آدم طلع مني وانا الفرحه ما سيعاني بعد طلع قعدته انطط عرسته آدم عرسته آدم كنت مبسوطه شديد نشوى واخواته كانو بضحكو فيني ما اهتميت ابدآ فرحتي ما مدياها لزول غيري ، امي ومصعب العصر جوني في بيت ناس نشوى طبعا حسب عاقدين علي ما بقدر امشي بيت العرس هناك ابدا، امي قالت لي تيسير انتي باديه مرحله جديده وان شاءالله تكون عوض ليك بس عشان المرحله دي حا تكون عوض ليك بس عشان تبدي صفحه جديده لازم تقفلي كل الصفحات القديمه قولته ليها في شنو ؟ قالت لي ابوك برا عايز يشوفك وقبل ما تقول لي ما عايزه اشوفو وكلامك الذي كل مره دا بتمنى تشوفيهو لمره بس سكته ما رديت ليها امي ومصعب طلعو وابوي دخل وخلونا برانا، كنت قاعده في السرير وماسكه دانه في كرعيني وبعاين في الارض ابوي عاين لي مسااافه وجاء قعد جنبي من سكااات قال لي زمان كنت جبان وكعب شديد كنت عاق ك ابن وعاق ك زوج كنت بعامل امك بقسوه كنت حجر ما فاهم يعني شنو عيله وضنا كان كل همي اني اعمل العايزو حتى لو كان غلط طالما انا عايزو اعملو وبس امك اتحملتني كتيييير كانت بتجي علي نفسه عشانكم ،، بعد جيتي انتي ولادة امك بيك كانت ساهله شديد لهسا بتذكر ولدتك في غرفه امي الله يرحمه الوجع جاها فجأه وانا حميته تمشي اهله ،امك مرضت بعد ولادتك باسبوع كنتي طول الوقت بتبكي من الجوع عشان امك ما بتقدر ترضعك كنت بجي بكورك فيك بزهج وبنهرهك بقول ليك اسكتي بس انتي بتضحكي لي كل ما ازيد صراخ في وشك انتي بتزيدي ضحك اتعلقته بيك شديد بس امك كان طاقة تحمله لي خلصت وطلبت الطلاق وانا رفضته بس هي لجئت لابوك وابوي وقروو يطلقونا طلقتها واخدت مصعب منها غصب عشان رفضو يدوني ليك لانك صغيره ومحتاجه لامك كنت بفكر اتصلح عشانك وابني الاتهدم من جديد بس كنت جبان ومتكبر شديد سوقته مصعب معاي ومشيت، مصعب ضاق المر معاي بس حنين وبنسى بسرعه ما قدرته ارفع يدي فيهو يوم عشان بشوف وشك فيهو وشك العمري ما نسيتو مع اني لي 21 سنه منو ، طول السنين دي كنت محتفظ بصوره بتي العمره شهرين حتى يوم شوفتك في المكتب كنت شايفه فيك بس عيونك كانت مليان كره ما قدرته اخت عيني في عينك ابدا انا ما ربيتك ولا شلتك ولا كنت معاك لحظات احتياجك لي بس انتي ولا مره غبتي عن بالي الله داني كل شي بس العقاب كان بعدي عنك السنين دي كلها حرمني من اكتر حاجه حبيته في الدنيا في رمشه عين اخدك مني بسبب اعمالي الوسخه ، قولته ليهو بتريدني كدا وانت ولا مره سألته عني ؟ قال لي عشان عارف لمن اسأل حالقى كره ما حا القى الضحكه الكنت بشوفه ديك كنت خايف قولته ليهو وهسي ما خايف ؟ قال لي خايف بس ما عندي وقت كتير عشان اتراجع انا عقاب عمر واقف في الحافه مستني دوري ما عايز اموت وتكوني شايله جواك لي بس كره ما عندي ذكره جميله مع زول غيرك قولته ليهو بحاول اصدقكك قال لي حقكك وما لايمك ابدا، انا ولا مره كنت اب كويس اسمح لي ابقى جد كويس، اسمح لي اكون ابو العروس لاول مره في حياتي خليني اقيف معاك مره في حياتي خليني اصلح غلطه عمري واخد معاي ذكره طيبه اتونس بيها بعدين في قبري انا غلطته وغلطي كبير شديد بس انا ابوك صاح ؟؟ معتبراني ابوكي يا تيسير ولا كرهك لي قتلني بالحياة ؟ عاين لي وعيونو ملانه دموع دموعي جات جاريه قعدته ابكي قولته ليهو انا طول عمري متمنيه يكون لي اب كيف اقتلك بيدي وانت عايش يا ابوي ؟؟ في حياتي العشتها كلها كان زول اخد مكانك مافي فاضي زي ما خليتو ومافي زول بملاهو غيرك ابوي حضني عليهو كلمه ابوي دي بالدنيا والفيها ولو ربنا اخد امانتو انا رضيان اعفي لي يا تيسير اعفي لي تقصيري وقسوتي عليكم العمر دا كلو دانه بكت على بكانا ابوي شاله ووشاغله وحضني عليهو دموعي ما وقفت ابدا وباقي لي اليوم دا زي الحلم حلم ، معقوله ربنا راضي عني كدا لدرجه مديني الفرح كوم واحد ؟ معقوله في عوض كدا ؟ الحمدلله يارب الحمدلله على ابتلاء ، آدم جاء خاشي لقى ابوي معاي رجع لوراء ابوي ناداهو قال ليهو طول عمرك كنت صاحب مجدعه والحمدلله بقيت نصيب واحده واغلى واحده من بناتي انا بديك عيوني يا آدم ما عايزه تجي يوم شاكيه منك آدم قال ليهو طول ما الله خاتي فيني روح ما حاتجيك شاكيه مني الا سعادة زايده ما تشيل هم تيسير بصيرتي البشوف بيها ابوي قال ليهو واثق شديد انا منك ،، بستأذن انا منكم وطلع ،،
آدم شال دانه قال لي جيت عشانه قولته ليهو ما صاح تشوفني في العقد قال لي ومنو الخته الفرضيه الظريفه دي ؟ قولته ليهو اجدانا القدماء قال لي والله ؟ رفعته ليهو حواجبي قال لي اسمها عاهات وتقاليد انا حا اشوفك كل ما يجي على بالي اشوفك وكل ما عيني تشتاق ليك ظط ؟؟ قولته ليهو كنت ماشي كويس لغايه ظط دي قال لي ما عايزك تنزلقي يا اصليه قولته ليهو ما انزلق كان انزلقته مش راجلي ؟ ضحك قال لي انا حا امشي عشان شكلي انا اللي حا انزلق والله عاينت ليهو مسااافه وهو بلعب في دانه رفع لي حواجبو باستغراب قولته ليهو احساس انك حالق شعرك ..!! قال لي اذا جيت بيها لجدك كان وافق ؟،اكيد حا يطردني من الباب ويفكرني شماسي انا جاي اتقدم لاهل حبيبتي لازم ارتب نفسي و ابين اني ودناس + اعتقد تفه واحد فينا كفايه صاح دندون ؟ قولته ليهو قصدك شنو بتفه دي ؟ قال لي اكيد قصدي تفه دندون يعني حايكون تفتك مثلا ؟ قولته ليهو بغيظ آدم قال لي قلبو ♡ وطلع فات ،، المساء ناس نشوى بجهزو لي للحفله وانا بعاين ليهم بزعل قولته ليهم هسي ما لقو وقت يعقدو فيهو غير يوم الحفله الكبيره ؟ والله حرام نشوى ضحكت بصوت عااالي قالت لي ساره وشال قلبي سرقو ومشى خلاني مدروشه ساره هزت ليها كتفه وضحكو بشماااااته نينا قالت لي جيبي العسل دي نلبسه عشان مااااشه الحفله معانا وابوها قال عايزه قولته ليها ابوها؟؟ قالت لي آدم آدم قولته ليها ايوااا لكن برضو ما بتشليها خليها تقعد تونسني نشوى قالت لي خلي راجلك يونس يلا يا صااااره يا حبتشششي ورانا حفله نربها ولبسو دانه وشالوها معاهم وانا بعاين ليهم عينين عينين الزعله خنقتني خلو معاي حبوبتهم مخرفه كدا تمشي وتجي تقول لي انتي منو ؟ جات لقتني راقده وخاته يدي في وشي قرصتني في رجلي بعد نطيت قالت لي دا منو البتناضمي معاهو دا يا بت اعترفي ، اعترفي والا والله العظيم اكلم ليك جدك علوان يضبحك يامنطلقه يا مشرومه قولته ليها علوان شنو يا حبوبه انا ما بتكلم مع زول قالت لي يعني ما دايره تعترفي ؟ قايلاني خرفته ؟ اناشااابه اشب منك سامعه باضني دي بتتضحكي ليك مع واحد دايره تجيب لينا العار يا قليله الادب قولته ليها هوووي يا حبوبه هووي دا ما وقت فصلانك كانت شايله مفراكه ضربتني في رجلي ضربه حاره قالت لي ياقليله الادب يا مربيه كيف بتكلميني كدا ؟ انتي امك ما قرصتك عشان كدا بتلعبي بشعرك قولته ليها حبوبه انا ما ناقصاكي والله شايفه في زول هنا ؟ قالت لي جرى من شافني جرى بالشباك لكن يمين بالله اليله وطاتك دي ما تصبح بقت شايله المفراكه وجاريه وراي لفت بي البيت كلو وتشيل وتمحط فيني في اللحظه دي انا شتمته نشوى واهله كلهم عمو مزمل كان نايم صحى على اصواتنا طلع لقاني جاريه في الحوش وامو شايله المفراكه وجاريه وراي جاء مسك امو قال ليها يمه دا الشنو بالتسوي فيهو دا قالت ليهو البت قليله الادب دي كان معاها ولد جو الاوضه اليله يدي الا تصله دايره تشمت فيني الخلق وتجيب لينا الكلام قولته ليهو عمو مزمل ما مصدقه والله ما معاي زول عمو مزمل قال لي انا عارف امي مخرفه معليش يابتي خوشي جوه انتي وماعليك تاني شال منها المفراكه وقعده جنبو دخلته جوه وقفلت باب الصاله آدم اتصل لي فديو لحظه العرسان جو داخلين كانو حلوين شديد اي واحد فيهم احلا من التاني دموعي جات جاريه فضل متصل لي لغايه رقصو اسلو♡♡ ريناد الفرحه في عيونه اتخيلته نفسي مكانه مع آدم ♡آدم قال لي اتخيلي اللحظه دي انا وانتي ووجه التلفون للعرسان خالي طلع خاتم في نص الحفله لبسه ليهو وباس جبينه والناس تصفر وتصفق ادم حوله لمكالمه عاديه وطلع من الحفله قال لي شهرين وحا تكوني لي ان ششششاءالله ♡ دايره ارد ليهو حبوبه جات خاشه ضربتني في كتفي قالت لي انتي بت منو ؟ قولته ليها بت ارض الشام يا حبوبه قالت لي سجمي ؟ ومالك قاعده ومخليه عيالك برا ؟ نعلو الود الوقع في البلاعه دا ولدك ؟ قولته ليها لالا دي ما انا دا ود اختي التانيه انتي امشي كلميها قوليها الحقي ولدك مات قالت لي سمح النكلمه، آدم ضحك قال لي دا شنو السمعتو دا ؟ قولته ليهو السمعتو هين كانت ساكني بالمفراكه هي، حبوبه وصلت الباب وتاني جاتني راجعه قالت لي انتي اتغديتي ؟ قولته ليها اي قالت لي شربتي الشاي ؟ قولته ليها اي يا حبوبه وشربته القهوه وكل المشروبات قالت لي شمح وخشيتي بولتي ؟ انا طق قفلته الخط من آدم وختيت يدي في راسي من كلمته اودي وشي وين تاني ؟ يارب يكون ما سمع،، آدم اتصل لي ما رديت بقيت ماشه وجايه في البيت قولته الناس في الحفله وانا قاعده مع عجوز ؟؟ البقعدني شنو؟؟ لبسته لي نقاب طلعته لقيت مصطفى اخو نشوى معاهو اميره مرتو مكرفسين بتهم يدوب طالعين ماشين الحفله ركبته معاهم قولته ليهم انا زاتي ماشه اميره قالت لي اجييي يالعروس قولته ليها والله ما بقعد ليكم ما حبوبتكم المخرفه دي مصطفى قال لي بضحكه ابوي قال سكتك بالمفراكه قولته ليهو محططتني محيط في البرد دا تاني ما بجيكم اميره ضحكت بتفاهه قالت لي اكتر واحده باركت ليك صااح قولته ليها دي فلاحتك انتي،، وصلنا الحفله وقعدته في كورنا عاينو لي بستغراب ما اشتغلته بيهم اميره جات مسكتني بتها ولفحت توبه تبشر وترقص من محلها لغايه وصلت العرسان ربوها ربه طبعا انا بحكم عندي قلب حتى لو عايزه ارقص ما بقدر عشان في اي لحظه برقد رز كنت مبسوطه شديد على فرحتهم الحفله خلصت طلعته مع ناس اميره وكأن شيء لم يكن نشوى قالت لي ما عرفته لي عروس شفقانه قولته ليها ما سألتك رجعنا البيت دغري نمنا ،،،
الصباح كان الجرتك اتعمل في بيت خالته بدل بيت امها ،، مشيت معاهم بنقاب طبعا هشام بعد خلصت المراسم غطى القرمصيص فيهم الاتنين وباسه🙊💋 والاولاد يصفرو والناس دي تكورك ، كنت واقفه جنب امي وقدامي مصعب حسيت بيد ماسكه اصابعي عايزه ازحه لقيتو آدم عاين قدامو وابتسم سحب اصابعي لغايه ما شبك اصابعو في اصابعي عايزه اسحب يدي مسكه بقوه وضغط عليها وعاين لي بطرف عينو طول فتره الجرتق كان ماسك يدي امي عاينت لينا لقتو ماسك يدي ابتسمت سحبته يدي بقوه بس كان اقوى مني ما قدرته افكها عمل فيها بصلح في جزمتو قال لي ما تحاولي عافرته عشان امسكه مافي شي في الدنيا حا يخليني افكها تاني ابتسمته وعاينته ليهو ،، اهلي واهل ادم قعدو اتفقو انو العرس بعد شهرين وانا حا ارجع اكمل شغلي ومنو اختار الشيله وارجع اتحبس عند حبوبه ،، بعد اسبوعين رجعته الخرطوم قعدنا في شقه خاالي انا وامي ومصعب طول فترة قعادي كنت بلبس النقاب عشان الحبسه في يوم جيت ماره بمكتب آدم حنيت ضهري لورا واتاوقته اشوفو ي ولا مافي آدم حنى راسو وعاين لي بابتسامه ضحكته وهو بحرك في القلم غمته يديني وعينو عشان قبضني جاني طالع قال لي بتتاوقي ليه تعالي بالباب عديل وسحبني من يدي لجواء قولته ليهو آدم زح يدينو ورفعهم فوق قال لي زحينا ... بس ارفعي النقاب اشتقته ليك قولته ليهو برفعو يوم العرس ما هسا قال لي ما بقدر استنى قولته ليهو العايز يشوف الشهر مكتمل يستنى لبدايه الشهر الجديد قال لي طيب حا اشوف اقمار غير مكتمله قولته ليهو بدفنك هنا هاا قال لي بخباثه بتغيري ؟ قولته ليهو لا طبعا شنو اغير عليك انت ؟ ومشيت خليتو ،، نهايه اليوم وعد اتصلت لي قالت لي لوخلصتي شغل ارح السوق عشان نخلص بسرعه قولته ليها طيب شويه واجيك شلته شنطتي وكنت بفتش لسمؤال وانا ماره لقيت ادم وريم قاعدين في الكافتريا عاينته ليهو مسااافه ومشيت خطوه اتذكرته كلامه لي تاني جيت راجعه ليهم قولته ليهو آدم حبيبي آدم رفع راسو باستغراب قال لي قلبو♡ قولته ليها عايزك في كلمتين اذا ريم ما عندها مانع آدم قال لي ريم ثواني وراجع، مشينا بعيد شويه من ريم قال لي حبيت كلمة حبييي ان شالله دايما مسكته يدو قولته ليهو المقعدك مع فلانه دي شنو ؟ عاين لي قال لي في موضوع بينا كن...قاطعتو قولته ليهو موضوع بينكم هااا؟؟؟موضوع شنو دا البينكم ان شاءالله ؟ قال لي ما عايزك تزعلي قولته ليهو قول قبل اضربك بالكرسي انا ماسكه نفسي بالجلاله قال لي طيب هدي كل القصه كانت بتقول اننا نرجع لبعض بعد الحصل وقلته ليها حا افكر ختيت يدي في نصي قولته ليهو بصوت عالي نعمممم !! آدم ضحك قال لي بهظر بهظر اهدي ، في مشكله كدا بحاول احلها معاها قولته ليهو وتحلها ليها انتي ليه كنت مصلح اجتماعي وانا ماعارفه ؟ ماله ما عندها صاحبات؟؟ قال لي هي لجئت لي اقول ليها امشي لغيري ؟ قولته ليهو ومشكلته دي شنو ان شاءالله ؟ قال لي هي نبهت علي انها بينا قولته ليهو وين المشكله ما بينكم ولا انا غريبه ؟ قال لي طبعا ما قصدي يعني هي قالت انو متقدم ليها ود عمها وهي ما عايزاهو وطلبت مني اتكلم مع ابوها عشان في واحد تاني هي دايرهو وابوها رافضو بحكم اني بعرف اهله وعشان ما عندها اخوان و.. قاطعتو قولته ليهو بس خلاص فهمته ومشيت ليها قولته ليها اقرب واحده من اهلك ليك منو ؟ قالت لي ليه ؟ قولته ليها من غير ليه قالت لي بتوتر ماما قولته ليها تمشي لماما دي وتحكي ليها الحكيتهو لي آدم دا كلو عشان ماما دي بتكون مرت بابا وبابا حا يسمع ليها عشان هي مرتو ولو ابوك رفض خلي المحروس الدايراهو دا يتقدم ليك ويتشاكل فيك هو ود عمك واهز وزيتكم في بيتكم ما دخلي غريب بعدين حنك الجبر دا لاسره اوبن مايد في راسي ما بركب،، وقفته علي حيلي قولته ليها صحي انا وآاااادم راجلي " بتعطيش الجيم" عرسنا كمان شهر اعزمي حلتك كلها لو حابه نحنا ناس كريمين وبنحب الضيوف عن اذنك ورانا شيله عايزين نجهز ليها بااااي ... ريم قبل اطلع شالت شنطته بحرقه ومشت آدم عاين لي من سكات قال لي دا شنو دالعملتي دا ؟ قولته ليهو انا غيورة وغيرته كعبه وتاني مره ما القاك معاها وياما ... قال لي اها ياما شنو ؟ قولته ليهو قلبي حا يوجعني قال لي كلو الا قلبك ، بس تاني ما تصرفي كدا عشان انا الراجل هنا قولته ليهو يعني عشان انت راجل تعمل ما بدالك ؟ قال لي لا عشان انا راجل ليك واجبي بحتم علي ابعد البضايقك بيدي وانتي يدك ما تتعب غير في الحاجات البتحبها عارفه ليه ؟ عاينت ليهو قال لي عشان قلبي دا ما يتعب " واشر ناحيه قلبي " ويلاعشان ورانا شيله نجهزه ،،،،
بعد جابو الشيله ام آدم جات بس كان بتعاين بطرف عينه بس،، بدينا في تجهيزات العرس طبعا ما اتعمل لي اي حفله حنه بس آدم اصر يتعمل حفله كبيره وامو اصرت كذلك عشان ادم اول مره يعرس ،، يوم العرس بعد الميكب ارست خلصت مني وخلاص بقيت جاهزه نشوى قالت لي هم مالهم اتاخرو كدا ان شاءالله ما يكون حاصل حاجه قولته ليها انا متوتره شديد يا نشوى قالت لي دقيقه اتصل لمصعب فتحت تلفونه مصعب وصل عاين لي مسااافه ووجاء حضني آدم ما كان مسموح ليهو يشوفني ابدا علشان مصعب حا ينزل بي هو ويسلمني لادم " اللحظه المنتظره "كنت خايفه شديد وطول الوقت ماسكه يد نشوى قاعدين في غرفه ،، الصاله كانت صانه شديد انا ومصعب جينا نازلين والنور موجهه لينا وبقيت الصاله مضلمه كنت ماسكه مصعب بيدي واسناني مصعب سلمني لاابوي وابوي بدا ينزل بي باقي السلالم آدم كان في نقطه ضوء مسلطه على آدم وماسك بوكيه الورد ومقبل الاتجاه التاني مدينا ضهرو وصلنا للتسيج الواقف فيهو آدم كان لابس بدله كحليه ومرتب شعرو وشكلو متوتر شديد ابوي قال ليهو آدم ، آدم اتلفت اول ما شافني دموعو جرت رفع راسو فوق وسجد في الارض وقام وقف على حيلو وعاين لي مسااااافه قال لي هو في كدا ؟؟ ولاحظه حضني ورفعني فوق ولف بي الناس كلها تعاين فينا انا محل اقبل ما عرفته على قدر ما اللحظه كانت حلوة على قدر ما اتحرجته شديد ،، بدينا اسلو وهو كل ما اقول ليهو خلاص نرجع يقول لي ابيت الا الاغنيه تكمل الناس تصفر وانا برجف كم فوق لتحت بعد خلصنا رقيص قعدنا في الكوشه ادم كان خاتي دانه لي نصنا ولمن نجي للصور بشيله وباشر عليها بيدو مصعب شال المايك قال ليهم اسمحو لي معليش طبعا اليله عرس اختي واخوي وببارك ليهم والجو القديم دا كلو الناس قعدت تضحك قال لي عايز استغل اللحظه دي انا الصراحه ومن غير لف كتير انا عايز الحق موسم العروسات دا وانا متوتر لانو خايف هي او اهله يرفضو لانو اهله كلهم هنا واهلي هنا برضو وانا عايز اعرس واستغل اللحظه العظيمه دي بس قبل اطلب يدها علنا انا لو اتشكوته اليله حا افجر فيكم نوووي ظط ؟ بقينا بنضحك على كلامو مصعب مشى اتجاه نشوى قال ليها انا مؤمن بمقوله " اذا احببت احدا فكن رجلآ وافضح حبك بخاتم واشهر علي " عمو مزمل انا طالب يد بتك بالحلال وقدام الخلق دي كلها فعليك الله وافق منظري حايكون بش لو اترفضته عم مزمل ضحك قال ليهو ديك ليها اخد رايه هي انا موافق داير اتفكفك منها ،، مصعب قال ليها صحبتك تعرس مرتين وانتي بايره شينه في حقكك نشوى رفعت ليهو حاجبة بزعل قال ليها بكل جديه انا عمري ما اعتبرته نفسي غير لما لاقيتك وعمري ما اكون سعيد غير لو الخاتم دا لبستو يدك اذا موافقه انك تكوني شريكة حياتي وعمري ولحظاتي السمحه عشان انتي ما بليق بيك غير السمح انا ما بوعدك اني اجيب ليك لبن العصفور بس بوعدك انو قلبي ما يكون ليهو وطن غير عيونك ،، آدم قام صفرررر وفضلنا نشجع في نشوى عشان تقبل بمصعب وفعلا لبست الخاتم قالت ليهو انا المحظوظه والله والفرحه بقت فرحتين ♡♡
