قعدته في البيت تلاته ايام ما مشيت الشغل امي قالت لي تيسير كدا كفايه امشي شغلك الناس ديل انتي ماضيه معاهم عقد ودافعين ليك قروش قولته ليها انا بفكر اخليهو قالت لي تخلي شنو ؟ انتي هبله يا بت ؟ بعد وصلتي لهنا وبقيت مستقله عايزه تتراجعي ؟ هووي يا بت ختي عقلك في راسك زين ما تاخدي قرار تندمي عليهو قولته ليها انا بسبب تركيزي في الشغل اهملته بتي امي قالت لي بتك كان انتي اهملتيها انا كنت مهتمه بيها والبجي من الله لا انتي لا انا بنقدر نصدو وطالما انتي شايفه نفسك مركزه عل الشغل يبقى وازني بينو و بين بتك ما تعملي شي على حساب شي تاني وخصصي لاي واحد وقتو بس انك تتراجعي بعد مشيتي نع الناس غلط هو ما على كيفك ولمره بس يا تيسير مره اتحملي مسؤوليه قرارك للنهايه سكته منها ما رديت ليها قامت مني خشت المطبخ كنت جايطه شديد وما عارفه اتصرف كيف ؟، جبته لي ورقه وقلم وبديت افكر في الحا اعملو مصعب ضرب لي قال اي اليله برضو وين ما شايفك ؟قولته ليهو ما جايه اليله قال لي بنهرع انتي الشركه دي حقت ابوك بعد بتدلعي كدا تجي وتمشي بكيفك؟ خمسه دقايق والاقيك قدامي فاهمه ؟ حمرته دنقرته لقيت تصرفاتي فعلا غلط مشيت لبسته وطلعته قولته لامي انا ماشه الشغل خلي بالك من دانه قالت لي دانه هينه خلي بالك انتي من نفسك وشالت دانه مني ومشت حسيت امي زعلانه شديد يعني بس عشان قولته اسيب الشغل زعلت كدا ؟ وصلته لقيت مصعب في وشي كان صار لي شديد قال لي غلطه امي الوحيده معاك انها دلعتك اكتر من الازم وما هي وبس انا شايفه خوالي وجدي وحبوبتي بالغه زياده معاك قولته ليهو انت بتسمي دلع ؟ انا ... ما سمع مني ومشى طوالي خشى المكتب خلاني واقفه ادم قال لي حمدلله على السلامه اخيرااا شرفتي ؟ قولته ليهو ما عايز تديني مواعظ انت كمان ؟ قال لي ما انا المدير جوه عايزك قولته ليهو عايز بي شنو؟ قال لي وانا عرفني شنو خشي ليهو اسالي بنفسك مشيت باستغراب دقيت الباب سمح لي اخش دخلته المدير قال لي غياب تلاته ايام خير ان شاءالله الغياب لشنو؟ قولته ليهو بتي كانت مريضه قال لي مصعب قال مجرد ضيق تنفس وراح في يومو واتعافت ولا تعبت تاني ؟ هزيت ليهو راسي لالا قال لي شوفي انتي من الناس الاثبتو نفسهم في الشركه دي وانا ما عايز اشيل وش القباحه معاك لكن الشركه دي عندها قواعد والقواعد دي بتبطق على الكل بمافيهم انا فلو عايزه تاكلي معانا عيش الاستهتار و الكسل وانا وكنت ... ديل ما معانا فاهمه؟ قولته ليهو فاهمه قال لي خصم يومين من مرتبك التالته دا عزرناك اتفضلي امشي ، طلعته منو خشيت المكتب كان ما لي نفس اشتغل ابدا بس جبرته روحي كنت ورقه الاستقاله في يدي جاء ادم خاش قال لي تيسير في اجتماع كمان ساعه كلمي سمؤال مشت وين هي ؟ قولته ليهو مرقت تفطر قال لي انتي كويسه ؟ هزيت ليهو راسي قفل الباب وجاء قعد قال لي ما كفايه كدا في دور الضحيه دا ؟ قولته ليهو شنو ، دور ضحيه؟ قال لي ما ملتي ؟، زهجتي؟، اكتفيتي ؟، من اوفرت المواضيع والبكاء والنحيب ونظره شفقه الناس ليك؟ ختيت الورقه قولته ليهو اي كمل ما هي اصلا ناقصك ، امي تشاكلني هشام امس سمعني كلام ، نشوى بتقول كلام انتو ليه شايفين انو المريت بيهو هين وبنتسى عادي ليه شايفيني مكبره الموضوع قال لي ما قولته ان المريته بيهو ساهل لكن المريتي بيهو دا بدل يرفعك ويقويك بضعفك اي اختبار انتي بتمري بيهو قاعد ترسبي في بجداره وبشيل منك من طاقتك من قلبك من عقلك من كل شبر فيك بشيل واذا استمريتي بنفس الوتيره دي ! حا يشيل روحك كمان الناس اللي بتهرشك وانتي شايفه انهم ما حاسين بيك وزعلانه من كلامهم ديل عايزين يوصلو ليك معلومه واحده بس انك تقوي ما تضعفي انك تكملي وتكملي وانتي قويه يمكن ما قدرو يوصلها ليك بطريقه مناسبه بس اقلاها حاولو ولسه بحاول وما سايبنك براك ، تقدري تقول لي اذا فجأه الناس البطمن فيك وتشيل معاك دي فجاه يوم اختفو حا تعملي شنو وتصرفي كيف ؟؟ حا تقعدي تبكي وتلطمي وتختي مبررات ؟ اها بعد ما استسلمتي وقولتي خلاص دا قدري اني ابكي والطم وانعل اليوم الاتخلقته فيهو حا يحصل شنو ؟ تقدري تقول لي او تتوقعي لي رده فعلك لمن كل الحواليك يسيبوك ؟؟ وعفكرهالاحتمال دا ما بعيد حتى امك في يوم من الايام حا تمشي واذا ما مشت طبطبته حا تقل عارفه ليه ؟ عشان " خلق الانسان ملولا" الناس بتمل لمن تشوفك كل مره بتبكي و تشكي ولافه في نفس الدايره ، تشيل وتدفع وتلز عشان تكملي انت! في النهايه دي حياتك انتي ما حياتهم هم مسؤوله منها انتي ما الظروف ولا الاختبارات ولا اي شي بنمر بي ولمن تقيفي قدام المولى بعدين بسألك عن الحياة الاداك ليها عملته فيها شنو ؟،رغم انو هو الختى ليك كل العقبات دي في حياتك وشاف كل شي بعينو بس بسألك عشان انتي البتحددي حياتك دي تكون كيف ؟ تمشي ياتو اتجاه ؟ تعملي شنو ومتين دا بتحددي انتي ما اي زول تاني ولا اي سبب تاني لا خارجي ولا داخلي بحددو لو اتصرفتي قدام كل المر بيك بمسؤوليه وبطلتي حجج ولوم كنتي عشتي حياتك صااح وما كنت حا تقيفي كل مره في النقطه دي العتبه الانتي بتقيفي كل مره فيها دي عتبتة افكارك المصلباك في حته واحده وشاده عليك بكل قوه صنعتيها انتي لي نفسك قولته ليهو ادم انا ما اخترته شي كلو بجي ورا بعض قال لي دي مشكلتك انك ما قادره تتسوعبي انو حياتك دي مسؤليتك انتي كوني شجاعه واتحملي مسؤوليتها براك بالسمح والشين الفيها ومافي زول مدمر حياتك وخاربه ولا زول غيرك انتي ولا حتى عمر انتي هنا بسببك انتي قولته ليهو يعني في الاخر طلعته انا الشرير مش ؟ اي ما بتصنع البحصل دا كلو من راسي وبعيشو قال لي فعلا بس الغلط الوحيد القولتيهو انك بتصنعي البحصل انتي ما بتتصنعيهو انتي بتصرفي اتجاهو غلط ، بتعيشي بطريقه غلط ، انتي شايفه انو عمر هو شماعه اغلاطك ؟ الاختيار الغلط الانتي لهسي لايمه روحك عليهو ؟ الاختيار الغلط بورينا الصاح ، التجارب القاسيه بتعلمنا القوه ، المشاكل بتوسع مداركنا ونظرتنا للامور والحياه عامه بتعملنا يعني شنو نصبر يعني نعافر يعني ودا كلو بحصل لسبب واحد بس انك تعرفي نفسك ! تكتشفيها تعرفي نقاط ضعفك وقوتك ، تعرفي شنو البرفعك فوق وشنو البوقعك لسابع ارض ، تعرفي يعني تيسير !! انتي ما محتاجه فانوس او معجزه او الخزبعلات دي كلها انتي محتاجه تغيري دا " واشر على راسو " تغيري تفكيرك دا هو البكون كيانك كلو حاولي اتمردي على نفسك واخدي القرار الصعب الطريق الملان شوك لو عايزه فعلا ترتاحي وقلبك ما التعبان يا تيسير قلبك يمكن اقوى من قلبي انا المعافى انتي المتعبك وهادي حيلك تفكير .. عقلك دا ، قام على حيلو وتنى على تربيزه المكتب وعينو بقت عيوني قال لي بصوت هادي خليكي شجاعه مره واحده في حياتك شكلك وانتي جبانه بزعل شديد ، مشى اتجاه الباب وطلع فات اول مره في حياتي زول يقول عني جبانه ويواجهني بالكلام دا على قدر ما كلامو كان قاسي ويمكن ملان شتيمه بفوق بس على قدر ما هو صاح فعلا اسهل انا نفسي لوامه شديد وعلى طول خاته اعذار ولابسه دور الضحيه ، فضلته افكر في كلامو لغايه رجعته البيت بقيت بين نارين يا اتمرد على الشخصيه الضعيفه دي واكسر الحاجز زي ما قال ادم يا ابقى قاعده فيها وابقى ماشه في خط بدايتو زي نهايتو ، امي قالت لي نهايه الشهر العرس هشام حدد الموعد قولته ليها قرب فضل 18 يوم بنلحق ؟ قالت لي هو نحنا بنلحق لكن الكلام العروس قولته ليها طالما اتفقو يبقى دارسين وضعهم كويس قالت لي انا لازم امشي بدري عشان امي براها جايه معاي ولا تقعدي مع خالك قولته ليها امشي انتي انا بتصرف قالت لي براك وادنه ؟ قولته ليها ما تشيلي هم بتصرف وابدا ما حافرط فيها اتاكدي في حضانه في الشركه بختها عندهم بخلص شغلي بجي بسوقه ولمن يكون شغلي بسيط باخده معاي ما اشكال قالت لي الحضانه شنو ؟لااا بقعد قولته ليها امي ما خاتها فيها براي زميلاتي في الشغل كمان خاتين اطفالهم يعني معقوله اخت دانه بتي في مكان ما واثقه فيهو ؟؟ اطمني انتي قالت لي خير اصلا انا بمشي نهايه الاسبوع او السبت إن ربنا احينا في كلامنا جاء خاشي مصعب قال لينا خالي في ؟ قولته ليهو طلع من شويه امي قالت ليهو مصعب انت حا تمشب معانا عرس خالك صاح ؟ مصعب قال ليها ان شاءالله بس خايف من ردة فعل جدي وخوالي خايفهم ما يرضو امي قالت ليهو كيفن ما يرضو اجي ؟ كمان يفرحو بيك فرحه انت ما عارف قدر شنو هم مشتهين يشمو ريحتك مصعب بعد كلام امي ارتاح شويه امي قالت ليهو حلا بارد اجيب ليك منو ...
