نمته صحيت على صوت جدي قاعد في الصاله مع امي وحبوبه وخالي فرح قال ليهم مافي اي شي اسمو طلاق وما عندنا بنات بتتطلق وهي ما اول ولا اخر واحده يعرسو فيها ،، خالي فرح قال ليهو كلامك صاح يا ابوي نحنا نجيب عمر "راجلي" ويطلق اللبنانيه العرسه دي وتاني مافي لي غربه طالما هو معديها فارغه وما ماشي زول عيش ...
امي قالت ليهو تيسير ما حاتقبل الكلام ده يا ابوي وانا زاتي ما بقبل بتي تعبت شديد وانتي عارف وضعها الصحي عامل كيف لا حمل مشاكل ولا حمل كلام الناس القص قلبه ،، جدي قال ليها معزه انا خايف عليها يمكن اكتر مما انتي خايفه عليها وعارفه ما حمل مشاكل والجاي ما هين وكلنا واقفين معاها لكن انتي حكمي ليها عقله لو كل مره عرسو فيها طلبت الطلاق مافي بيت بيعمر ولا بتقوم لي قايمه ،،
خالي فرح قال ليها كلام ابوي صاح يا معزه بالاضافه لان وضع المطلقه في البلد دي كعب شديد وحاتتعب اكتر نحنا بدل نخرب البيت نجيب اسيادو ونوعيهم هي لسه صغيره وما فاهمه يعني شنو مطلقه ولا يعني شنو بيت ومسؤوليه ، امي قالت ليهو كلامكم على عيني وراسي لكن بتي ما بترجع البيت داك تاني مالم يطلق التانيه ويجي هنا لغايه البيت ويعتذر منها قدامنا كلنا والا بتي ... جدي قاطعه قال ليها ده المفروض يحصل من غير الا وكان وحقها يعتذر ليها ...
جيت خاشه قولته ليهم لا دايره منو اعتذار ولا دايره شي غير ورقتي ، خالي فرح عاين لي جدي قال لي تيسير تعالي شويه قولته لي ما جايه معاك ولو متواصل معاهو قوليهو يسلمني ورقتي ولو ما سلمني ليها بينا المحاكم ،، ابوي عبدالعال سكت وما قال شي وعاين لامي قال لي تيسير اخدتي دواك؟! شلته نفس قولته ليهو اي قال لي تعالي اقعدي جنبي وانت يا فرح امشي شغلك بعد ده اتاخرته وكلم عمر يرسل لينا ورقته لو وصلته ليهو خالي عاين لي جدي باستغراب قال ليهو حاضر ومشي ....
جيت قعدته جنبو قال لي ما شربتي الشاي قولته ليهو ما عايزه قال لي ما علي كيفك عاشه جيبي لي الجبنه وشاي لبتي قولته ليهو ابوي انا ما شافعه ما تحاول تستغفلني ضحكك قال لي الكلام ده لي انا؟؟! بزعل منك وضربني في كتفي قال لي تعالي بره كدي الجو سمح اليله ينعنش رئتك التعبانه دي قومي نشم حبت نسيم ،، طلعته بره حبوبه جابت لينا الصينيه بره اتونس معاي مسافه بس كنت زهجانه ما لي نفس سايرتو لغايه طلع مشي الشغل وانا قعدته بره كنت مضايقه شديد مره ابكي ومره اسكت غمضته عيوني مسااافه جات نشوى سلمت علي و قعدت جنبي قالت لي كيف بقيتي ؟ امس قالو تعبتي وودوك المستشفي بليل دموعي جات جاريه قولته ليها عرس فيني يا نشوى عرس فيني حضنتني عليها قالت لي هو الخسران يا تيسير قولته ليها ما كلف نفسو يكلمني واهلو عارفين وانا زي البهيمه كضبته الناس وصدقتهم ، قالت لي تيسير هو ما راجل علشان يجي يواجهك وخالتك دي انتي عارفاها وعارف طبعه من زمان اي غشوكي واستغفلوكي وحاره ما بقول ليك هينه لكن قلبك ده ياتيسير قلبك ما تحملي فوق طاقتو انتبهي لنفسك وما تفكري غير فيها حاولي اتجاهلي البحصل ده كلو لغايه يجي هنا وكلامك يكون معاه هو شخصيا وفري الزعل ده كلو لبعدين وحاليا ما تفكري في شي علشان لمن يجي هنا ما تضعفي قدامو وما ترجعي بيتهم تاني مالم يجي يعتذر ليك قولته ليها ما عايزه اعتذار عايزه ورقتي ،، سكتت مسافه قالت لي يازوله كولو لخير وافردي وشك الشين ده ما يستاهل العفن واحسن زاتو انو جات منو يعني معاملتو الكعبه الزمان كلها على عرستو دي تبقي ليك سبب لانك تطلقي منو انتي مش اصلا كده كده كنتي كارهاو؟؟! هزيت ليها راسي قالت لي شوفتي كيف ؟ هدا جات منو هو زاااتو وتطلقي زي العجب وتشوفي حياتك ولا تزعلي نفسك في وجودو وفي غيابو تهلكي نفسك؟؟! مالك مال العفن عليك الله فكري في نفسك دي ما تزعلي هاا والله بكره يعوضك ما تختي في بالك وراعي لامك دي من عرستي وهي ما شايفه في عيونك غير الدموع والوجع هي زاته تعبت ويمكن اكتر منك ما تزعليها عليك اكتر من كده تمام؟؟!
