المساء جا امي وحبوبه قعدو يبكو معاي حبوبه قالت لي حاشتاق ليك شديد جدي قال ليهم يا جماعه هدا البيت العشره التانيه ليكم بطلن حركات النسوان دي وخلن البت تمشي على بيتها بعد المشكله اتحلته ودعتهم امي وحبوبه وقفو في الباب ونحنا مشينا ...
بعد وصلنا تسنيم احمد فرحو شديد اول ما شافنو جو سلمو علي خالتي مفيده قالت لي اخيرا اقتنعتي نورتي مدت لي رسين اصابعه قعدته في الكرسي خالتي مفيده قالت لي الوقت اتاخر قومي كملي قعادك في بيتك عمر بكون تعبان ومحتاجك هممم وربتت على كتفي ك عمر كان شايل الشنط خالتي مفيده قالت ليهو تقال ما تشيلهم انت جاي من غربه تهد حيلك احمد تعال شيل الشنطه دي وصله جوه وانتي واشرت لي شيلي التانيه لزانها ما بقتلك كرهتها شديد اللحظه ديك مشيت خشيت جوه الغرفه طبعا نحنا ما عندنا بيت عندنا غرفه بس عمر قال ما عندو القدره البتخلي يشتري بيت واتحجج لي بكذه حجه وصدقتو مع الاسف وسكنا مع اهلو
لمن دخلنا عمر قال لاحمد ما بتقصر ياللخو وطلع لي 50 ج ختاها لي في جيبو قال ليهو مشوار الجامعه احمد مشى عمر قفل الباب الساعه كانت 11 وقته خشيت الحمام غيرته ملابسي لبسته لي جلباب جيت لقيتو واقف في التسريحه بزبط في شعرو قعدته في طرف السرير عايزه ارفع رجليني انوم جا قعد جنبي قال لي عارفه اني اشتقته ليك ومرر يدو في خدي قولته ليها عارف اني نعسانه شديد تصبح على خير قال لي شكلك لسه زعلانه مني وما ناويه تنسي قولته ليهو الانت سويتو بتنسي اصلا ؟! قال لي انا عارف غلطه في حقكك واعتذرته ليك قدام الكل ما تبقي قاسيه خلينا نرجع زي ما كنا انا فاقدك شديد زحيتو يدو من كتفي قولته ليهو وانا قرفاناك شديد جدعته ليهو المخده قولته ليهو شوفي ليك حته نوم فيها و جريت المرايه ونمته استمرينا شهر بالحاله دي كل ما يجي يقرب مني ابعدو ،،
الساعه 6 صباحا صحاني صوت الغرفه بدق صحيت مشيت فتحتو لقيته خالتي مفيده قالت لي انتي صدقتي انك عروس ولا شنو؟! قومي خشي المطبخ جهزي الشاي الناس عندها مشاغل ما فارغه زيك استغربته في معاملة خالتي لي ، خشيت الحمام اتوضيت جيت صليت الصبح وطلعته خشيت المطبخ عملته الشاي وطلعته البسكويت ختيتو في جردل طالعه من المطبخ خالتي مفيده قالت لي سويتي الشاي قولته ليها اي قالت لي ابدي نضفي البيت قولته ليها كويس البت تجي تساعدني علشان كلو ما بقدر عليهو كبير قالت لي مافي بت حتجي تساعدك في النضافه انا اديته اجازه طويله علشان الولاده وما بلقى لي بت بدله بسهوله فمن اليله وطالع النضافه والغسيل والمكوى ومهام الشغاله كلها هتقومي ليها انتي بدله قولته ليها ايوا الله يخلها بالسلامه معناها هنتقاسم الشغل انا وهاله " مرت ولدهم" قالت لي لا هاله ما هتعمل شي انتي الهتقومي بكل الشغل قولته ليها البيت كبير شديد انا الاجهاد ما كويس عشاني قالت لي شنو هو اللي الماكويس علشانك انتي اي حاجه ما كويسه علشانك ما القى وسخه حايمه فاهمه ولالا؟! والدلع البدلعهو ليك حبوبتك وامك وجدك هنا ما عندي فاهمه ياالماعرفين لابوكي مكان ؟! قولته ليها مالك قلبتي علي كدا انتي ؟! قالت لي مش خليتي ولدي يعتذر قدام الرجال كولهم ؟! انا بوريك ضربيت اعتذارو ده
فضلته مستغربه في خالتي مفيده شديد عمي الامين مستحيل يحكي ليها اكيد ده عمر زاتو ..
بعد الضهر جمعت النسوان للجبنه اكتر من 10 نسوان وكل شويه تناديني جيبي داك وافعلي وسوي حتى لووكانت حاجات خفيفه هاله جات قالت لي تيسير انتي بتعملي شنو الاجهاد ما كويس علشانك شوفي نفسك كيف قايم ونضفتي البيت كلو ليه ؟! قولته ليها رشا اخدت اجازه قالت لي ولو كنتي تكلميني البيت كبير ما بتقدري عليهو براك انا قاعده وتسنيم قاعده جيبي جيبي امشي ارتاحي قولته ليها شكرا قالت لي خشي ارتاحي بلا شكرا معاك ...
مشيت اطبحته وغرقته في النوم من غير ما اشعر جات خالتي مفيده لزت الباب بقوه قالت لي قومي تقوم قيامتك صحيت مخلوعه بعد نفسي قام قولته ليها في شنو قالت لي انتي سايبه الواطه جايطه وجايه تنومي قولته ليها خلعتني يا خالتي لا اله الا الله انا خليت هاله بضاير قالت لي انا كلمتك انتي ما تقولي لي هاله ولا بتاع قومي قومته جات هاله قالت ليها خالتي مفيده واطات شنو الجايطه البيت كلو مرتب وللعده غسلته تنسيم قالت ليها وتغسله تنسيم لشنو وتيسير قاعده هاله قالت ليها فيها شنو كان غسلتها يعني ؟ خالتي قالت ليها الغدا مافي زول سواها قومي يا تيسير فزي سوي الغدا هاله قالت ليها غدا من 12 خالتي قالت ليها هاله ما تجادليني كتير قولته تعملو هسي يعني تعملو هسي قولته ليها طيب اهدي بقوم بسوي قالت لي ما تقولي لي اهدي قومي يلا ،، مشيت دخلته المطبخ بقطع في البصل جات هاله بتساعدني قالت لي خالتك دي على طبيعته من جيتي تعامله معاك اتغير قولته ليها زعلانه علشان ولده اعتذر لي قدام الرجال قالت لي هو السوا فيك هين لكن اعتذارو زاتو بسيط في حقكك ...
