونه وتهت فيها عيونه زي موج البحر اول مره احس الاحساس ده
قام علاء بطي الصفحه للصفحه الأخرى
قابلته تاني عند الاسانسير ياترى دي صدفه ولا القدر انا فرحت اوي لما شفته قد ايه هو وسيم وعيونه حلوه وقالي اسمه علاء ياترى بيشتغل ايه في الشركه بس واضح ان مركزه كبير لانه بيشتغل في الدور التاسع وكان نازل بالاسانسير مع الصفرا شيرين
ضحك علاء عندما وجدها تذكر شرين بهذا الوصف
قلب علاء الصفحه الي التاليه
اول مره اكون مش مضايقه عشان عندي السكر انا مش مصدقه معقول رجل الاسانسير يطلع صاحب الشركه وكمان أقع في حضنه مرتين بيقول كمان انه شالني لحد المستشفى ياترى خاف عليا ولا حس بالذنب مش عارفه انا خايفه انا اتعلقت بيه وخايفه احبه
قام علاء بقلب الصفحه
احلى يوم النهارده علاء نزل واخد الكيكه كلها وقالي مخليش راجل ياكل من اكلي واضايق من طارق ياترى عمل كده ليه معقول يكون بيغير عليا انا خايفه امشي ورا قلبي وبعدين اتصدم فوقي يا نورين انت فين وهو فين
قام علاء بقلب الصفحه
النهارده كان ممكن اقتل حد بس الحمد لله طلعت اخته سيرين قد ايه هي جميله وطيوبه وانا حبيتها اوي وكمان النهارده علاء نرل واكل معايا من الاكل اللي انا عملاه وحرق دم الصفرا شيرين انا مش مصدقه اني ركبت معاه العربيه وهركب معاه كل يوم وهشوفه وقت أطول
قلب علاء الصفحه
كل يوم بيعدي بحس اني بتشد ليه انا حبيته اوي ومش عارفه مصير الحب ده ايه يا ترى هو كمان بيحبني ولا انا عايشه في وهم انا مش قادره ما افكرش فيه ولا عيونه بتغيب عني حتى لما اغمض عيوني بشوفه قدامي انا هسيب نفسي واحبه حتى لو كان من غير امل
قلب علاء الصفحه
انا مش مصدقه انا هشتغل سكرتيرة له في مكتبه هشوفه كل الوقت هملي عيني منه انا فرحانه اوي بس الفرحه مش كامله الصفرا شيرين مقلله فرحتي
قلب علاء الصفحه
النهارده شيرين الصفرا دخلت عنده نص ساعه كنت هموت فيهم يا ترى بيعملوا ايه بيشتغلوا ولا انا كل ما اشوفها دخله عنده بتجنن يارب هون عليا
ثم قلب الصفحه
النهارده حسيت بفرحه وانتصار عشان ضربتها الصفرا دي لو كان علاء سابني عليها كنت قطعتها انا مش عارفه ازاي لقيت نفسي في حضنه اظاهر انه عنده حق كل اما أقع أقع في حضنه كان نفسي أفضل في حضنه بس حلو اسم نور هو قالي انه عايز يقولي بإسم محدش قاله قبل كده هو بيحبني ولا ايه انا محتاره ومش عارفه اعمل ايه بس انا ارتحت اوي في كلامي معاه واول مره احكي لحد حكايتي من غير ما اكون زعلانه وانا بحكي ياترى ايه اخرتها
كانت هذه السطور اخر ما كتبته نورين في مذكراتها اغلقها علاء ثم وجد حسام يقف بجواره
حسام :احم احم
علاء :انت واقف هنا من امتى
حسام :من زمان انت بتحبها يا علاء
علاء :انا مش بحب حد انا مش قادر انسى سمر وانت عارف كده كويس
حسام :بس تصرفاتك علقتها بيك وخلتها تحبك وكل كلامها عليك
علاء :مش وقته دلوقت خلينا في اللي كنا جايين عشانه لاقيت التليفون
حسام :اه لقيته وطلعت نمره إياد هتكلمه انت ولا اكلمه انا
علاء :لا هكلمه انا هات التليفون
قام علاء بالاتصال بإياد
إياد :نوري حبيبتي انت فين مش بتردي عليا ليه
علاء:حضرتك استاذ إياد
إياد :ايوه مين معايا نورين حصل لها حاجه
علاء :للأسف نورين في المستشفى لان تيته عزيزه اتوفت وهي جالها انهيار عصبي
إياد :ايه تيته عزيزه اتوفت امتى احنا جايين على طول