كلام خالتي عن علاقات عمر بالنسوان وقع زي الصاقعه علي يعني هو مش عرس علي هو خاين وبتكلم مع اكتر من بت ؟؟ طول الوقت دا كلو كنت غبيه ؟؟ اي انا عارفاهو انو نسونجي لكن اتوقعته انو بعد العرس خلاص بقيت انا بس وفعلا كان مبين لي كدا وكيف ولا لحظه ما شكيت فيهو ؟؟ معقوله انا بالهباله دي ؟؟ قاطعتهم قولته ليهو انت كنت بتتكلم مع بنات حتى وانت معرسني؟؟ انت مش قولته لي انو علاقاتك معاهم كان تمضيه وقت وخلصت بمجرد زواجنا ؟؟ بتكذب علي الوقت دا كلو ؟؟ وعادي عندك ضميرك مرتاح ؟؟ عمر قال لي بتوتر الكلام دا قبل العرس ما بعدو امي دي بتقول اي كلام ما تصدقيها شافتني واقف مع زينب جارتنا فكرتنا بنحب بعض قولته ليهو زينب ياته ؟؟ زينب عصام بت جيرانا اللصق ؟؟ مصاحب علي زينب كمااان ؟؟ انت شنو انت ما بتزهج ما بتتعب؟؟ الوقت دا كلو مستغفلني ومعيشيني في وهم وانك بتحبني وما شايف غيري وانت كل يوم بتتكلم مع واحده جديده ؟؟ قال لي بتكلم بس ما بعمل معاها شي تمضيه وقت ليس الا بس كلام قولته ليهو يعني انت معترف انك كنت بتخوني الوقت دا كلو قال لي انا ما بخونك انا بس بتسلى ما اكتر قولته ليهو لاااااا واالله بتتتسلى ؟؟ والخيانه دي كيف اذا دا كلوو تسليه بس ؟ الا االقاك معاها في سرير ؟؟ انت شنو انت ما بتخجل ما عندك ضمير ؟؟ ما بتحس ؟؟ دي شنو البجاحه الفيك دي بتقوله لي عينك عينك ولا خجله ولا شكا ؟؟ لسه في شنو انا ما عارفاهو ؟ عندك ولد من واحده ؟؟ وريني عشان ما اتفاجىء خالتي مفيده قالت لي تيسير يا بتي اهدي العصبيه ما كويسه عشانك يا بتي قولته ليها انتي بذااات ما تتكلمي معاي يعني ولدك بخون فيني برضاك انتي ؟؟ قالت لي تيسير يمه كيف يعني برضاي ؟؟ انا والله عرفته بالصدفه وعصرته زينب وخليته تكلمني وقدر ما نصحتو ابا نصحي وخجلانه منك والله العظيم ما بقدر بقول ليك حاجه زي دي وتسوي شنو زاتك وتتصرفي كيف واقوله بياتو وش ؟؟ قولته ليها انتي قول لي ختيها لي طق تيسير عمر دا عارف عليكي نسوان وخليني تاني انا بتصرف بطريقتي لكن ما دسي وتبقي زيو واحد فرقك منو شنو هسي ؟؟ عمر قال لي تيسير اسمعي هنا كل الرجال بعرفو نسوان علي نسوانهم ما تكبري القصه قولته ليك بس اتكلمنا قولته ليهو مافي راجل بعرف على مرتو مره خلي كوم نسوااان البعملو كدا اشباه الرجال الزيك انت دا ،، رفع يدو ضربني كف بعد شفته طشااش قال لي اسمعيك تقوليها تاني عشان اكسر راسك دا قولته ليهو وكدا اثبت لي انك ما فيك ريحه الرجوله حتى خلي الرجوله زاته رفع يدو تاني عايز يضربني خالتي مسكتو قالت ليهو عمر الزم حدك واياك يدك دي تترفع عليها مره تانيه فاهم ؟ قله ادبك تعمله برا هناك مع الاجنبيه المعرسه ما تعمله في بيتي مسكتني قالت لي عمر اطلع برا بيتي اطلع سريع وشيل هدوموك وامشي ما دايره اشوفك هنا تاني وغلطانه هي الصبرت عليك السنين دي كلها واستحملت الما بستحملو زول والبرمي امو وابو وما بسال عليهم ما فيو خير مش داير المشي ؟؟ اتفضل داك الشارع ودرب البودي ما يجيب طالما نحنا هاينن عليك امشي ليها ريتها تبقى ليك ام وابو ومره و سند وقت تقع ترفعك ،، عمر ولا كضب طوالي دخل شال شنطتو الاصلا كان مجهزه ومشى انا قعدته ابكي وخالتي بتبكي وتحاول تسكتني عمي الامين كان ساكت استغربنا في سكتتو خالتي مشت عليهو قالت ليهو الامين الامين مالك يا راجل ؟، بسم الله الامين مالك تيسير عمك مالو كفتناهو وكشحنا في مويه خالتي قعدت تكورك خلاص الامين مات خلاص مات انا جريت جري لجارنا موقف عربيتو برا كلمتو جاء هو ومرتو رفعنا عمي الامين وجرينا بيهو المستشفي انا ما قدرته استحمل التوتر الحاصل جسمي هبط واطرافي خدرت ما قدرته اتماسك وغمرته وعيت لقيت روحي في غرفه جنبي خالتي وامي وحبوبه ونجلاء قولته ليهم انا وين ؟ عمي الامين مات ؟؟؟؟ امي قالت لي اهدي عمك الامين كويس اغمي عليهو بسبب الضغط بس ما اكتر الدكاتره قالو يرتاح اليله وبكره بخرجوه هسي كيف انتي ؟ حاسه روحك احسن ؟؟ قولته ليها حصل لي شنو انا ؟؟ خالتي قالت لي غمرتي وقعتي من طولك امي قالت لخالتي ولدك فات ؟! خالتي هزت ليها راسها بزعل
سكتو مافي زول قال شي خالتي قالت لي امشي البيت ارتاحي هناك وببقى بتصل ليك لو جد شي قولته ليها انا بقعد معاك قالت لي تيسير الله يرضي عليكي اسمعي الكلام ما ناقصين تاني امشي وبينا تلفون امي قالت لي كلام خالتك صاح ونحنا بنقعد هنا معاها البيت افضل ليك من المستشفى كلها وسخ حاكلم خالك يجي يوصلك مشت كلمت خالي فرح جا ساقني وداني بيتو لان بيت خالتي والبيت الكبير فاضي وكلهم في المستشفي لقيت هديل بتعمل في الغدا مدوياهو المستشفى خالي قال ليها خلصتي اشيلو معاي ؟؟ قالت ليهو لالا لسه شويه كدا تعال بعد ساعه قال ليها تمام خلي تيسير دي معاك بيتها فاضي وامي ومعزه في المستشفى مع مفيده مشت جابت لي عصير قالت لي اشربي وارتاحي انا بخلص شغلي وبجي بقعد معاك البيت بيتك اخدي راحتك شربته العصير وعندي حبه بلعتها ختيت يدي في راسي كنت مصدعه شديد فضلته استغفر لغايه نومته من غير احس فتحته عيوني لقيت هديل فاتحه التلفزيون وقاعده في السرير القصادي قولته ليها شكلي نومته وما حسيت الساعه كم ؟ قالت لي فعلا وشكلك تعبانه ومرهقه شديد المغرب صليناهو من شويه صلحته قعدتي قولته ليها معقول نومته الوقت دا كلو ؟؟ اقوم اصلي عمي منو خبر ؟! قالت لي لغايه هسي قال فتح عيونو اتصل لي فرح من شويه قولته ليها الحمدلله لبكرا كدا بخرجو ،،،.
مشيت صليت قولته ليها بعد دا انا امشي قالت لي استنى اكلي ليك شي وخالك يجي يوصلك قولته ليها شكرا مافي داعي ما جعانه وباخد لي ركشه قالت لي مافي ليك طريقه والله انا موصيني عليك وصيه عديييل ولا دايره يطلقوني يعني ولا اكلي ما بعجب قولته ليها ابدا والله ما قصدي بالعكس قالت لي يبقى تقعدي وثواني وبخت الاكل انا ما اكلته زاتي مستنياك تصحي علشان اكل ما بحب اكل براي وما حبيت اصحيك ، جابت الاكل وبعدو بشويه جا خالي مشيت معاه رجعته بيتي لقيت تسنيم يدوي داخله قالت لي كيفك بقيتي احسن ؟! هزيت ليها راسي قولته ليها جا معاك منو ؟!قالت لي جيت براي عشان بكره عندي امتحان امي بايته في المستشفي معاها امك واحمد شويه ويجي قولته ليها ابوك كيف ؟! قالت لي كويس فتح عيونو قولته ليها ما اكل شي ؟!قالت لي في البدايه رفض بس جدي عبدالعال اصر عليهو وحنسو اكل قولته ليها الحمدلله انو اكل كنت شايله همو عشان لما يزعل ما باكل قالت لي ماشه ارتاح شويه واصحى اقرا قولته ليها حابه اعمل ليك شي ؟، قالت لي عندي مغص اذا بتعقدي لي نعناع بكون ممنونه جسمي تعبان ما قادره اقيف قولته ليها ثواني وبكون عندك ، مشيت غيرته ملابسي وجيت عملته ليها النعناع دخلته لقيته نايمه ما حبيت اصحيها جبته كبايه ساخن بارد كبيتو ليها فيها قولته وقت ما صحت تلقاهو حار يدفيها ومشيت منها العشاء اذن صليت وختيت لي احمد العشاء في التلاجه كان لسه ما جاء رسلته ليهو مسج وصفته ليهو مكان العشاء ووصيتو يقفل معاه الانوار ، دخلته غرفتي كنت كارهاها شديد ما قدرته اقعد فيها دقيقه كل مكان بذكرني بمعاملتو الكعبه والحقيقه العرفتها عن خيانتو لي مع الف واحده بدل واحده دخلته غرفه تسنيم كانت لسه نايمه رقدته في السرير التاني ما كنت نعسانه اليل كلو شلتو بفكر راسي كان هيطق من الصداع اتلفته لقيت تسنيم بتقرا قالت لي ازعجتك بالنور ؟! قولته ليها ابدا اصلا ما نمته انا بس مصدعه حاقوم افتش لي حبه قالت لي عندي في الشنطه دقيقه اطلعه ليك فتحته شنطته قالت لي باخده معاي طوالي عشان بصدع كتير ، شلتها منها بلعته ومسكته تلفوني وهي استمرت في القرايه للصباح ما نامت ، لقيت هاله عملت الشاي قولته ليها جيتي متين انتي ؟! قالت لي جيت بليل جابني احمد اصبحتي كيف ؟ قولته ليها الحمدلله كنتي في المستشفى انتي ؟ قالت لي اي انا بعد مشيت اهلي اتصلت لي تسنيم فصلته منها وكلمته امي ومشينا المستشفى ولما وصلنا كنتي مافي الكلام دا العصر قالو تعبتي ورجعتي البيت قولته ليها فعلا غمرته بتعرفي ما بتحمل الضغوطات قالت لي اقعدي عايزاك في كلمتين قولته ليها احكي قالت لي عمتي مفيده حكت لي الحصل امس انا عارفه ان في الفتره الاخيره الدنيا جات عليك كتير وبعرف انك حاسه بالوحده في البيت دا وانا كمان زيك بس في حال احتجتي لي شي او حبيتي تفضفضي عايزه اقوليك انا هنا ودايما هكون معاك انا حاسه بيك عشان ابوي متوفي وفاقده السند زيك يمكن نحنا سلفات وما بنتكلم كتير بس انا عندي اخوات بس بعاد عني وما كتير بنتكلم سوا فابفهم احساس الوحده دا كويس حبيت اقوليك ان ممكن تعتبريني اختك وانا هنا كل ما احتجتي قولته ليها طبعا انتي اختي شكرا هاله هزت راسه وابتسمت لي خفيف ورفعته كبايه الشاي ،،
اليوم مرا كئيب وممل والمساء خرجوا عمي الامين من المستشفى وجابو البيت الضيوف داخلين وطالعين من البيت واستمر الحال دا تلاته ايام ،
الباب دقا مشيت فتحتو لقيت جدي عبدالعال دخل سلم على ناس البيت وشاف عمي الامين قال لينا معزومين معانا غدا في البيت الكبير هناك قولته ليهو خير في شي ؟ قال لي مرت خالك فرح حامل وحبينا نكرم ليها عارفين هي طولته في الموال دا فرحته شديد قولته ليهو ما شاءالله جد الف مبروك قال لي الله يبارك فيك ربت على رجل عمي الامين قال ليهو شد حيلك وتعال بارك ليهم عارف فرح بريدك قدر شنو عمي الامين قال ليهو الفرحه فرحتنا ان شاءالله بعد صلاه العصر بكون معاكم ، مشينا الكرامه و ما كنا عاملين عزومه كبيره بس اهلنا القريبين مننا والجيران القراب وزعنا ليهم لحمه جدي ضبح خروفين واحده لينا والتاني وزعو اتصل لينا خالي اتكلم معانا فديو كان زعلان شديد ان اللمه دي فاتتو كنت بتونس مع ساره وبنرص في الاكل قالت لي ابوي اتكلم معاهو وقال حايشوف شغل و امس اتصل لي سال من
هيما واتكلم معاي عشان ارجع قولته ليهو مالم اشوفك ثبته في شغلك ما برجع ولا بقبل اعيش على اخوانك تاني قال لي اشتغل مع خالي في المزرعه وقاال ان خالي حايديهو 6 في الشهر قولته ليها كويس ما بطال قالت لي فعلا اول ما كنت حابه انو بشتغل مع خالي لكن خالي قال هو ماهر في المزرعه وشغلو كويس قولته ليها اممم قالت لي شنو اممم مالك انتي اليله؟؟ امي مسكتني من يدي ودخلت لي في الهول الجنب الصالون قالت لي مالك ؟ واوعك تكذبي علي في شنو ؟ وشك ما عاجبني ومن قبيل سااكته ما عادتتك قولته ليها تعبانه شويه قالت لي حاسه بشنو قلبك واجعك ؟! قولته ليها ابدا بس ما قادره اخد نفسي كويس وحاسه بدوخه قالت لي قولته ليك ما تفكري كتير بتعرفي انو التوتر بكتم نفسك اخدي شهيق وزفير وترتاحي اجيب ليك شوربه تلم عضمك قولته ليها لا ما عايزه شي قالت لي لا تاكلي ومشت جات خالتي مفيده قالت لي لو عايزه تقعدي مع اهلك بتقدري تقعدي ليك كم يوم امي قالت ليها اي خليها تقعد ليها يومين تلاته وترجع ليكم خالتي هزت ليها راسه امي ختت لي الشوربه في التربيزه جات مرت اهلنا قالت لي يا بت صحي راجلك تبع المره ديك وسافر ليها تاني ؟ امي قالت ليها سافر عندو شغل بخلصو وبجي راجع المره قالت ليها هيييي شغل شنو والله تاني طار بعدلو لا بجي ولاشي المره الفاتت تمى تلاته سنه المره دي كان جاكم بعد عشرين سنه كويس خالتي قالت ليها انا شايفه انو دي حاجه ما بتخصك ولا دا وقتو ولا زمانو الناس فرحانه ماف داعي للكلام دا المره لوت ليها خشمه قالت ليها كلام القصير ما بنسمع لكن تشوف عينك ولدك تاني ما بجيك لمن لميتي في ما كان تفرطي فيهو نعلو خلاك تقيله يا بت ؟! امي قالت ليها لا ما تقيله ، بطني طمت من ريحه الشوربه جريت اقرب حمام جنبي استغرقته الاكلتو كلو وجسمي هبط امي قالت لي كدا كتير ارح الدكتور المره قالت ليها بتك دي ما عايزه دكتور بتك دي حامل امي شوفي لونه متغيره ومن قبيل كل ما تشم ريحه لحمه تغطي انفها منها ولقت مخلل اكلتو كلو قدام عيني امي قالت لي صحي الكلام دا هزيت ليها راسي قولته ليها بس ما حامل انا المره قالت لي هوي يا بت ها انتي ما بتعرفي اكتر مننا نحنا ولدنا بدل البطن خمسه وسته وعارفين شغله النسوان امشي افحصي انتي حامل وظاهر في وشك مبروك يا معزه يتربي في عزكم وقعدت تزغردت حبوبه قالت ليهم مالكم في شنو ؟؟؟ المره قالت ليها جايكم طفلين افرحو حبوبه عاينت لي وختت يدها في راسه قالت لي حامل من متين يا بت ؟ قولته ليها حبوبه حمل شنو انا مهبط من الشغل بس بتعرفي اني لمن ازعل او اضايق بهبط ونفسي بكتم وراسي بلف مافيني حمل ولاشي ودي بتقول اي كلام وخلاص حمل شنو عن اذنكم انا طالعه ارتاح شويه فوق ...
خوفته شديد من كلام المره ليكون صاح انا ما طايقه كمان احمل ؟؟ لا دا ما وقتو خالص انا لو طلعته حامل فعلا دي تبقى مصيبه ومصيبه كبيره كمان ...
#محبات🚶💙
