خالي هشام قال ليها موقف عمر اقوى من تيسير والقضيه لغايه اللحظه ماشه لصالحو امي قالت ليهو والعمل ؟؟ خالي هشام قال ليها العمل انو تيسير تتحسن عشان تقدر تدافع عن نفسها مهما انا دافعته عنها ما زيها هي وعايزه اطلقه منو باسسرع وقت بس تشد حياله معاي عايزه اعرضه على طبيب نفسي بس لو قدرته اقنعه لازم تمشي ليهو عشان لو فضلت على الحاله دي حانتحر تاني امي قالت ليهو تف من خشمك يا هشام خالي قال ليها انا اكيد ما متمنى كدا بس تصرفاته بتوحي بالخيار دا انا هسي طالع الشغل اعملي حسابك وخلي بالك منها وحاولي خشي اتونسي معاها يمكن تطلع شويه من الحاله الهي فيها دي امي قالت ليهو لي تلاته اسابيع بتونس معاها وهي ساكته الطاء دي ماب تنطقه خالي هشام قال ليها معليش حاولي كمان مره انا حاغشى طبيب نفسي استشيرو وان شاءالله نلقى حل نطلعه بيهو من الحاله دي امي قالت ليهو امين انت امشي على شغلك انت ما تتاخر والله بعدله امي اتصلت لي قالت جايه انا طمنتها انو مافي شي وقاعدين ساي نغير جو لو اتصلت ليك قول ليها نفس الكلام خالي قال ليها تمام محتاجه شي ؟ امي قالت ليهو سلامتك بس وغشى الصيدليه جيب لي دانه لبن عشان حقها خلص خالي شال دانه قال ليها اميرتي الحلوة دندووون وباسه شنو يا قلبي ما عايزه من بابا هشام شي ؟؟ عسل دا ياااخ ♡ رفعه فوق وشاغله شويه واداها لامي وطالع ..
عاينته للاكل وقبلته الجهه التانيه منو مر الوقت بطيء اغلبيه الوقت قضيتو نايمه الاذان دا كاني ما سامعها امي جات اتونست واتكلمت مع نفسها ومشت خالي المساء جاء راجع من الشغل كان شايل معاهو كيس سال امي قال ليها اها اكلت ؟؟ امي قالت ليهو قدر ما حاولته معاها ابت هز ليها راسو بحسره وجاني داخل كنت قاعده جنب الشباك في الارض جاء قعد جنبي وختى يدو وراي قال لي بتعايني للنجوم ؟ حلوه النجوم بس ما هنا ما حتشوفي مع الانوار دي كلها سكته منو قرب مني اكتر وختى لي الكيس في كرعيني قال لي منفسك تشوفي فيهو شنو ؟؟سكته ما رديت ليهو قال ليطيب حا افتحو انا شوفي طلع منو انبوكس ظريف كدا قال لي افتحي عاينته ليهو واتلفته الجهه التانيه قال لي بعرف ما عندي خاطر عندك بس لو سمحتي افتحي بس ارفعي الغطاء عاينته ليهو مساااافه وفتحتو باطراف اصابعي كان فيهو اوراق ملونه و ورق وsnowball واقلام والوان قال لي بدل تقعدي طول الوقت في الغرفه دي اوراق مرري بيها الزمن بعرف بكون تقيل وثقيل شال الاسنوبول وشغله طلعت مسيقى هاديه وحلوة قال لي من زمان نفسك فيها صااح هزيت ليهو راسي فرح شديد لمن اتجاوبته معاهو قال لي يعني قبلتي هديتي ؟؟ هزيت ليهو راسي اي قعد معاي شويه كان بحكي لي تفاصيل يومو وانا ما برد ليهو يعني مانو بتكلم مع نفسو استاذن مني وطلع برا عاينته للانبوكس مساااافه وخليتو في مكانو و مشيت نومته ،، تاني يوم جيت ماره لقيتو قاعد في محلو شلته الاوراق ووقعدته ارسم واشخبط دواير وحاجات ما مفهومه فضلته على الحال دا اسبوع كامل بشخبط لقيت روحي بحس براحه ومتعه خالي هشام جاني يوم الجمعه بعد الصلاه اتونس معاي كالعاده قال لي تيسير رفعته راسي قال لي انا عايزك تسمعيني ممكن ؟؟ هزيت ليهو راسي قال لي انا عارف انك بتمري بوقت عصيب وحتى المريتو بيهو ولسه بتمري بيهو ما هين وحار واتظلمتي كتير وكارهاها كل شي بس انك تقعدي في دور الضحيه المده دي كلها دا في زاتو كانك بتهلكي روحك شوفي امك طول الوقت بتبكي وقلبه واجعه عليك لازم تطلعي من الحاله الانتي فيها دي وانا جنبك حا نطلع منها سوا وبوعدك اخلصك من عمر دا قولته ليهو وبتو؟؟ سكت مساااافه و قال لي اذا ما عايزاها كمان بنتخلص منها عرفناها متين نحنا من تلاته شهور ؟؟ قولته ليهو بس انا عايزه اموت انا ما عايزه اعيش قال لي بعد تموتي امك حا يحصل فيها شنو؟؟ انتي عارفه امك قدر شنو متعلقه بيك قولته ليهو امي حاترتاح اذا انا موته قال لي ابدا ما صاح امك مرت بتجربه اقسي من تجربتك دي بس طلعت بيك انتي وصدقيني الحب البتحبك ليهو اذا انتي حصل ليك حاجه كفيل بانو يخليها تموت وتلحقكك انتي لازم تبيني لعمر انك قويه عشان تهزي ثقتو في نفسو لازم تقوي عشان تنتصري عليهو وعلي نفسك قبل اي شي لسه الدنيا قدامك بس اذا فضلتي على الحاله دي انتي الوحيده الحاتكوني خسرانه عمر حا يكمل حياتو عادي وحيكون مبسوط شديد كمان وما حاتقدري تاخدي منو لا حق ولا باطل وبتك بنربيها نحنا زي ما ربيناك وامك غالبا حا تموت بحسرته عليكي وانا حا ازعل عليك كم شهر وبعدها حا تابع حياتي عادي قولته ليهو بس كم شهر ؟؟ قال لي طبعا دي حياه يعني امي وابوي بعد عمر طوويل حا يموتو بس اكيد انا ما حاقتل نفسي وراهم وحاكمل لانو دي سنه الحياه كدا بنخسر ناس وارواح بس بنكمل لغايه ما يجي دورنا الحياه مليانه مباهج والله قدر ما الله اخد منك بعوضك بشي اكبر بس عارفه دا بحصل متين ؟؟ لمن الله يختك في اختبار ذي الماره بيهو انتي دا وتثبتي ليهو انك قويه وانك قدر الاختبار دا اي شي نحنا البنختارو نحنا بنختار اذا عايزين نكون من الفايزين ولا الخسرانين نحنا البنحدد اذا بنستاهل عوض ربنا ولالا وكمان نحنا البنحدد حياتنا تكون كيف صااح بنبتلى باوقات عصيبه بس انو نتجاوزه ونقوى او نقعد نبكي ونتحسر ونندم على حظنا دا كلو خيار برجع لينا نحنا بالمختصر المفيد الحياه خيارات فاي شي فيها نحنا مخيرين ما مسيرين الابتلاء مندما بيدنا بس نتجاوزو ولاالا دا خيار و القوه والضعف خيار كل شي خيار و انا حا اخليكي تقعدي مع نفسك ، وقبل اما اسيبك وامشي انا عايزه اقول ليك حاحه خليها حلقه في اضانك اكعب حاجه في الدنيا انك انت التظلم نفسك والندم والحسره الاا تحتمل حسرتك على نفسك وندمك انك انت الوصلتها للهي فيهو بخياراتك الضعيفه ولجوئك للخيار الساهل وومع الاسف النوع دا من الندم في بعض الاحيان بنتعاقب عليهو عند ربنا هناك الاحساس دا مخزي شديد وفي الدرج دا انا ختيت ليك سكين اذا حابه تاخدي الخيار الاسهل اللهو الانتحار ذي ما حاولتي المره الفاتت فاحرص انو المره دي محاولتك تنجح وابدا ما حانقذك وحا احترم قرارك جد و... اذا حابه تكوني شجاعه وتواجهي كل البمر بيك فانا في الغرفه هناك القرار قرارك انا طالع ، طلع وتنى الباب شويه ودخل راسو قال لي حاقفل الباب ما تنسي السكين في الدرج التاني وسنينه شديد يعني الزط بالتاااخ ما تحسي بالوجع زاتو وغمز لي عينو وقفل الباب ،، كنت متفاجئه شديد من كلام خالي معاي خصوصي انو خاتي لي سكين ..؟؟ البعرفو انز خالي هشام كان ما برضي فيني اتخدش بشوكه ناهيك عن انو يخت لي سكين ويقول لي موتي فضلته طووول الوقت افكر في كلامو لغايه اليل دخل كان اول مره من شهر اخت رجلي برا الغرفه اخدته قراري ومشيت دقيت ليهو الباب نور غرفتو كان منور فتحته الباب خشيت كان ماسك ملف قضيه في يدو عاين لي مسااافه وابتسم قال لي خير في شي ؟ قولته ليهو بتوتر انا ما ضعيفه وما حاسمح لعمر انو يخليني اخسر حياتي كلها بس عشان في يوم انا اخترته غلط عرك عيونو قال لي انا كنت واثق انو بتي ابداا ما ضعيفه تعالي لي فتح لي يدينو مشيت حضتنو شديد وقعدته ابكي قال لي خليكي دايما فاكره انك بتستاهلي الافضل والاحسن بتستاهلي تعيشي حياتك بالفيها الله خلقنا عشان ناخطى ونتجاوز ما عشان ننتحر لمن تضيق بينا واول خطوه لازم نعمله عشان نبدا صاح حانمشي دكتور نفسي نتابع معاهو عشان تحبي بتك قولته ليهو هي ما بتي قال لي ما علي نمشي نشوفو ولا ناويه تكسري خاطري تاني ؟؟ هزيت ليهو راسي قولته ليهو انا اسفه قال لي ابدا ما مشكله بس انتي متاكده انك قدر القرار دا ولا حانتراجع تاني ؟ قولته ليهو قدرها قال لي تمام امشي نومي واصباح رباح نخت خططنا سوا اوكيهه ؟؟ هزيت ليهو راسي مشيت دخلته غرفتي كان امي نايمه جيت نومته جنبها حسيت بي حضتني عليها ،، تاني يوم طلعته شربته معاهم الشاي امي اتفاجئت شديد لمن شافتني بشرب في الشاي معاهم خالي اشر ليها انو ما تعلق سكتت بس طول الوقت كانت بتعاين لي بابتسامه خالي قبل يطلع اخده على جنبي واتكلم معاها خلى ليها قروش الفطور وطلع ..
امي بعد الفطور قعدت اتونست معاي شويه قالت لي ارح ننزل السوق نتبضع نشوف الحاجات العندهم قولته ليها ما لي نفس خلي يوم تاني قالت لي طيب جاته مكالمه قالت لي هاك دي نشوى بتتصل كل يوم وما قدرته اديك ليها عشان كنتي رافضه انك تتكلمي مع زول هاك ليها ما تخجليها شلته التلفون رغم اني ما كنت حابه اتكلم اول ما رديت قعدت تبكي قالت لي اشتقته ليك شديد ودا شنو البتعملي في نفسك دا كدا برضو ما تتكلمي معاي يخسي عليكي اريتني جنبك فضلته اراضي فيها وفضلت تلوم مره ومره تتونس وتضحك معاي بعد جات تفصل قالت لي ما بتتخيلي فرحته بسماع صوتك كيف قولته ليها ما اتحرم منك قالت لي ولا منك يارب يلا عندي الدكتوره جاء لبعدين بضرب ليك وافتحي تلفونك قولته ليها ما بقدر افتحو بس اتصلي لي هنا قالت لي ليه ؟؟ قولته ليها دي اومر خالي هشام قالت لي تمام يازوله ما مشكله بتصل ليك بتلفون امك بس في تلفونك كان حايكون اريح وكذا قولته ليها معليش لغايه اتحسن قالت لي اهم شي ترجعي لي تيسير الزمان والنبي يا تيسير في اي وقت اتصل لي فضفضي لي ما تكتمي ارجعي لي قولته ليها حاضر وامشي محاضرتك هسي قالت لي تمام لبعدين ،،
