ريم قالت لي انتي كمان معزومه بمأنك بتعرفي آاادم خطيبي الخطوبه الجمعه كان لقيتي طريقه مع عرس خالك تعالي قولته ليها آدم خطيبك ؟؟ قالت لي اممم طبعا ما كنت عارفه اننا حا نخطب ؟ مع انو خالتو اسيله قالت كلمتك لمن جات ردحت ليك في المكتب وورتك مكانتك يا خاااالتو تيسير مش المره المتزوجه وعندها ببيهات بنادوها خالتو ؟ قولته ليها والبنات الزيك بسموهن المطلوقات وفصلته منها بزهج جدعته التلفون نفسي قام شديد نشوى قالت لي حذرتك يا تيسير قولته ليك ما تعشمي قعدته في الكرسي امي جات خاشه قالت لينا في شنو لسه ما جهزتو الاغنيه الاولى خلصت امرقن اقعدن شويه وتعالن قدمن للضيوف الشيالات تلقهن في الغرفه التانيه نشوى قالت ليها مستنين شيماء ووصفاء لسه ما وصلو في الطريق امي قالت ليها استنوهم برا ، عاينت لي قالت لي مالك بتبكي ؟ نشوى قالت ليها ما بتبكي دي الماسكار دخلت في عينه طبزتها قالت لي اعملو حسابك الماسكارا دي ممكن تعمي لو وصلت ببؤ العين جوه قالت ليها لالا ما وصلت جوه امي طلعت مننا نشوى قالت لي قشي دموعك شويه وكنا حا ننتكشف وما تبوزي الناس حا تلاحظ والاسئله حا تكتر قولته ليها خاشه الحمام اغسل وشي وجايه دخلته كملته بكيتي وغسلته وشي وجيت طالعه الحفله كانت مسيخه شديد ما كنت ضايقه ليها طعم آدم كان عارف انو اهلو ما حا يوافقو ومع ذلك عشمني ..!!! كنت كارهو وكاره سيرتو واي شي بخصو كان نفسي ابكي شديد دموعي ماسكاها بالجلاله ، خالي هشام نداني قال لي مالك اليله ؟ قولته ليهو مرهقه بسبب الشغل بس طول اليوم كنت لافه قال لي امشي ارتاحي لو تعبانه قولته ليهو لالا دي حفلتك بكمله للنهايه، الحفله خلصت مشيت البيت مع نشوى في بيتهم عشان بيتنا ملان ضيوف اليل كلو شلتو بكاء، صحينا من الصباح لفحنا تيابنا ومشينا الشغل في البيت الكبير كان كتير شديد والضيوف المعانا اغلبيتهم بطبحو بس واحده فيهم بترفع شي من الارض مافي ،،خالتي مفيده نادتني قالت لي صحي السمعنا دا ؟ قولته ليها ياتو قالت لي زاهير متقدم ليك وانتي موافقه قولته ليها صاح عندك مانع ؟ قالت لي اعملي حسابك وانتي بتعرسي تدينا بتنا قولته ليها بتي دي مكتوبه باسم ابوي عبدالعال دانه عبدالعال الحسين لو عندك كلام امشي قولي لي لجدي عبدالعال ولو قولتي بتلوي يدي بدانه فانا حا اكسر ليكم كويس كدا ؟ ومشيت خليته واقفه نشوى قالت لي دانه مسجله باسم جدك ؟ قولته ليها لالا قولته كدا عشان اخوفه بس قالت لي بعد نفي النسب اتسجلت باسم منو ؟ قولته ليها بعد نفي النسب هشام اخد اذن من المحكمه في انو يغير اسم دانه من عمر الامين لهشام عبدالعال ليهو يعني والمحكمه اذنت ليهو هي سلفآ خيرتنا اذا يفضل اسمه زي ما هو بعد نفي النسب ولا يتغير عشان في نظر المحكمه عمر ما يستاهل يكون ابوها لدانا بس من حق دانه انها تاخد اسمو المهم هسي في نظر المحكمه والقانون دانه ابوها هشام ودا عشان نحميها وما نخلي طريقه لعمر يحصل بيها على دانه نشوى قالت لي احسن ما يستاهله ولا يستاهلك ،، ساره كانت مضايقه قولته ليها ساره عيانه ولا مالك مكرفسه وشك ؟ ساره قالت لي مافي حاجه نشوى قالت ليها يعني ما عايزه تحكي لينا ؟ ساره قالت لي خالد حايكون في شنو غيرو قولته ليها اها مالو خالد المره دي ؟؟ قالت لي بخيل ، قولته ليهو اديني اشتري لي توب لعرس خالي قال لي ما عندي قروش للتياب العاليه جاب لي واحد عادي اتخيلي جاب لي توب هزاز ؟؟ قولته ليها ساره الراجل قال ليكي ما عندو وكويس هو زاتو ما عايز يزعلك بعدمانو دا مشى جاب لي هزاز قالت لي تيسير الهزاز انا البسو وين بالضبط ؟ انا توب للحفله ما عندي والتوب الكنت لابسهو في حفله الحنه دا شديتو من هديل قولته ليها شيلي من تيابي قالت لي اقعد اشحد في التياب لمتين ؟؟ قولته ليها انتي ما عندك توب تلبسيهو معقوله ؟قالت لي من وين البجيبو لي منو ؟ قولته ليها عايزه تقنعيني انو دولابك فاااضي التوب التلبسيهو بكره ما عندك ؟ قالت لي تيابي ديل الناس دي حفظتهم صم اي عرس انا ماشه بيهم ودا عرس خالي فيها شنو لو جاب لي توب وعصر على روح داير يخش النار ؟؟ قولته ليها ساره الراجل ما عندو البسي من تيابك ديل واحد وغير ليهو التقطيمه بتاعتو بظهر كانو لابسه جديد قالت اي اطقمو بشنو ؟ قولته ليها ساره انتي ما عدمانه مرررره واحده وعندك البتلبسي اي عرس خالك واي حاجه لكن الراجل قال ما عندو تسوي لشنو ؟ توب الهزاز الجابو دا البسي بجلابيتك البنفسجيه في الفطور والبسي معاهو شبط بيت عادي اصلا الفطور ما فيهو ناس بقولو عليهم وعندي توب جديد من عرسي ما لبستو البسي في الغدا انا ما بلبسو تيابي حقات العرس كلهن قاعدات شيلي البعجبك مرري بيهو المناسبه دي بعد العرس حنكيهو يجيب ليك واحد وتعالي بحركات النسوان دي بجيب ليك ما ضرورس الا هسا اذا هو ما عندو قالت لي خالد دا من يومو فقري وبخيل وعلطول راجع وراء والفي يدو ما بمدو انا تعبته منو جريته بعيييد من الناس وقولته لنشوى اقفلي الباب دا قولته ليها شوفي يا ساره خالد دا ما كعب لدرجه ما بتقدىي تعيشي معاهو وعندك منو ولد قاطعتني قالت لي جبتو جبر قولته ليها مافي شي اسمو جبتو جبر كان انتي ما وافقتي ما كان جاء والراجل كان صحي ما دايرهو كان يموت موت ما بقدر يقرب ليك وخالد ما من النوع البجبر بشهادة عيني دي ما بشهاده زول وكان داك جبيتهو جبر جايبه الملفلفاهو بالقطعه دا من وين ااه ؟؟؟ جبتي كيف ؟؟ ما ياهو برضاكي ؟ اسمعي هنا ماتمشي تلدي منو وتقول لي ما دايرهو وما بتعايش انتي ما دايراهو من البدايه اعملي ليهو مشاكل وخلي يطلقكك ما تجي تكوسي وراء بعد جبتي من البت الولد ، وهسي خالد البتابيهو دا كان عينو لفت على واحده غيرك بببقى ليك بمبي ودا ما شي بعيد طالما انتي بتصرفي بالطريقه دي معاهو وانتي غلطانه والغلط راكبك من ساساك لراسك خالد دا كان قال ليك جيبي لي مويه تتأففي منو وتكرهي اللحظه الطلب منك كوز المويه دا غير انك ما بتحترميهو قالت لي اعمل شنو يا تيسير اعمل شنو هو بجبرني اتصرف كدا قولته ليها جبرك ؟؟ كونو قال ليك يا ساره ما عندي القرش البجيب ليك توب عالي يبقى جبرك ؟ كونو انتي مرتو جاء شكى ليك همو عشان تتفهمي وتقول ليهو ما مشكله يا خالد انتي قابلتي بشكل ونبز وبشييع قدام الناس قالت لي وهو البعملو دا شنو ؟ ليه انتي دايما منحازه ليهو ؟ قولته ليها انا منحازه للحق والنصيحه دي بقوله كان عجبتك ولا ما عجبتك خليها في حتته دي وامشي يا ساره وهسي بعد ما قال ليك ما عندي وشافك زعلتي مشى جاب ليك هزاز عشان يخفف عنك عشان زعلك انتي بعيني ليهو فابحاول جهدو ما يخليك زعلانه بس انتي بتقابلي بشنو؟ بالشكل والنبز وانتي فقري وانت ما معيشيني وعلى طول عينك في يد الغيرك ما الفي يدك انتي ، النسوان البتبورن ديل رجالهم مشبعنهم دهب ما بقول ليك كضب لكن من جوه فاضيات واحده فيهم راجله بعافر عشانه مافي ، بدوهم التياب والقروش والدهب عشان يغطو تقصيرهم في حقهم دا كلو ما ظاهر بس بحاولو يخفو بيها الفراغ الجواهم ، فعلا لو كنتي معرسه واحد مقرش كان جدع ليك ربطه قال ليك ازعلي البعجبك لكن لو زعلتي بجدع ليك ربطه تانيه عشان زعلك عندو بتقاس بالقروش ما زي خالد مشى عافر عشان يجيب ليك توب الهزاز المابيهو دا ليه ؟ غالبو يضرب بزعلك الحيطه ؟ ما غالبو لكن عشان زعلك بعني ليهو عشان انتي بتهمي ولو بيدو يطول السماء كان غمته ليك في يدك ، العيشه المابيها دي ما سببه خالد سببه انتي دي انتي ما خاته بالك من بيتك ومن راجلك بذااات ما خاته بالك منو يوم واحد نضفتي بيتك وبخرتيهو وعملته ان شاءالله لقيمات وقعدتي تتونسي معاهو براو براكم ؟؟؟ يوم واحد سمعتي كلمه حلوة ؟ يوم واحد قال ليك الحاجه دي ما عندي قولته ليهو معليش بكره تكون عندك ؟ والبسالك عن حالك تشكي ليهو وانا القريبه دي يوم واحد ما سمعته منك كلمه الحمدلله ما حصل حكيت لي بالسمح البينكم عشان عينك على الكعب عينك على الناقص في حياتكم ما على المليان حصل ولا ما حصل يا ساره ؟ ودا كلو عشان شنو ؟ عشان هو في نظرك فقري وعدمان ومعيشك عيشه الكلاب ؟ راجعي نفسك يا ساره وخلي بالك من راجلك وبيتك عيالك بعد الفي يدك يطير منك وتفتشي بالغالي وما ما تلقيهو واحمدي الله يا ساره احمدي الله ، ساره قعدت تبكي ولا قولته ليها عينك في راسك طوالي طلعته ، خالتي فوزيه قالت لي مصعب اخوك بفتش ليك من قبييل وين كنتي غاطسه ؟ قولته ليها كنت باكل في دانه بتي مصعب وين قاعد ؟ قالت لي ما عارفه والله طلع لكن من الصباح بفتش ليك اتصلي ليهو قولته ليهو تلفوني ما لاقياهو من امس مقفول قالت لي الا كان اتسرق كان تعملي حسابك قولته ليها كاااان.... نشوى قالت لي بتصل ليهو اشوفو اتصلت ليهو قالت لي ما برد قولته ليها خلي برجع براهو ، ساره سكتت ؟؟ قالت لي سكتت اي ، لكن كلامك حار شديد قولته ليها خلي اليحرقه عشان تبطل البتعمل فيهو دا كان بجيب في راسه خبر قالت لي انا العصر ما صليتو والمغرب خاشي اشوف لي حته اصلي فيها قولته ليها ارح بيتكم انا هلكته عديل اليله نشوى قالت لي ما بتلحقيني ولسه راجينا بكره ، المسافه بين بيتنا وبيت ناس نشوى ما بعيده وبجي ماره ببيت ناس خالتي مفيده لمن وصلته نص المسافه قولته ليها نسيت ملابس دانه ختيتهم في الشنطه ونسيتهم هاك شلي دانه معاك وانا بجييهم وبحصلك ،رجعته شلته الشنطه وطلعته مصعب لاقاني في الطريق قال لي وين انتي من قبيل بفتش ليك وتلفونك قافل ليه ؟ قولته ليهو تلفوني ما لاقياهو وبتصل ليهو مقفول قال لي كنت عايزه اقول ليك آدم بكره ...قاطعتو قولته ليهو عارفه العايز تقولو قال لي عرفتي ؟ قولته ليهو موضوع زي ما بتخبى ، خليت دانه مع نشوى براها حا تعذبه ما تخت في بالك ما اول امرق بحاجه زي دي ومشيت خليتو واقف ،، لمن جيت ماره ببيت خالتي مفيده عمر لاقاني في الشارع مشيت بالجهه التانيه عشان اتجاوزو وقف قدامي كل ما امشي على اتجاه يوفق قدامي قولته ليهو عمر الفيني مكفيني زح من وشي لو سمحته قال لي حا تعرسي يا تيسير تعرسي راجل غيري ؟ انا مش كنت حبيبك وروحك ونفسك الطالع قولته ليهو كنت.... بس هسي لا بعدين ما اعرس انتي مش عرسته مره غيري ؟؟ ولا حلال ليك وحرام علي ؟؟ عايزه امشي مسكني من يدي قال لي انتي حاولي بس عرسي وشوفي بحصل شنو قولته ليهو انا ما احاول انا حا اعرس فعلا وريني حا تعمل شنو .. عمر قال لي انتي مرتي انا بي وراجل غيري ما عندو فيك حق ولزاني على الحيطه قعدته اصارع فيهو واكورك الرجال الماشين الجامع كلهم كسرو علينا وفكوني منو، رجعوني بيت جدي عبدالعال قعدته ابكي مصعب خوالي وجدي عبدالعال كانو جايطيين وزعلانين شديد مصعب شال عصايه قال والله وطاتو ما تصبح اليله الا كان انا ما مصعب فؤاد ومشى امي كورت لخالي هشام قالت ليهو الحق مصعب حا يقتلو عمر شال العكاز ومرق هشام وخالي فرح حاولو يمسكو مصعب ومصعب بحاول يفك منهم عمي الامين في نفس اللحظه جاء سايق عمر وكاري من قميصو مصعب فكاء من خوالي ومشى عليهو وقع فيهو ضرب الا حجزو حجزان عمي الامين وابوي عبدالعال عينهم ما رفعوها فيهو مصعب قال ليهو اقسم بالله روحك الله في يدي ياود الحرام هشام قال ليهو مصعب كفايه ياااخ انا خالك ختي اعتبار لكلامي معاك مصعب كان بضرب في عمر بعد كلامي خالي وقف ضرب وجدع العكاز مسك عمر من قميصو قال ليهو عظيم يمين تلاته لو ما خالي كان دفتنك في وطاطتك دي يا واطي تف عليك الجو بقا مكهرب شديد وعمت لحظه صمت زول بتكلم مافي انا كنت جنب امي وحبوبه بطبطبو علي والكانو جوه كلهم طلعو الحوش جدي عبدالعال بصوت عالي قال بكره عقد هشام وبت اختو تيسير سواء في الجامع الكبير حضرو كل شي لازم ما عايز ولا شي ناقص ،، وعاين لي عمر قال ليهو النشوفك حا تقرب ليها كيف تاني ..!! بعد جدي قال بكره عقد تيسير قلبي اتقص واتقبض شديد كنت خايفه لدرجه برجف عاينته لمصعب مسااافه مصعب قال لي دا الصاح جدي عمل الصاح بعد مصعب قال كدا جسمي كلز و برد دموعي جرت ،، نشوى جات خاشه شايله دانه قالت لي سمعته الجيران بتكلمو قالو عمر اتعرض ليك وحجزوكم تيسير صحي عقدك بكره ؟ عاينته ليها بحسره من غير ما اتكلم حضتني عليها قالت تيسير لخير ما تنسي انتي استخرتي ودا الخير الجابو ربنا ، انا اسفه ما بيدي شي اعملو غير اطبطب عليك حضتني عليها شديد قعدته ابكي بقهر ، كملته دموعي ودموع نشوى ودانه اليل كلو انا ابكي ونشوى ودانه يبكو معاي،، سكته وشلته دانه حضتنها لي عشان ما تنوم وهي بتبكي شاغلته ولاعبته ضحكت ابتسمت ليها ونامت دغري تاني يوم الصباح امي جاتني في بيت ناس نشوى مع حبوبه قالت لي تقعدي هنا وتمشي البيت الكبير ؟ قولته ليها بقعد هنا البيت الكبير زحمه وانا الفيني مكفيني ما ناقصه اسئله النسوان قالت لي انا قولته كدا برضو ، حبوبه بكت قالت لي كلو لخير يا بتي والراجل دا قالو كويس وسمعنا عنو كويس الله يجعلو عوض ليك ان شاءالله ، جدك عمل الفيهو مصلحتك والشاف صاح ما دايراك تشيلي منو في قلبك وتقولي جبرانك يابتي قولته ليها ما شايله منو يا حبوبه وطالما جدي واثق في الزول دا انا زاتي موافقه بيهو البحصل دا كلو بسببي انا لو ما عندتها وعرست عمر ما كان مرمطتكم كدا اعفو لي حبوبه قالت لي هاا الغبيه دي دا كلام تقولي ؟؟ والله وبالله امك الوالدنها من بطنا دي ما غاليه علينا قدرك انتي النور البنشوفو بيهو انا وجدك بعاقب العمر دا يابتي ابتسمته ليها قولته الله يخليكم لي وانا والله راضيه بقرار جدي المهم عندي بتي وهو كويس مع الشفع امي قالت لي نحنا نمشي عشان نجهز الحاجات نوديها الجامع الخطبه انتهت والعقد بعد الصلاه حا يكون امي مشت مسافه وجات راجعه قالت لي الف مبروك قولته ليها ببتسامه الله يبارك فيك حضتني وطلعت دموعي جات جاريه نشوى حضتني من غير كلام طلعت لي توب قالت لي البسيهو عشان النسوان حايجيو يباركو ليك مسكتها دانه ومشيت اتوضيت صليت وقعدته ابكي في المصلايه نشوى مكيجتني مكياج خفيف بعد شويه سامعه صوت الزغاريت والسلاح وناس بباركو الجامع ما بعيد من بيت ناس نشوى دموعي جات جاريه واتمنيت الارض تتشقى وتبلعني ،، النسوان جو يباركو مبروك مبروك واحده فيهم قالت لي مافي مرة محظوظه تعرسي مرتين العرس يا عندك يا بلاش نشوى قالت ليها كان دايره انتي زاتك اطلقي وعرسي المانعك شنو قالت ليها ما بجيبو ود المقدره زيها هي ما قااادره نشوى قالت ليهو شكرا نردها ليك بعد تجيبي ود المقدره انستي وقرفتي اقصد شرفتي ... المره قامت عليها لوت خشمه و مشت قولته لنشوى ما كان تقولي لي ليها كدا قالت لي غاظتني الناس في شنو وهي في شنو دي شنو عليك الله؟؛ بعد العقد بنص الساعه الناس خفت حسب قاعده في بيت ناس نشوى شويه جاء داخل هشام قعد جنبي قال لي الف مبروك قولته ليهو الله يبارك فيك باس راسي مصعب جاء حضني شديد عليهو دموعي جات جاريه قال لي شوفي الهبله دي فكري في الجانب الايجابي انتو بقيتو حلال بعض قولته ليهو فعلا حلال منو انا زاتي ما عارفه مصعب قال لي افووووو !! ، نعرفك طوالي ادخل يا عريس قولته ليهو لا ما عايزه اشوفو عليك الله جاني الصوت المابيغابني بغني ...
وقدر هواااك يجييني ليك جمع قلوبنا وولفى ♡
وكتين بقيتي معايا في اعماقي ،
في اعماق مشاعري المرهفه 🎶🌾
