في كلامنا مصعب دقا الباب قال لينا ممكن اخش ؟ قولته ليهو لا ما ممكن خالي قال ليهو اتفضل يا مصعب استغربته من خالي شديد قولته ليهو يخش الغرفه ؟؟ هشام قال لي تيسير اهدي عاينته ليهو باستغراب وفي طرحه جنبي لفحتها بسرعه مصعب خشى عاين لي لقاني ببكي قال لي ما اكون السبب بس ؟ خالي قال ليهو وهو بعاين لي لالا تيسير كويسه بس شافت كابوس وصحت مرعوبه انتي اتسوكي وغسلي وشك وتعالي افطري معانا نحنا مستنينك يلا .. دخلته اتسوكته وانا كلي استغراب طلعته لقيت مصعب قعد يتلفت في الغرفه يمين وشمال و امي بتعاين ليهو بطريقه غريبه قولته ليهم هو انا ليه حاسه انكم مخبين عني شي ؟ هشام قال لي وحا نحكيهو قولته ليهو شي بخص مصعب مثلا؟ امي قالت لي تعالي افطري بعد داك نقعد هو شي حلو ما تخافي مصعب شال دانه وبلعب معاها مشيت معاهم من سكااات وامي كانت بتبحلق في مصعب وتتبسسم محل ما عينه تقع في عينو الاكل ابا يتبلع لي نهائي عاينته لمصعب ولامي لاحظته ان في بينهم شبه وامي بتعاين ليهو والجو مكهرب وكلهم ساكتين رفعته يدي من الاكل وبقيت مبلحقه في مصعب قولته ليهو انت مصعب اخوي ؟؟ مصعب اتخلع وبقى بين عايز يرد وزعلان وفرحان ومتوتر امي سكتت وخالي سكت قولته ليهو انت مصعب اخوي صاح ؟ دخل الحمام غسل يدو وجاء قولته ليهم دا مصعب اخوي ؟؟ خالي هشام كان متوتر شديد من رد فعلي مصعب قال لي اول شي اهدي تمام انا كنت عايز اشرح ليك امس بس انتي فهمتيني غلط ختيت يديني في خشمي ودموعي جات جاريه بقيت واقفه مكاني ما قادره اتحرك ولا خطوه قولته ليهو اربعه شهور انت كنت قدامي وانا ما عارفاك ؟ خالي قال لي تيسير ما تنفعلي عشان قلبك تمام امي قالت لي تيسير انا عارفه الموضوع كبير وصعب عليك بس انتي اهدي قولته ليهم شنو الصعب شنو الصعب ؟؟ انا من اول ما شوفتو حسيت انو في شي بينا حسيتك اخوي بذات امس انا ما صدقه اني شوفتك ما مصدقه اني شايفاك انا... لساني اتربط بقيت ما قادره اتكلم مصعب ضماني عليهو شديد بقينا نبكي بهستريا الاتنين امي وخالي بكو شديد بعد هدينا قولته لامي انتي كنتي عارفه الوقت دا كلو ؟ مصعب قال لي خالي هشام وقت كان بقرا هنا في الجامعه لاقاني ومن وقته وانا معاه وعارف اي شي عنكم بس كنا متكتمين على الموضوع عشان ابوي والبلبله الممكن تحصل حتى امي ما حكى ليها وبقى مخبي الموضوع عن الكل ووقت جيتو انا اصريت اني الاقيكم واشوفكم اول شي وراني امي براها وحسب حالتك النفسيه كانت ما بتسمح ما قدرنا نحكي ليك عشان ما تسوء اكتر لانو صدمه بنسبه ليك وكنا مستنين متين تتحسني عشان نحكي ليك ما قصدنا نخبي والله حتى حبوبه وجدي يدوب حا يعرفو قولته ليهو دا كلو ما بهمني انا عندي اخو يا جماعه عندي اخو !! مصعب ضحك وضماني عليه قال لي واخوكي حا يفضل معاك للابد تاني ♡ قولته ليهو انا مبسوطه شديد اقسم بالله عاينته لدانه قولته ليها دندونه عندك خااال امي وخالي قالو لينا نسيبكم نحنا اشبعو من بعض امي قالت لي انا عندي مشيه للسوق عشان عشان اهل ريناد اليله وكذا خالي قال لي وانا ماشي معاها عاين لمصعب قال ليهو ما بحتاج اقول ليك خليك معاها مصعب قال ليهو لو طردتني ما ماشي زايد اني بايت معاكم قولته ليهو بفرح احلفففف ضحك قال لي وحاااتك عاين لي قال لي كنا متخوفين ومحتارين في نفس الوقت نكلمك كيف بس كويس انك ذكيه قولته ليهو اخت منو عاد ...؟ قال لي تيسير اختي قولته ليهو احييي عيدها تاني عمري ما سمعته كلمه اختي دي انا ضحك قال لي اختي اختي اختي فضلنا مره نضحك ومره نتماسك ونبكي زي السكرانييين 😂😂😭💙
قولته ليهو اسفه بخصوص الكلام القولتو ليك امس ما كنت عارفه انك اخوي ضحك قال لي بس عجبتني ها ! قولته ليهو كيف يعني ؟ قال لي لحظه هدديني ولحظه ضربتني كف قاطعتو قولته ليهو الكف ، الكف انا اسفه ريت يدي اتقطعت وما اتمدت عليك وقته قال لي انتي ما سامعه بقول عجبتني ؟ حسسيتني انك بمليون راجل يااخ امي ربت بجد عارفه طول الوقت كنت معجب بيك وبقول معقوله دي اختي؟!!!! ياااخ حسدته روحي عليك قولته ليهو بتكبر شوفته كيف قال لي شوفته وعجبني شديد ♡♡ قولته ليهو لهسي انا مصدقه انو عندي اخ ضحك قال لي رغم اني عندي اخوان غيرك بس كلمه اخوي دي طالعه منك بلسم بس على قلبي بلسم اتحرمته منك كتيير يااخ قولته ليهو عندك العمر كلووو لمن تزهج مسك جضوم دندون قال لي من الزلابيه دي ازهج ؟ عمري ياااخ عمري ما حا ازهج ♡ باس راسي مسااافه طلع الموبايل قال لي دي ماما مرفت مرت ابوي يعني ، دا محمد الكبير ودي دعد اصغرنا حا تحبيها شديد قولته ليهو حلوة عيلتكم قال لي عيلتنااااا* وداااا ابوي فؤاد قولته ليهو اممم قال لي شنو امممم ما حابه تشوفي ابوك ؟ قولته ليهو صراحه لا اصلا انا بكرهو اسفه بعرف انو ابوك بس اتفهمني قال لي ما مشكله ما مستعجل على شي اهم شي اننا سوا انتي وامي والقنقنز الفي نص دا جيبي بوسه لخالووو باسه قال لي احساس اني خال يعني ♡ خوفته اعجز وما اسمعه ضحكته قولته ليهو عقبال ما اكون عمتتو قال لي عايني نحنا متعرفين هسي فما تعملي لي حركات اللخوات دي اشوفك عريس وبتاع انا عايز اعيش شبابي قولته ليهو زاتو مافي ليك عرس هسي بعد اشبع منك امشي عرس لازم اعوض طفولتي معاك يعني قال لي مش اعوضك على طفولتك بس اعوضك على عمرك الفاتني كلو وفاتتني تفاصيلو واني اكون اخوك الكبير وسندك ، هسي احكي لي قبيل كنتي بتبكي ليه ؟ حسيت خالي مشاني لمن قال لي حلم قولته ليهو لا والله ما مشاك فعلا شوفته كابوس ما بتتخيل كنت خايفه كيف قال لي بخصوص عمر ؟ هزيت ليهو راسي قال لي ما عايزك تخافي انا هنا هااا ؟♡ قولته ليهو ما اتحرم قادر يا كريم قال لي ديل اتاخرو ليه انا عندي معاد قولته ليهو لا والله ؟ دا الوقت القولته عايز تعوضو ما تميت معانا ساعه وخلاص زهجته ؟قال لي اولا انا لي معاكم من الصباح وانتي بذات انا لي معاك ساعه بعدين انا قولته ليك بايت هنا وحاتكرهيني والله اكرهك فيني بس اليله عرس زايد اخو ادم والزول دا زولي وصاحبي وكذا فااا عيب ما اكون معاه في وقت زي دا قولته ليهو ااه صاح عرسو اليله قال اي عزمك ؟ اذا عزمك ارح قولته ليهو عزمني بس صعبه انو ما بعرفو كداا لدرجه امشي ليهو بس قال لي شنو كداااا ليك معاه اربعه شهور وزملاء واخت صاحبو فا في مبررات كتيره لانك تمشي اذا حابه قولته ليهو وفي دانه ويدوب حا اقعد العب معاها وفي جدي جاي المفروض استقبلو عشان لو لاقاني لافه حايكمكمني ويرجعني كوستي وفي خالي اليله يوم مهم بنسبه ليهو شدييد وفي مبررات كتيره ما امشي قال لي ااامممم صاح كلامك بس اضربي ليهو ما تبقي حقاره قولته ليهو حاضر وشنو كمان ؟؟قال لي في شي كدا كنت جايبو ليك دقيقه .. مشى جاب كيس وجاء قال لي حبيت اهديها ليك تقبليها مني قولته ليهو لو جمر اقبلو منك انا كفايه انك اخوي ضحك قال لي حناااكه لكن ما حابه تفتحيها ؟ قولته ليهو شديد فتحتها لقيتها ساعه ومعاها اساور اتنين من ck قولته ليهو ما اعدمك خالي وامي جو داخلين امي قالت لمصعب وانا مافي لي هديه ؟ مصعب حضنه شديد قال لي كفايه عليك انا ولا شنو ؟ ضحكت قالت ليهو كفايه علي شديد ♡ مصعب قال ليها انا طالع عرس اخو صحبي ما بتاخر قالت لي الله يعدله عليك محل تقبل ويغطي عليك مصعب دموعو جات جاريه قال ليها 23 سنه محروم من الدعوه دي باس يدها ، مسكتو من يدو و قدمتو لغايه الباب قولته ليهو انزل معاك تحت ؟ قال لي كفايه هنا خشي جوه يا بت قولته ليهو لا امشي معاك قال لي في اولاد برا خشي جوه قولته ليهو اشتمني كدا تاني ضحك قال لي جوه يا بت قبل ما اجدعك بالشببش دا ضحكته قولته ليهو اجدع قلبي زاتو ضحك بصوت عاالي قال لي خشي جوه قبل اقلب جد يا تيسير ،ضحكته وقفلت الباب كنت مبسوطه شديد قولته ليهم جد دا احلى يوم في حياتي مستحيل يجي علي يوم احلى من كدا احساس انو عندي اخو كان مسيطر علي شديد بجد احساس جميل شديد قعدته ارقص وانطط زي الهبله ، بعد الضهر اتصلته لوعد باركته ليها واعتذرته ليها اني ما بقدر اجي قالت لي عليك الله تعالي الحفله بعدين قولته ليها خالي ماشي يخطب واليوم دا مهم شديد بنسبه ليهو قالت لي طيب تعالي الغداء لسه الوقت قولته ليها بحاول لكن ما بوعدك جاين ناس جدي وما ينفع يلقوني برا و دانه مسننه وطول الوقت جسمه مسخن قالت لي طيب يا ستي بس بتمنى تجي حا انبسط شديد بجد ♡ قولته ليها ان شاءالله امي قالت لي دي وعد ؟ قولته ليها اي قالت لي جيبي ابارك ليها الحنينه اديته التلفون اتكلمت معاها شويه وفصلت منها قولته اضرب ابارك لادم عشان ما يتحسس من غير شي علاقتنا ما زابطه السبب الوحيد الكان مشجعني اتصل ليهو انو صاحب مصعب اخووووووووي ♡ وإلا ما بهمني اصلا يزعل ولا يطق ما فارق كتير ، شلته تلفوني واتصلته ليهو الخط خاشي لغايه قطع ما رد قولته اه العلي سويتو وريحته ضميري اتلصته ليك وما رديت قصرته في شي ؟ بري عملته الواجب العلي جدعته التلفون خشيت الحمام استحميت وطلعته سمعته صوت التلفون بضرب رفعتو كان ادم رديت قولته ليهو الف مبروك لاخوك وان شاءالله بيت مال وعيال وعقبالك قال لي الله يبارك فيك قولته ليهو سامعه جوطه جنبك لبعدين قال لي تسلمي ما بتقصري يا تيسير وفصل ...
المساء ابوي عبدالعال كان سلفا وصل عشان يمشي معانا اول ما شافني سلم علي وبكاء معاي شال دانه وبرضو بكاء معاها طول الوقت كان مقعدني لدرجه المويه قولته اجيبه ليهو ابا يخليني اقوم من جنبو الا جابته امي قال لي 8 شهور اسمع صوتك بس وما اشوفك لا انتي ولا دانه يالكعبه ؟ قولته ليهو انت عارف الظروف الكنت فيها قال لي روحي كانت مشحتفه عليكم عارفاني ما ببقى بلاك المغرب خشى جدي مشى مع خالي الجامع امي كانت موصياني هي وهي خالي اني اما اجيب لجدي سيره عن مصعب بس انا كان نفسسسي احكي ليهو ؛ اتصلته لمصعب قال لي مافي طريقه امشي معاكم والله صابيها مع ادم بيجاي قولته ليهو جدي عبدالعال وصل اتمنيت تكون معانا قال لي بجي بليل وبتعرف عليهو قولته ليهو امي بتنادي حا امشي اجهز عشان طالعين خالي جاء ماري بي قال لي بتوب ما تباريني امي ختت يدها في نصها قالت لي لجدي عبدالعال شوف الولد البت شايله بتها في طرفه يقولو عليها شنو ؟ خالي قال ليها ما حايقولو عنها شي شوفي ليك اي فستان او اسكريت قولته ليهو عندي توب فازلين زابططط بلبسو حدر لي قولته ليهو سمح فهمته فهمته .. مشيت عندي فستان لطيف كدا ساااده ترابي محجب وتصميمو بسيط وظريف معاهو حزام بالدهبي وطقمتو بطرحه لا تعرفها بيج لا اوف وايت وهيلز اسود عشان يطولني شويه وسلسل طوويل علاقتو مستطيله بالدهبي كذالك ولبسته دانه فستان هاادي بالحرجلي وهيد باند نفس لون وسويتر قدره من البرد الفستان بدرجه اخف خالي شافني قال لي ما تجي نعرس♡ ضحكته قولته ليهو خالوو انجز ضحك قال لي دانه مكرفسنك زي السوسيو 😂 هو لابس بدله بالرمادي دافي كدا وجزمه سوداء ووساعه فضيه جدي لبس جلابيه وامي لبست توبي الكنت حا البسو انا فازلين بلون قريب بدله خالي خالي فرح لبس بدله بالكبدي الهادي .. ( فاشنيستا وكذا لازم اوريكم لابسين شنو😌😛)
