الافكار توديني وتجيبني الضيوف مشو وضايرو البيت خشيت النت اعرف اعراض الحمل جابين لي دوخه وغيرو واغلبيته بحصل لي نتيجه اعراض القلب لمن ازعل امي جات قعدت جنبي عاينت لي مسااافه ختيت التلفون قولته ليها في شنو ؟! قالت لي اخر مره الدوره جاتك متين ؟ قولته ليها امي انتي خلاص صدقتي كلام المره دي ؟! قالت لي سالتك ردي قدر السؤال سكته مسافه صغيره قولته ليها ليها ما متذكره بالضبط بس طولت قالت لي كيف يعني ما متذكره ؟ دي حاجه بنسوها ؟ قولته ليها مع المشاكل ما وعيت ليها بس حكايه اربعه شهور كدا قالت لي يبقى حااامل والمره كلام صاح قولته ليها امي انتي عارفه التوتر بخليها ما تجي وانتي شوفتي الفتره الفاتت انا مرقته بشنو قاطعتني قالت لي انا مش قولته ليك ما تدي فرصه فيك ؟ كلمتك قولته ليك ابلعي واعملي حسابك ولالا ؟ قولته ليها امي انا كنت ببلع الحبوب بس هو اكتشف اني ببلعوهم وشاكلني قالت لي تعملي فيها انك سمعتي الكلام وتبلعيهم بالدس انا كلمتك من هنا قولته ليك عمر دا ما جاي زول طلاق ولا زول عدل جاي عشان يرضي اهلو ويسكت الناس ويرجع وهدا شوفتي بعينك والمره دي الله اعلم يجي راجع وهدا الخايفه منو حصل خلاك حامل وبدل ما جادعك براك تبقي انتي والفي بطنك وشوفي تاني كان قدرتي تتطلقي منو من غير شافع كان ساهل بس هسي صعب حبوبه قاطعته قالت ليها بتهدي بتك على الطلاق؟ دايره تخربي ليها بيتها يا معزه ؟ امي قالت ليها وينو بيتها دا وينو يمه ؟! شايفه ليها بيت ؟ وين راجله سيد البيت ؟ حبوبه قالت ليها معزه انا ماعارفاك في اخر فتره بقيتي تصرفي كدا مالك لكن البتعملي في بتك ما خير امي قالت ليها بعمل فيها شنو اني خايفه عليها ؟ الجدعه تلاته سنين بجدعه باقي عمره وانا مستحيل ارضى انو بتي الوحيده تقضي بقيه عمره مدلدله لا عارفه روحه معرسه ولا مطلقه وهدا جابت ليها منو جنى وهو مع ديك وفي بلد تانيه يعني الكنت خايفه منو وبحكي ليك كل يوم يا امي حصل حبوبه قالت ليها يمكن الفي بطنه يبقى ليها خير ويرجعو قالت ليها يمه الما رجعو مرض ابوهو وامو البكو فيهم الناس ما برجعو جنى ماشافو بعينو حبوبه قالت ليها خلي الزمن ياخد مجراه بكره برجع لمرتو مافي داعي للطلاق وتملي للبت راسه بكره راجله يرجع ويربو ولدهم سوا الطلاق ما حبابو هوي يا بت ما تسمعي كلام امك دي بكره راجلك اول ما يعرف انك حامل بجي جاري الضنا زيو مافي ، امي عاينت ليها مسافه قالت ليها انا في وانتي وعمر ما راجع تاني كان حملت ولا ما حملت وتشوف عينك ومن هسي قولته ليك ولابوي القاعد برا دا بسمعه ليهو لو ما جاء راجع واتعدل يسلمني ورقه بتي واليحصل يحصل وطلعت ..
حبوبه قالت لي امك منفعله هسي بكرا بتهدا ما تركزي معاها كتير الا قولي لي انتي حامل ليكي كم ومالك ما اتكلمتي ؟؟ قولته ليها حتى انتي يا حبوبه ، قالت لي كلمتيهو ؟! قولته ليها انا لهسي ما متاكده اكون كلمتو كيف ؟! قالت لي بسيطه بكره تمشي تفحصي عند الدكتور وتعرفي ان شاءالله يكون ولد علشان يجيبو راجع سكته منهاا ما رديت ليها واطبحته في رجوله قولته ليها حبوبه هو صاح ممكن ما يرجع ؟ حبوبه قالت لي ما تخلي كلام امك ياثر فيك بكره بس يعرف انك حامل برجع انتي كلميهو ...
بيني وبين نفسي ما عايزه يرجع اي انا ما عارفه رده فعلو شنو عن حملي بس اذا جاء حاشوف النجوم في عز الضهر تاني وفي نفس الوقت ما عايزه ولدي يربي بدون اب فضلته افكر لغايه صدعته من التفكير ونومته ،، صحيت على صوت امي قالت لي قومي استحمي طالعين قولته ليها وين من الصباح كدا ؟ قالت لي حا نمشي نفحص ونشوف نهايه حملك دا قولته ليها الوقت بدري خلي الواطه تصبح قالت لي الساعه 9 المعامل بتكون فتحت قومي اتلحلحي قومته استوكته واستحميت وجيت شربته الشاي امي جات لقتني ممططه رجليني وبشرب في الشاي قالت لي انتي لهسي بتلكلكي ؟؟ حبوبه قالت ليها معزه ما فضل ليك الا تكري البت خليها تاكل حاجه تلم عضمه المعمل جاري ؟ بسم الله امي قالت ليها يمه عليك الله انا صاحيه وراسي لافي من التفكير الكتير اليل كلو ما نمته قومي خلينا نتاكد ان شاءالله يطلع كضب جدي قال لينا شنو هو اليطلع كضب ؟ وماشين وين من الصباح ؟؟ جاء قعد جنبي امي قالت ليهو عندنا مشوار انا وتيسير ماشين هنا قريب قال ليها مشوارك دا من 9 قالت ليهو ابوي 9 دا وقت الفطور عديل عاينت لي واشرت لي قومي مشيت لبسته لي عبايه وجيت مارقه جدي قال لينا استنو فرح يجي يوصلكم هو جاي يسوقني ونوصلكم و في طريقنا مشواركم دا امي قالت ليهو لالا نحنا طؤيقنا بختلف ارح يا تيسير ومسكتني من يدي وجرتني جدي قال ليها امشي براحه وقعتي البت على وشها ،عاشه بتك دي ماله اليله ؟ حبوبه قالت ليهو بري ما خابراها ماله ..
مشينا المعمل امي قالت ليها لو سمحتي عايزين نعمل فحص حمل الدكتوره ورتني التحاليل المطلوب مني عملتهم قالت لي استني نص ساعه وبطلع الفحص امي قالت ليها ونص ساعه ليه ما كتيره ؟ الدكتوره قالت ليها بالعكس زايد في ناس قبليك وزحمه فهمتي علي قولته ليها اي فهمنا عليك جريت امي قولته ليها امي ما كدا لكن ،،بعد نص ساعه النتيجه طلعت قالت لينا الف مبروك النتيجه ايجابيه يتربي في عزك انتي بكريه شكلك ؟! قولته ليها اي اول مره بس تحليلكم دا دقيق ؟! ضحكت قالت لي اكيد طبعا امشي فرحي زوجك امي قالت ليها تفرحو كدي التلم فيهو الاول شلته النتيجه قولته ليها شكرا حافرحو ان شاءالله قالت لي بمانك اول مره ممكن اوصف ليك كذا دكتور يفيدوك الشارع الورانا دا فيهو دكتوره اسمها "..." شاطره بتقدري تتابعي معاها ورشحة لي كذا دكتور قولته ليها تسلمي امي طول الطريق متوتره وبتمتم اكتر مني وانا كنت خايفه شديد بالمعنى الحرفي لكلمه خوف وابدا ما مبسوطه بحملي واتمنيت لو اني سمعته كلام امي وبعلته الحبوب بالدس وصلنا البيت انا دخلته الغرفه طوالي وقعدته ابكي امي قعدت مع حبوبه برا ، اتصلته لي نشوى حكيت ليها قالت لي انتي هبله يا بت ؟؟ في واحده بتحمل بتبكي ؟؟ في زول بيابا الاطفال ؟؟ قولته ليها نشوى انتي اذا مستوعبه حجم المصيبه الانا فيها كلميني بقول ليك انا حامل وراجلي طافش انتي فاهمه ؟؟ قالت لي عارفه انو طافش بس الاطفال نعمه في الف واحده نفسها في المابياهو دا وممكن يكون البيبي دا جايب معاهو خير ويرجع ابوهو ليك افرحي واحمدي الله وما ترفسي النعمه الجاتك قولته ليها نعمه جات في وقت غلط قالت لي ما انتي بتحددي اذا دا وقته ولالا طالما الله رزقك بالبيبي دا هسا معناها جاء في وقتو ولخير قولته ليها انا خايفه،خايفه شديد يا نشوى قالت لي استغفري وصلي ليك ركعتين وبتتسهل كلو لخير انا عندي محاضره مضطره افصل بخلص وبغشاك زابط ؟ قولته ليها تمام فصلته منها وفضلته افكر نفسي قام حاولته استرخي كل تفكيري كان بتمحور في اني اكلم عمر كيف ؟ عايزه وما عايزه يعرف خايفه شديد من بكرا ما عارفه راجيني شنو ومن جواي احساس بقول مستحيل عمر يرجع امي جات لقتني بتكلم مع نفسي قالت لي جنيتي ؟؟ قولته ليها ما فضل لي شي قفلت الباب وقعدت جنبي قالت لي جدك عرف انك حامل قولته ليها ليه كلمتي ؟ قالت لي ما كلمتو انا كلمتو حبوبتك وكدا كدا كان هيعرف دا ما حاجه بتتخبى مصيرو يعرف سكته منها قالت لي جعانه اجيب ليك شي تاكلي ؟ قولته ليها لالا قالت لي انا حجزته عند دكتور حايودينا خالك خايفه الحمل يتعبك مع القلب قولته من بدري احسن قومي صلي العشاء وخلينا نطلع عشان نجي بدري قولته ليها امي انا خايفه قالت لي ما تخافي مافي شي بخوف انتي عشان اول مره بس دي حاجه طبيعيه صاح حا تتعبي شويه بس مراحلو حلوة حاتسي بحاجه جواك شويه شويه حا تكبر شويه تانيه حاتبدي تحسي بحركاتو في بطنك وتحسي انك اتنين ما واحد لغايه ما تولدي وتشوفي قدامك واول ما تسمعي صوتو وهو ببكي الوجع كلووو بروح الاطفال حاجه حلوه بشيلو الهم بمجرد ما تعايني ليهم قولته ليها مع انك ما والده غيري بس شكلك انبسطتي بي شديد قالت لي ما تنسي انو عندك اخو كبير بس ما شبعته منو 💔 مسكته يدها قولته ليها اسفه بس عشان هو ما معانا دايما بفكر انك امي براي ضحكت قالت لي انتي دنيتي كلها يا تيسير ما بتصور في يوم تختفي زي ما اختفى اخوك واتحرم منك زيو ما بتتخيلي قدر شنو بتعب لمن اشوفك شايله هموم انتي ما قدره بتعب شديد قولته ليها امي ما تقولي كدا انا مبسوطه ما شايله هم وعايشه هدا قالت لي انتي بتسمي عيشتك دي عيشه من اول يوم شلتك فيهو بيديني وانتي ملفوفه في قطعه قماش وانا شايله هم اليوم الحاتلبسي فيهو الفستان والحايلبسك الفستان دايما كنت بفكر اذا حاشيلك ويعوضك فجوه ابوك ولالا دايما كنت بدعي بس دعاي ما استجاب استغفرالله العظيم يارب وقعدت تبكي ضميته قولته ليها يعني جايه تخففي عني تقومي تبكي ؟؟ امي كلو لخير واكيد لحكمه مش انتي بتقولي كدا ؟ قالت لي ما بيدي بس والله البحصل معاك دا حرام وما هاين علي كل ما اشوفك ما القى غير الهم نفسي اعاين ليك مره بس والقاك مبسوطه مع راجلك ذي بقيه البنات ياريتك سمعتي كلامي وما عرستي يا ريتك ما عرستي يا تيسير دموعي جات جاريه مع كلامه قشيت ليها دموعه قولته ليها امي كفايه بكاء عليك الله اذا انتي ما راضيه لي الهم انا كمان ما راضيه ليك البكاء والزعل ضمتني عليها قالت لي جاينا بيبي صغير ما حابكي عشان ما يقول حبوبتي دي نكديه وضحكت ضحكته معاها قولته ليها امي انتي مصعب اخوي ليه راجلك شالو منك ؟ قالت لي ابوك اسمو ابوك شنو راجلك دي؟ يا ستي انا وابوك اختلفنا ووقته كنت يدوب والده بيك تميتي 6شهور وقال حياخد واحد من الاولاد فانا بالمحكمه والتحنيس خليتك معاي عشان صغيره وعشان بت ما حاينتبه ليك زي ما انا بنتبه ليك " شالت نفس وعاينت بعيد" واضطريت اديهو مصعب ولدي الكبير ، عارفه انو بشبهك عندي ليهو صوره دقيقه اجيبه ليك مشت طلعت صندوق طلعت منو صوره جابته لي قالت لي دا هو هنا عمرو كان 3 سنين صغير شديد كان بحبك ومنك ما بزح في الاول كان بغير منك شديد ولو خليتو معاك بجي بلقاهو ختى فوق ليك المخده ويضربك عشان كدا ما كنا بنخليك جنبو نهااائي بس شويه شويه بقى بشاغلك ويلاعبك خاصه بعد تميت شهرين بقى اغلبيه الوقت بقعد بلاعب فيك كان بجيب ليك شكولاته كان فاكر انك بتاكلي فباكله انا وبقوليهو بديها ليك عن طريق اللبن كان بضحك يقول لي انا عايز كمان حليب بشكولاته كنت بمشي بعمل ليهو كبايه وبكون مبسوط كنت بحبو شديد بس الله عوضني بيك انتي بتي الحلوة باست راسي حبوبه جات قالت لينا اجي مالكن يا بنات بتبكن في شنو ؟؟ تيسير ما يكون في حاجه مخبايها عني ؟؟ ضحكته قولته ليها حا اخبي عنك شنو يا حبوبه امي كان بتحكي لي عن مصعب اخوي بس وبكينا سكتت مسافه قالت لي يا حليلو شالت الصوره من امي قالت ليها دي لمن مشى معاكم مدني واتصورتو هناك مش ؟؟ قالت ليها صاح وقعد يبكي ويتعاور بالعافيه عشان رضي يصورو شوفي زعلان كيف 😂
قولته ليها امي هو وين هسي وليه ما بتقدري تشوفي ؟ قالت لي ما عندي فكره وين هم بس البعرفو انو ابوك عرس مره تانيه وسمعته من الناس انها طيبه بس تاني ما بعرف عنو شي وما بقدر اعرف قولته ليها ليه ؟؟ قالت لي شرط ابوك عشان يديني ليك كان انو ما اشوف مصعب ولا احاول اني اعرف شي عنو قولته ليها والمحكمه كان رايه شنو ؟؟ قالت لي الكلام دا بره المحكمه وجدك عبدالعال اداهو كلمه اني ما اشوفو ولو حصل وحاولته وسمع خبر اني بفتش لي مصعب حا ياخدك مني قولته ليها قدر شنو هو قاسي كويس اني ما عرفتو انا بكرهو شديد بتمنى ما اشوفو بحياتي حبوبه قالت لي لا ما تقولي كدا دا ابوك قولته ليها انتي مقتنعه بالبتقولي فيهو دا ؟؟ في اب بحرم ولدو من امو وما بسال من بتو التانيه ؟ امي قالت لي تيسير انتي حامل هسي ما تفكري في الحاجات دي ما تنسي انتي كمان جايك ببيبي وما صاح تقولي عن ابوك الكلام دا قولته ليها دا ما بمنع اني بكرهو يا امي انا قايمه اجهز شويه وبجي راجعه ...
خشيت الحمام سمعته حبوبه قالت ليها قولتي ليها حاجات كعبه عنو كنتي تقولي الكويس كدا حا تكره ابوها اكتر وافكاره تودي وتجيب قلبه حا يتعب امي قالت ليها صاح انا ما انتبهته وبقيت بتكلم عنو المره الجايه حا اعمل حسابي والحاجات الكعبه عنو ما حاجيب سيرته انا خايفه يكون قدره زي قدري حبوبه قالت ليها معزه اي زول قدرو براهو قالت ليها يمه ما تقولي انك ما انتبهتي انو لغايه اللحظه تيسير وانا بنتشبه شديد بس الفرق انو هي عرست برضاها وانا عرستو جبر حبوبه قالت ليها اسكتي هسا تطلع تسمعك وتجي تسالك وانتي عارفه تيسير لمن تشك في شي ما حا توقف سؤال عنو وما اعيد ليك انو بتك عندها قلب كفايه العرفتو لغايه هسي اذا عرفت القصه كامله حا تتعب شديد ...
#محبات 🚶💙
