كنت خايفه شديد بس وجود اخواني وادم جنبي طمني زمان صاح ضاهري كان مسنود على جدي وخوالي بس احساس الاخو مختلف ، جسمي برد مصعب كان ماسك يدي ضغط عليها بقوه قال لي انا معاك ما تخافي ما عايزك تخافي ابدا واثقه فيني ؟ هزيت ليهو راسي قولته ليهم عايزه اتصل لامي اطمن بس ما حا ارجع محمد قال لي اذا احتجتي لاي شي ما تنسي اني اخوك ودايما حا اكون معاك تمام ؟ هزيت ليهو راسي طلع مشى وانا رجعته المكتب اتصلته لامي اطمن عليهم وحكيت ليها الحصل قولته ليها اعملي حسابك منو واذا حصل اي شي اتصلي لي انا بخلص وبرجع على طول اميقالت لي ما تشيلي هم خلصي شغلك وتجي تلقيني مستنينك قولته ليها عايزه اسمع صوت دانا ارفعي ليها الاسبيكر فتحتو اتكلمت معاها وشاغلتها دموعي جات جاريه فصلته منهم و شغلته نفسي بالشغل عشان ما افكر في اشياء سلبيه واخاف ما وقت اني اتعب خالص في لحظه عمر ممكن ياخده مني ، ادم دق الباب اصلا كان مفتوح ودخل لقاني برسم قال لي محتاجه شي ؟ قولته ليهو لا تسلم قال لي بترسمي ؟ قولته ليهو بحاول اشغل نفسي عشان عقلي ما يمشي بعيد وابتسمته ليهو خفيف قال لي طب كويس، عشره دقايق وحا نخش اجتماع بتقدري تخشي ؟ قولته ليهو اكيد شويه واكون معاكم هز لي راسو ومشى ،، في فايل كنت براجع فيهو من يوم حادث حريق المشغل شلتو قولته يمكن احتاجتو وشلته دفتر ملاحظتي ودخلته الاجتماع ، ابو ادم او بالاصح المدير كان كلامو ايجابي جدا كأنو ما دا الامس الكان جايط في ادم ...؟!!! المدير قال لينا اي واحد عندو خطه او فكره في راسو مهما كانت تافه ما يستصغره نحنا حا نديها كل اهتمامنا المجال مفتوح للكل نحنا في فتره حرجه بس حا تعدي اذا اتكاتفنا فطالب منكم نكون يد واحده اتفضلو سمعوني اقتراحاتكم ، وش ادم بعد الكلام دا تحديدآ اتغير كنت حاسهو مشتت ، ضايع ولقى طريقو كان طول الوقت هادي وساكت ، الكل بدا يبدا رايو واحد وراء التاني المدير كان مع كل اقتراح بطرح اسئله على صاحب الاقتراح وكان بسجل في الاقتراحات في ورقه ومهتم شديد بعد مسااافه رفعته يدي كنت متوتره شديد المدير قال لي اتفضلي يا تيسير قولته ليهو كان في دراسه على مشروع قديم عملته ليها تعديلات بسيطه اذا بتسمح لي المدير قال لي اتفضلي شنو المشروع قولي فكرتك قولته ليهو بتوتر وكلام متقطع المشروع اساسا كان عن ...ادم قاطعني قال لي ارفعي صوتك ما سامعين ، زيدته صوتي قولته ليهو الفكره الاساسيه للمشروع هي انو نعمل استايلات مريحه وفي نفس الوقت عصريه ال worke's mom ( الامهات العاملات)،، لان المره بس تبقى ام حياته بتتغير خصوصي لو كانت عامله فبتهمل روحه وبتفقد شغفه بالملابس واغلبيه استايله بكون عبايات عشان مريحه خصوصي في فتره الرضاعه فببقى صعب عليها توازن بين احتياجاته الشخصيه واولاده ...سكته لقيت المدير مركز معاي شديد قال لي كملي .. قولته ليهو دي الفكره الاساسيه بس انا ضفته ليها بعض التعديلات بحيث انو الاستلايات تكون للام والطفل وبكدا بنكون ضربنا عصفورين بحجر عملته كذا Design " تصميم " مبدئيا يعني مديت ليهو الفايل قولته ليهو هنا الفكره والاساسيه والتعديل وبعض الملاحظات قال لي طيب والتصاميم قولته ليهو حا اشتغل عليها انا عندي تصميمين بس عشان ما كنت عارفه موضوع الاجتماع ما جبتهم بس هم في المكتب المدير قال لي كدي جيبهم مشيت جبتهم وجيت مديتهم ليهو قولته ليهو بس في جزو من التعديل عاين لي نظام سامعك قولته ليهو بخصوص اطفال الشوارع يعني حا يعالج تلاته فئات الام والطفل زايد طفل البرد زي ما شايف كعب شديد فاذا بنخلي المشروع استثماري وخيري في نفس الوقت انا شايفه انو حا يكون فكره جميله وحا تخلي ناس كتيره تساعدنا وتمول لينا المدير قال لي فكرتك جميله بس نحنا ما عندنا راس مال لدا كلو .! ادم قاطعني قال ليهو ما عندنا راس مال لكن المهم هنا اليد العامله ما القروش صاح ؟ المدير قال ليهو كيف دي ؟ ادم قال ليهو تيسير قصدها " بخيري" انو حت يكون في متبرعين كتير من الجمعيات الخيريه حا تدعم مشروع كسوة مشرد على مستواي الشخصي انا حبيت الفكره وحا اعرضه على اصحابي ومتاكد انهم حا يوافقو يتبرعو سواء مادي او فعلي او معنوي و.... سكت مسافه قال ليهو وما بس كدا عاين لمصعب قال ليهو مصعب مذكر دار الايتام المشينا ليهو مع جمعيه كسوة يتيم ايام كنا في الجامعه ؟ مصعب قال ليهو متذكر اي مالو ادم قال ليهو مدير الميتم وقته كان قال انو نفس يحصل حاجه زي دي ما اعتقد يرفض انا متواصل مع صاحب جميعه كسوة يتيم اعتقد حا يرحب بالفكره قولته ليهو وانا بعرف بنات كتار نفسهم يحصلو على فرصه لانهم يبرزو في موضوع الخياطه حا اطرح الموضوع في قروبات البنات متاكده بنات كتار حا يتبرعو يتعاونو معانا كذا شخص وافق مع مشروعي دا وابدا رايو فيهو المدير قال لينا طيب طالما دا اكتر اقتراح حاز على اصوات فانا كمان موافق بس انتو شدو حيلكم واعملو والتقارير القاها الخميس الجاي يعني قدامكم اسبوع
