تاني يوم العصر جانا خبر وصول عمر ما كنت حاسه بفرحه ولا زعل كنت عاديه شديد امي جات لقتني برسل في رسومات لخالي هشام قالت لي تيسير قولته ليها نعم يا امي سكتت مسافه قولته ليها خير مالك ؟! قالت لي عمر ده قالو جا قولته ليها وانا بتصفح في تلفوني اها كويس قالت لي مالك ما فرحانه ؟! قولته ليها وافرح ليه ؟! قالت لي جا خلاص وحيطلق ديك و..قاطعتها قولته امي بعد يطلقه نتفاهم وعموما مافارق معاي شي انا ،طلعت وقفلت الباب وراها شلته نفس عمييييق حسيت بطعنه في قلبي عندي مسكن مشيت بلعتو خالي هشام اتصل لي قال لي كيفنا ؟! قولته ليهو الحمدلله قال لي عايزك قويه ما تضعفي وشروطك ما تتنازلي عنها اتفقنا ؟! قولته ليهو ان شاءالله فضل اتونس ويتظارف معاي شويه وفصل ،،
مما جا تم اسبوع طواال الاسبوع ده من بيتهم ما طلع ؟؟! ولا حتى رفع السماعه اتصل لي اتوجعته وزعلته شديد من حركتو دي يعني حتى بعد ما جاء غالبو يقطع مسافه عشره واحده يجي يسلم علي ؟! وهو عارف اني زعلانه ؟ حسيت اني هاااينه عليهو شديد اني ما بعني ليهو ولا مشتاق لي ولا بفرق معاه اساسا ،بليل سمعته امي بتتكلم مع ابوي عبدالعال قالت ليهو هدا تمى اسبوع ما سال من تيسير جدي قال ليها ما عندو عين يلاقيني بيها علشان كده خايف انو يجي هنا وعارفني بهرشو ما قادر يخت عينو في عين اي راجل فينا خلي ياخد وقتو ونشوف نهايتو شنو حبوبه عاشه قالت ليهو تصرفاتو دي ما تصرفات زول جاي يعدل ميلتو جدي قال ليها عاشه ما تستعجلي نشوف نهايتو وين ومش بقا هنا ؟ انا في وهو وفي ونشوفو صعلقتو الكان بسويها في بلاد برا دي حيبرره كيف انا من زمان عارفو ما زول مسؤوليه ولا حمل بتكل علي لكن يمين بالله ما اتعدل الا عصايتي دي تهبشو ..
بعد شهر تماما حتى فكر يجينا وجانا يوم جمعه بعد الصلاه جدي عبدالعال سلم عليهو وفضلو في الديوان امي طبعا لمن جا ما مشت نهاائي سلمت عليهو مشت حبوبه بس جدي جاء خاشي لقاني في المطبخ انا وامي قال لامي اتصلي لفرح اخوكي خلي يجي وخلي يكلم عبدالإله معاهو امي قالت ليهو عبدالإله ده سافر امس الخرطوم في بضاعه يجيبها قال ليها امممم تيسير اتصلي لجدك محجوب هاك طلعي لي اسمو من هنا واديني التلفون شلته التلفون عملته اتصال لجدي محجوب واديتو ليهو اتكلم معاهو شويه وفصل الخط قال لينا طلع جاي في الشارع سلفا جهزو الغدا وما تختو الا اجي اكلمكم امي قالت ليهو كويس مشى الديوان بيقادي امي قالت لي الله يستر جدك شايل في قلبو شديد قولته ليها باين عليه في وشو حبوبه قالت لينا اها يا بنات جهزتن شنو ؟! امي قالت ليها فراخ وعصيده بتقليه و سلطه وكذه حاجه تانيه بكفو حبوبه قالت ليها سويتي ورق عنب ؟! امي قالت ليها لالا حبوبه قالت لي تيسير بتعرفي تظبطي خالك فرح بحبو سوي ليهو قولته ليها حاضر بدينا نجهز في الاكل بعد ربع ساعه سمعنا صوت عربيه خالي فرح وقفت بره حبوبه قالت لي الديوان اتملا رجال ودو ليهم الشاي قولته ليها جدي قال ما يعملو شي قالت لي خلاص جهزو عصير والشاي خلو بعد الغداء جهزنا العصير جا خالي فرح قال لي زيدي الكبابي تلاته حبوبه قالت ليهو اصلو كم انتو ؟! قال ليها عمر جا معاهو ابو وعمو وود عمو وانا وابوي وعم محجوب وعم الصادق قالت ليهو عمك الصادق جاء ؟! قال ليها اي واصر يحضر النقاش قالت ليهو كويس شال الصينيه ومشى ...
