امي قالت لحبوبه هسا انا لو مته ولا حصل لي حاجه البقيف على تيسير منو ؟! العمر مافي يدي وانا خايفه عليها شديد يمه من عرست ما شافت غير المشاكل والزعل وهي قلبه ضعيف ما بستحمل وانتي شايفه مفيده بتك وحركاته شايفاها بتعامل بتي كيف وقدر ما اتكلمته معاها قولته ليها ساويها مع بناتك وشرحته ليها وضع تيسير بتعمل العكس وتسمعه كلام في الطالعه والنازله هي ما حصل حكت لي لكن انا عارفه اختي كويس هسا هدا راجع كان في جيتو فايده بهدل بتي معاهو وقطع حشاي عليها اعمل شنو يا امي اعمل شنو ؟!
ما بقدر اقول ليهو طلقه و ما بقدر اقوليها ارجعي بيتك وصوني انا ما عارفه اتصرف كيف ولا عارف اقبل وين تلاته سنين يا امي جادعه وراميها في بيت اهلو مستخسر فيها السؤال المليم الاحمر ده ما رسلو ليها ولا صرفه الا خواله هم الواقفين عليها حتى لما تعبت شديد ما فكر حتي يسأل عنها ولو ما جدها وخواله وقفو على علاجه كان .. كان راحت من يدي يا امي ما بقدر اتكله عليهو ما بقدر ءامنو عليها بالي ما مرتاح نهائي لفكره ابوي بانو ترجع في نفس الوقت ما عايزها تتطلق في العمر ده ؟؟ هي لسه صغيره شديد وما عارفه حاجه للدنيا دي ، حبوبه قالت ليها معزه استغفري يا بتي كلو مترتب من رب كريم والخلقه ما ناسيها والله يعدل بينها وبين راجله قومي صلي ليك ركعتين وادعي الله يفرجه والله يطمنك عليها و ما تقولي كده نحنا كلنا معاها وده بيتها وبيت جدها مفتوح ليها في اي وقت وان ما شالته الارض بنشيله في راسنا ما تختي في بالك كفايه الهم الشلتي من فؤاد...
امي قاطعته قالت ليها ما تجيبي لي سيرتو ما تجيبي طاري حبوبه قالت ليها سمح قومي غسلي وشك واكلي ليكي حاجه ما تنومي جعانه ..
دموعي جات جاريه حسيت اني جايه على امي شديد رجعته غرفتي خشيت الحمام اتوضيت وجيت صليت لي ركعتين فضلته ادعي قريب الساعه بدعي ووببكي حسيت روحي ارتحته رقدته في السرير نمته ..
تاني يوم بعد الفطور لبسته عبايتي ومشيت لخالتي حمدلته ليها السلامه سلمت علي برسين اصابعه قالت لي ما تبقي عويره وتخربي بيتك بيدك كل النسوان بعرسو فيهم وانتي ما اول واحده يعرسو فيها ولدي بعد يجي بطلق ديك في النهايه انتي بت خالتو ومن لحمو ارجعي بيتك وما تعملي شوشره الناس كلها غير سيرتنا ما عندهم موضوع قولته ليها الله يقدم الفيو الخير جات نجلاء قالت لي تعالي ساعديني شويه ولدي ما راضي يسكت يخليني اشتغل قومته دخلته المطبخ كانت بتخلط في عصير مسكته السكينه عايزه اقطع البرتقاله قالت لي تيسير ما تزعلي مني والله ما بقصدي وانا من خوفي عليكي ما كلمتك وما عرفته اتصرف كيف ؟ اي غلطته ما بقول ليك ما غلطته غلطانه والله والغلط راكبني من ساسي لراسي لكن والله من خوفي عليكي خبيت سامحيني النبي ما تزعلي مني انتي اختي ومن قمنا سوا ما تزعلي مني ، قولته ليها يعني معترفه انك كنتي عارفه وانك غلطانه ؟ قالت لي اي وندمانه شديد قولته ليها دام كده خلاص سامحتك ما دام الزعل بينا قالت لي جد؟! قولته ليها اي حضنتني عليها قالت لي كنت عارفه قلبك طيب ♡ هترجعي تعيشي معانا صاح؟! قولته ليها لالا ما هرجع هنا تاني مالم اخوك يطلق التانيه ويتعذر لي قالت لي لزومو شنو الكلام ده يا تيسير؟! قولته ليها لزومو يا نجلاء ولازم شديد انتي ترضي راجلك يعمل فيك كده ؟! ترضي يعرس فيك بالطريقه دي ؟! ترضي يهملك تلاته سنه ما يسأل عنك ؟! سكتت ما ردت لي ،،
احمد جا خاشي سلم علي قال لي اشتقنا ما ناويه ترجعي؟! سكته ما رديت ليهو وغيرته الموضوع قولته ليهو اها كيف قرايتك خلصته امتحانات ولا لسه؟! قال لي يعني ما بطاله بنجازف غايتو اتونس معاي شويه استأذنته وطلعته بيتنا لاقتني ساره بت خالتي شايله ولده في الشارع زعلانه شكلها ماشه بيت جدي قولته ليها مالك قالت لي بحكي بعد نخش جوه..
خشينا جوه حبوبه اول ما شافته قالت ليها مالك يا بت وشك ما عاجبني ؟ قالت ليها مافي حاجه يا حبوبه قالت ليها مافي حاجه كيف يعني ووشك قالب ميه لون متشاكله مع نسابتك ؟! قالت ليها بصوت مخنوق لالا حبوبه قالت ليها مالك طيب؟! ساره بكت قالت ليها خالد يا حبوبه خالد بتهمني في شرفي قال لي انتي واحده خاينه وبتتكلمي مع اولاد وبتلعبي معاهم وشال مني التلفون وكسرو وضربني كف يا حبوبه عاشه ضربني ومد يدو علي وانا والله كنت بتكلم مع علي اخوي وقدر ما حلفته ليهو ابا يصدقني وسمعني كلام زي السم يتهمني انا ساره في شرفي ؟؟! حبوبه انتفضت قالت ليها كيييف يمد يدو عليكي ؟! كيف يقول كلام زي ده لواحده من بناتي انا اليله خالد ده ما بخليهو خلي يجي من الشغل وانا بدي كلام حار وبتسد ليكي علشان اهلك بعاد فاكرك براك ؟! ساره قالت ليها انا ما راجعه ليهو تاني ويطلقني لا قاعد يشتغل ولا بصرف علينا ومصرفني ابوي وهو ولا شغلتو كل ما يمسك شغل يفكو انا تعبته عديل معاهو تعبته حبوبه قالت ليها طلاق شنو الانتو واقعين فيو ده يا بنات؟! هووي يا ساره انتي ولدك في يدك تقولي طلاق؟! ان كان على مشكلتك دي بنجيبو ونعقلو وان كان على الشغل نلزمو بشغل وجدك بقعد معاهو هو كبير وهيسمع كلامو من يومو خالد متخلف ومخو ملان وسخ ورمتالي بعد يجي بعرف انضف ليهو راسو ده كيف الحصل ليكم شنو يابنات عبدالعال عين وصابتكم بس غايتو حبوبه قالت ليها اديني الولد ده كدي كلمتك امك ؟! قالت ليها لالا ما حكيت ليها قالت ليها احسن والكلام ده ما توصلي لبيتكم سامعه ولا ما سامعه ؟؟ المشكله دي حدها بيني وبينك هنا ده اما حكايه الشغل ابوكي عبدالعال بتصرف فيها واياك تمشي تحكي لي انو اتهمك او دقاك سامعه ؟! ساره قالت ليها سامعه ..
قالت ليها تشيلي ولدك ده وتمشي بيتك تقعدي لغايه ما خالد يجي بجي الساعه كم هو ؟! قالت ليها هو عندو زمن محدد زي الخلق والناس حبوبه قالت ليها بعد يجي رسل لي اي شافع انا بجيك بتفاهم معاهو وقومي امشي بيتك ساره قالت ليها بعد الكلام السمعني ليهو ده انا ما ماشه الا يجي هنا ويعتذر لي حبوبه قالت ليها ساره قولته ليك امشي بيتك وما تجادليني كتير ساره شالت ولدها ومشت وهي ما راضيه ...
العصر حبوبه لفحت توبه قالت لامي ماشه هنا ساره وجايه امي قالت ليها ماله عافيه ؟! قالت ليها بحكي ليكي بعد اجي قولته ليها خليني امشي معاك ما عندي حاجه غير عبايتي بس بلبسه وبلحقك
امي قالت لينا و مخلني براي زي الاطرش في الزفه فهموني حاجه ؟! حبوبه قالت ليها مافي حاجه نقاشات بينه وبين راجله ماشه اعقله بس الله كاتب لينا الشقاوه في الدنيا نلدوكن ونربو بناتكن امي ضحكت قالت ليها حال النسوان عاد حبوبه قالت ليها والله النسوان ديل يموتن هم سااي ،،شلته تلفوني وقفته لينا ركشه ركبنا ومشينا لينا ساره ...
لقينا خالد قاعد حبوبه سلمت عليهو وسالتو من احوالو اشرت لي بعيونه بمعني قومي خشي جوه وسوقي معاك الولد سوقته هيما خشيت بيو جوه ..
حبوبه حكت لخالد الكلام القالتو ليها ساره قالت ليهو الكلام ده صحي يا خالد ؟! خالد قال ليها صاح قالت ليهو وانت عندك مبرر للعملتو ده ؟! قال ليها يا حبوبه عاشه ساره دي قعاد ما بتقعد معاي طول الوقت ماسكه التلفون وقاعده وكم مره بلقاها بتتكلم ب التلفون ولمن تشوفني بتفصل الخط ولا مره ولا مرتين بلقى رساله من رقم غريب نطت ساره قالت ليهو ديل صحباتي بتونس معاهن قال ليها صحبتك بتقول ليك حياتي ؟! قالت ليهو عادي لو داير هسي بتصل ليك ليها وشالت تلفونها فتحتو حبوبه قالت ليهم لا انتي بتتصلي ولا انت ده مبرر ليك نحنا بناتنا ديل مربيات ولو الغلط والعيبه فيها هي زي ما قولته ما مهتمه بيك فامسحه لي في وشي ده انا عاشه دي هي غلطانه من الناحيه دي ما بدافع ليك عنها لكن كونو هي قاعده طول الوقت ماسكه التلفون ده ما معناهو انو بتتكلم مع اولاد وجيل الزمن دا جت بقى شغلو الشاغل التلفون اااها انت حصل قبضتها عديل بتتكلم مع ولد ؟! خالد قال ليها لالا قالت ليهو اهاا عادي العيبه فيك ياولدي انت ما تتهمه في شرفه التهمه على المره حاره ودي مرتك عاد البجيبها بجيك يعني لو قبيل في واحده سمعت الكلام ووصلتو بره الببت ولا شافتك بتضربه وانت ساكن حوش واحد مع اهلك بقولو شنو؟! خالد كعب وبدق مرتو صاح؟! قال ليها اي قالت ليهو يبقي الغلط البشوه السمعه ما حبابو والدق عمرو ما حل قضيه وخلاف وانتو في بينكم شافع ولا قلته شنو ؟! قال ليها صاح كلامك يا حبوبه قالت ليهو يبقي يا ولدي تاخد مرتك تحت جناحك واساس البيت ياهم المره والراجل ما تخلو المشاكل الصغيره دي تعمل حواجز بيناتكم وتفاغم فانتي يا ساره غلطتي واهملتي راجلك وانت ياخالد كمان مد اليد ما حبابو وانتو الاتنين غلطانين في حق بعض تتصالحو قدامي هسا دي والغيبنه دي ما يطلع عليها صباح ،، ساره قالت ليها بس يا حبوبه قالت ليها ساره قولته شنو انا ؟! قالت ليهو اعفي لي قال ليها وانتي كمان اعفي بعد اتصالحو حبوبه بقت تتكلم معاهو في موضوع الشغل وما الشغل بعد خلصت قالت ليها اها قومنا ياتيسير قولته ليها اي ساره قالت لي بكره تعاليني بعد الفطور عازماك قهوه قولته ليها بشوف الله يسهل ..
