ساره شالت ولدها وشنطتها ومشت بيت ابوها خالد حاول يوفقها لكن ما سمعت منو كانت مضايقه وزعلانه شديد وقفت اقرب ركشه ومشت بيت اهله ،، الصباح حاجه سعديه جات تسال من ساره خالد قال ليها اصرت تمشي اهله علشان ابوها عيان حاجه سعديه قالت ليهو صحي ؟ مالو عندو شنو ؟ خالد قال ليها ملاريا بس تعبتو وبتعرفي ساره حاجه سعديه قالت ليهو ربنا يولي العافيه الامراض كترت الفتره دي خالد قال ليها صاح والله قالت ليهو مالك ما مشيت الشغل اليله ؟ قال ليها اخدته اجازه ارتاح شويه حاجه سعديه قالت ليهو ما تفك الشغل دا المره دي ما كل ما تمسك شغل تتحجج وتفكو القى عليو قوي وصرف منو عيالك خالد قال ليها ان شاءالله ...
...................
خالي اتصل لامي تاني يوم الصباح قالت ليهو اها لقيتهم ؟! قال ليها ما لقيتهم لكن صهيب اكد لي انهم كانو هنا وشافو بعينو وشاف المره معاه امي قالت ليهو انا كنت حاسه ، انا كنت حاسه يا هشام اليصبر لي الكلب بربيهو خالي قال ليها امي جنبك ؟ امي قالت ليهو اي قال ليها ابعدي عنها شويه عايزه اقول ليك شي مهم ...
امي فصلت منو وجاتني في البيت سلمت علي وقعدت تتلفت يمين وشمال قالت لي وين خالتك ؟ قولته ليها قاعده جوه بتحضر في tv مشت عليها قالت ليها مفيده دايراك في كلام مهم خالتي مفيده قالت ليها سمح سلمي واقعدي قولي كلامك مستعجلع على شنو ؟ امي قالت ليها مفيده سؤال ورد غطاهو ولدك عمر وين ؟! خالتي قالت ليها كان مسافر امي قالت ليها ووين هسي ؟ خالتي قالت ليها جاي بشارع امي قالت ليها وسافر وين المره دي ان شاءالله بس ما يكون سقط لي على حته تانيه طيره عجمي خالتي قالت ليها معزه مالك جاياني وفايره فيني قولته ليك سافر لشغل كتر الكلام لزومو شنو ولو ما مصدقه ديك بتك واقفه قدامك اساليها يابت راجلك مشى وين ؟ امي قالت ليها يعني انتي ما عارفه ولدك كان في الجزيره ؟ خالتي قالت ليها شنو ؟؟ جزيره شنو دي البمشي ليها ؟ امي قالت ليها مشى لمرتو التانيه جات ترجعو ودافعه ليهو التكاليف كاامله مكمله من طقق للسلام عليكم واقنعيني يا مفيده انك ما عارفه خالتي مفيده قالت ليها الاتهام ما حبابو والجاب ليك الكلام دا قوال وفتان انا ولدي مشى يفتش شغل ومشى الخرطوم ما مشى اي جزيره وما لاقى اي مره وقصدك شنو بمتكفله بيهو ؟؟ قصدك ولدي ما راجل وبتصرف عليهو مرتو ااه ؟ بتلمحي لي بالكلامك مالك ما تديني ليهو في وشي انا مستحمله اتهماتكم لولدي طول السنين الفاتت كلها لكن كدا كتير وقعدت تبكي ..
امي قالت ليها اسمعي يا مفيده دموع التماسيح ديل تسويهن للناس البرا ما لي انا انتي عارفه ان المره جات ومشيت الجزيره امس وقابلتيها وانكري الكلام دا خالتي مفيده وقفت على حيله قالت ليها نعم ؟؟ قولتي شنو يا معزه ؟؟ انا عارفه ؟؟ امي قالت ليها ااي عارفه عارفه كل حاجه من اللحظه الوصلت فيها السودان ومشيتي انتي وبتك نجلاء ولاقيتوها امس القريبه دي في بيت ولد حماكي وبالدليل شافك هشام بعينو وانتي طالعه من البيت امس وقعدتي واتكلمتي معاها صاح ولا ما صاح ؟؟ ولا هشام اخوي بكضب ؟؟ خالتي مفيده قالت ليها هشاام ؟؟ امي قالت ليها اي هشام يا مفيده نحنا عارفين من يوم الخميس وهشام سافر امس يتحقق لينا وشافك بعينو وانتي طالعه من البيت بالاماره وداكم وجابكم ولدك احمد صاح ؟؟ عمي الامين قال ليها بنهره مفيده الكلام البتقولو معزه دا صاح ؟ مشيتي قابلتيها ؟ خالتي مفيده اتوترت شديد قالت ليهو بصوت راجف اي مشيت ، مشيت اقوليها تطلع من حياتنا ومن حياة ولدي الخربته قولته اتفاهم معاها وتبعد عن ولدي وعن حياتو مشيت بنيه صافيه اخت حد للمشكله دي ومن حقي اني ادخل عمي الامين قال ليها مشيتي ليها وانتي مستغفلاني ؟؟ مشيتي وغشيتني بحجه انك ماشه تتعالجي ؟؟ بتكضبي علي انا يا مفيده ؟ عامليني طرطور انتي ولدك ؟ خالتي مفيده قالت ليهو الامين انا لو كلمتك انت ما كنت حاتخليني امشي علشان كدا ما وريتك عمي الامين قال ليها وهسي رافض مشيتك ليها وما راضي وهسي الموقف مزعلني ومهما حصل ما بحق ليكي تمشي بوراي على مكان انتي عارفه كويس اني ما بقبل اي واحد فيكم يمشي ليهو خالتي مفيده قالت ليهو الامين انا دسيت منك علشان خايفه على زعلك وفي نفس الوقت كان لازم المره دي يتخت ليها حد عمي الامين قال ليها وهدا عرفته وزعلتي اكبر وما المره اللازم يتخت ليها حد ولدك هو المفروض يتختى ليهو حد يا مفيده ولدك هو الجاري وراها جبناهو هنا غصب وقولته يمكن يعقل ولقيتو ولا مره ولا مرتين بتكلم معاها بالتلفون خالتي مفيده قالت ليهو غصب والله مجبور لو ما رد ليها هتعمل مشاكل عمي الامين قال ليها البتكلم معاك مجامله واضح من البتكلم معاك والضحكه لضرسو الاخير يا مفيده وطلع زهجاان من البيت ،،،
خالتي مفيده قالت لامي عجبك يا معزه؟! عجبك المشكله العملتيها لي دي ؟؟ امي قالت ليها انا ما عملته شي انتي العملتي كدا في روحك ما تحاسبيني على اغلاطك وكفايه عليك كدا اليله بكره قريب وتشوفي انتي ولدك عاينته لخالتي مساااافه وما فتحته خشمي معاها امي جرتني من يدي قالت لي تقعدي في البيت هنا ومن بيتك ما تطلعي لغايه نشوف صرفه للموضوع دا انتي المره الاولى وده بيتك لو في واحده هتتطلق ياها التانيه وخلي نشوف نهايه الموضوع دا شنو وانتبهي لنفسك انا ماشه هزيت ليها راسي من سكات امي طلعت بجاي جاتنا جاراتنا اصلا اضانه خاتاها في في الباب اقلا شي تجي جاريه قالت لينا مالكم من الصباح جايطين خالتي مفيده قالت ليها مافي حاجه قالت ليها شايفه اختك طلعت من البيت زهجانه وقبليها الامين راجلك مالكم يالله ان شالله خير ؟ خالتي مفيده قالت ليها مشاكل عائليه ما بخصك قالت ليها عائليه قولتي لي "ولوت خشمه " عائليتكم دي الناس كلها عرفته بسبب ولدك ووش النحس المعرسه دي ياكافي البلا الولد دا من عرس لا ضاق معاهم طعم الراحه ولا جابت من جنى نفعو خالتي مفيده طوالي مالت ليها قالت ليها نسوي شنو غطي قدحك غطي قدخك بعد قفلت منو بقول النسوان نوعين مره تجيب ليك الخير ومره تشيلو والله ما وقع فينا الا البلاء وبقت تعاين لي من فوق لتحت دموعي جات جاريه خشيت جوه منهم جاتني هاله قالت لي يابت ما تشتغلي بيهم انتي عارفاهم الاتنين لسانهم قدر الزلط ما تزعلي نفسك بكيت كدااا بعد الله حيلي مات ..
بليل جا عمر خاشي صحاني من نومي قال لي جعان قومي ختي لي اكل قولته ليهو ما قايمه امشي خت براك جدع فيني المخده قال لي بنهره اخلاقي في مناخيري اسمعي الكلام علشان ما تصبحي في المستشفى قولته ليهو واخلاقك جايه مناخيرك ليه ؟ قعادك معاها ما عجبك ؟؟ مسكني من شعري وقومني قال لي لسانك دا بقصو ليك يوم بقول ليك قومي ختي الاكل تقومي وانتي ساكته قولته ليك اقعي النار تقعي فاهمه ؟ قولته ليهو انا ما خدامه عندك علشان تعاملني كدا لوى لي يدي قال لي خدامه وغصبا عنك وقومي يلا لزاني بعد وصلته الباب قعدته ابكي جبته لي الاكل ودموعي في خدي ختيتو لي في التربيزه قال لي قاعده بتعملي في شنو ؟ عايز شاي قومي سوي مشيت سويتو جيت ختيتو ليو قال لي سنه عشان تعملي سنه ولزه لي صينيه الاكل بيدو قال لي شليها من قدامي شلتها رجعتها المطبخ تاني جيت شيلني صينينه الشاي مشيت وجيت لقيتو نام حلفته ما انوم جنبو مشيت نمته في الكرسي كان جاي على بالي اقوم اخنقو واقتلو وارتاح كرهتو وكرهته اليوم اللماني معاو،،
شلته اليل كلو بكاء صبحتني خالتي مفيده بكواريك وشكل قالت لي لمن اكلتو ما تغسلي الصحانا خالاهم للصباح مالك؟ قولته ليها الوقت كان متاخر وكنت تعبانه هسي بغسلهم قالت لي تغسليهم بعد شنو تاني اااه ؟؟ ولزتني بيدها ،، ما اشتغلته بيها مشيت غسلته العده وعملته الفطور جاتني مكالمه من نشوى كان صوته تعبان قالت عندها نزله اتونست معاي شويه وفصلت عمي الامين جا لقاني بورق في خضره قولته ليهو انت لسه ما مشيت الشغل قال لي ما مشيت والله جسمي تعبان حبه عايز اخد راحه قولته ليهو سلامتك مالك عندك شنو ؟؟ قال لي حبه فتور بس قولته ليهو الفتره الفاتت كنت ارهقته نفسك زياده في الشغل وضغطته نفسك شديد اقوم اعمل ليك نعناع يريحك حبه قال لي اقعدي اقعدي انا ما داير نعناع هسي اقعدي داير اتكلم معاك قولته ليهو خير سامعاك قال لي خير ان شاءالله بنسبه للحصل من خالتك امس فدايرك ما تزعلي نفسك عمر واحد طايش وانتي مرتو على سنه والله ورسولو والعرسه قدام الناس دي كلها وديك نحنا زاتنا ما عارفين عرسهم دا كيف وبعرسو ساي من غير ولايا انا اتكلمته امس مع عمر في الموضوع دا قال انو قابله علشان هي هددتو انو لو هتجي البيت هنا وانتي عارفه كتر المشاكل الممكن تجيبه فعلشان كدا هو مشى ليها علشان يقصر الشر بس ما اكتر وقال اتكلم معاها وفهمه انو داير يطلقه وهي هسي خلاص بعد راجعه ده لو ما كان رجعت قولته ليهو وهي بالسهوله دي وافقت ؟؟ قال لي والله وافقت كيف دي تاني ما مهمه المهم انو حاتمشي وتبعد عننا بخيره قبل شرها وتختفي من حياتنا رسمي انا عارف الاوضاع الايام دي ما كويسه ما بينك وبين عمر لكن شيلي الصبر وكل شي حا يبقى كويس هزيت ليهو راسي قولته ليهو ان شاءالله عمر بقا بجي بليل بس وطول النهار ما بشوفو حتى لمن يجي بنوم دغري ...
مره اسبوع من الكلام دا و عمر قال مسافر الخرطوم وجاي راجع عمي الامين قال ليهو ومسافر لنشو المره دي ان شاءالله ؟؟ عمر قال ليهو عندي اوراق المفروض اخلصه عمي الامين قال ليهو اوراق شنو دي العندك ؟ عمر قال ليهو اوراق يا ابوي بتخص فتره قعادي هنا واوراق المره انت عارف انها جات عمي الامين قال ليهو وهتقعد كم يوم ؟ عمر قال ليهو يومين تلاته ما اكتر عمي الامين قال ليهو كويس انا حا اجي معاك ونخلص الاوراق دي سوا عمر قال ليهو انا شافع يا ابوي عشان تجي معاي ؟ مافي داعي تجي انا بخلص كل حاجه وبجي عايز اهرب مثلا عمي الامين قال ليهو والله يا ولدي بعد كل الكضب الكضبتو علينا بقيت ما قادر اصدق اي كلمه بتقوله خالتي ادخلت قالت ليهو اجي يا راجل دا كلام شنو دا ولدك ؟ ولدك راجل تقول ليهو امشي معا لالا الكلام دا ما بجي عمي الامين قال ليها مفيده انا لو ولدي راجل ما كان نسى اهلو ومشى عرس في مرتو الما تم معاها شهرين ولا لمن جابو ليهو خبر مرضي استخسر فيني قولت " الو " انا ما ربيت رجال اعتمد عليهم وفوق ما انو ما راجل كضاب كمان ،، كلام عمي الامين بسطني شديد وفشى غلي
خالتي قالت ليهو عيب البتقولو دا ياللمين عيب ولدك طول وعرض ومهما عمل هو ولدك عمي الامين قال ليها مع الاسف ولدي ودي الحاجه الوحيد الانا ندمان عليها عمر قال ليهو ندمان علي انا ؟ انا يا ابوي ؟ الله يسامحك وطلع بعد عمر مرق خالتي مفيده قعدت تحنس فيهو انو يخلي يسافر براهو عمي الامين ايدا ما اقتنع ليها وطلع مشى الجامع قعد تعاين لي عينين عينين قالت لي كلو منك انتي انا متاكده انك مليتي للامين راسو قولته ليها انا ما مليت لزول راسو حمرت لي ومشت ،، في وقفتي جات نجلاء داخله عاينته ليها من فوق لتحت ومشيت منها لحقتني قالت لي والله وبالله يا تيسير امي ساقتني غصب ما رديت ليها قعدت تبكي قالت لي انا كنت جايه اكلمك لكن امك سبقتني والله العظيم دا امي جاتني الصباح ومن غير مقدمات ساقتني معاها حتى محمد راجلي كلمتو هي واتفاهمت معاو في الباب قولته ليها انتي وامك كنتو بتخططو ليكم ايام ما تجي ترمي لي دموع التماسيح دي قالت لي يمين بالله خططت براها وانا ما عرفته الا لمن وصلته هناك قولته ليها كذبك كتر شديد يا نجلاء ما بقدر اصدقك قالت لي علشان اوريك بياض نيتي انا جايبه ليك كلام عنها قولته ليها نجلاء من فضلك ابعدي عني قالت لي كانت قاعده هنا في كوستي التلاته ايام الفاتو قولته ليها كيف قاعده هنا ؟؟ قالت لي ارح العريشه بيغادي و بحكي ليك عشان امي ما تسمع قولته ليها والضمني شنو الضمني شنو انك صادقه ؟ قالت لي تعالي معاي ما خسرانه حاجه وانا بحكي ليك الحصل كلو في حاجات مهم شديد انك تعرفيها .... ....
.......
#محبات💙💙💙
