آدم قال لي حساب شنو وانتي منو اصلا ؟؟ قولته ليهو كيف يعني انا منو ؟ انا تي... قاطعني قال لي باستعجال معليش اديني شويه وارجع ليك مشغول هسي وفصل .. كرهتو شديد واتغظته منو غيظ عايزه انفجر كيف يتعامل معاي بالطريقه دي ويكلمني كدا ؟ واحد غبي السواق قال لي انا غبي ؟؟ قولته ليهو لا ما قصدتك انت معليش قال لي فكرتك بتكلمي معاي قولته ليهو لا بتكلم مع روحي معليش قال لي وصلنا يا بتنا اتفضلي انزلي نزلته اديتو القروش غشيت البقاله شلته منها شكولاته امي لاقتني في الباب قالت لي مالك مكرفسه وشك حكيت ليها الحصل قالت لي واحد عواليق بس كيف يعامل الناس كدا انتي مش اديتو رقمك ؟؟ قولته ليها ورسل لي فيهو الصور كمان قالت لي ارجعي لوعد شيلي حسابه ولا استنيها بعد تجي قولته ليها وعد بعد مشت هناك غيرت رقمه برقم الدوله القاعده فيها خطها الهنا ما بشتغل هناك قالت لي طالما دايرين منك قروش ما بنساك انا قايمه اخد لي نومه نعسانه شديد ،، دانه كانت بتعلب في السرير قربت تقع جريت مسكتها بقت شليقه شديد لو مافي زول خلى بالو منها بتقع جبته ليها المشايه قعدتها فيها واديته العضاضه عاينت لي وغمضت عيونه وعضت العضاضه شديد قعدته اضحك قولته ليها سنونك عايزات اقومو ولا شنو الا ادخن ليك بعدين لكن ادخن وين مع خالي دا رحاله ساااي ما عندنا دي مشكله دي نفخته ليها جضومي وطقيتهم وطلعته صوت قعدت تضحككك ضحكته فيها قهقهه صورتها وهي بتضحك وختيته استوري في الواتس وما قفلته الشبكه جاتني مسج من نشوى راده على الاستوري حقي اموجات دموع قالت لي اشتقته ليها نفسي فيها انا اتصورته معاها ورسلتهم ليها قالت لي وحلاتي حتى بقت تمشي قولته ليها لسسه لكن بتحبى وبتتكرا بالمشايه قالت لي ما شاءالله مشت سريع قولته ليها امي قالت انا مشيت في 8 شهور وهسي هي وصلت التاسع وماشه شكلها بتم العاشر بتمشي تاني قالت لي بمناسبه العاشر دي امس غشيت حبوبتك بيغادي قولته اسلم عليها ما تقول نشوى كانت بتجي لتيسير بس الموهم مشيت ليها سلمته عليها سمعته جدك قال انو خالتك داقه طرس قالت دايره تشوف بت ولده قولته ليها بت ولده دي ياته مش ابوها مش دي الجبتها انا من راجل تاني غير راجلي مش نكروها دايرين بيها شنو؟؟ قالت لي برري وسمعته عمر قال داير بتو قولته ليها يبيت في الحراسه بركه من صلى وقال يالله قالت لي شاف صورته رسلته ليهو تسنيم انتي مسيفه رقمه ولا شنو ؟؟ قولته ليها ااي متواصله مع تسنيم انا وخلي اليشوفه كان داير يشوفه ما عندي مشكله لكن كلام يشيل بتي نجوم السماء اقرب ليهو قالت لي كونو نفى النسب تاني الا كان يخطفه خطف ما بقدر ياخده اها الصور ناويه تنزليهم متين ؟؟ قولته ليها ما انزلهم انستا هسا لانهم كلهم 10 فساتين حانزلهم فيس اول انتي صفحتك الزمااان ديك قاعده الخشيتي بيها على الكراش ضحكت قالت لي بتفكريني بماضيا الوسخ ليييه ؟؟ اااي قاعده دايره بيها شنو قولته ليها اديني ليها وضفيني في قروبات البنات قالت لي فهمته عليك اتاكد بس من الباسويرد واديك ليها زبوطي ؟؟ قولته ليها تسلمي لي انتي ، في نفس الوقت جاني ريكورد من وعد برضو مانت راده على الاستوري قالت لي اكله يعني ولا كيييف بريييييده ياااخ بتك دي 😭💙 قولته في نفسي الحمدلله انها ما غيرت رقمه عشان اديها القروش واتخلص من الهم دا اتونسته معاها وسالته عن حاله واخباره وكذا وفي نص الكلام قولته ليها وعد عايزه حسابك بتاع البنك احول ليك المبلغ قالت لي ادم ما اداك ليهو ؟؟ قولته ليها اديني ليهو لكن فيهو غلط في الارقام قالت لي ايوااا دقيقه ارسلو ليك ، رسلتو لي قالت لي ان شاءالله الصور عجبوك ؟؟ امس كنت بتكلم مع ادم قال رسلهم ليك قولته ليها صاح رسلهم لي حلوات شديييد ما اعدمك قالت اشتغل عليهم ادم ما انا من تصوير لتصحيح لكلو بس المهم انهم عجبوك ، رسلت لي صور ليها قالت لي شوفي الشوارع والنضافه دي كيف حردته شوارع الخرطوم انا ، الصور كانت جميييله ونضافه موباااالغه قولته ليها وين دا ؟؟ قالت لي بريطانيا مع اختي السجم قولته ليها انت تحمدي الله على اختك السجم دي الودتك بريطانيا رسلت لي اموج ضحك قالت لي سكتني فضلته ادردش معاها شويه وطلعته . ..
خشيت بصفحه نشوى الادتني ليها ودخلتي كذا قروب سميت بالله وشلته نفس وعملته مقدمه لطيفه كدا معاها السعر ورقم التلفون ومكاني اللهو شقه خالي وطلعته ما كنت حابه اشوف الكومنت خفته اتسفهه وما يعجبو زول 💔💔
خالي جاء داخل سلم على وخشى غرفتو خليتو بعد ارتاح كان قاعد بحضر في الاخبار في الصاله شلته دانه معاي عشان عارفه بعد يشوفه برتاح ختيت دانه في حضنو ومشت جبته كيك شكولاته وعصير كنت عاملاهم قولته كلو يروق لي وافهم مالو قعدته جنبو من سكات شلته دانه منو قولتو ليهو احممم خالو قال لي وهو بعاين في التلفزيون روحو قولته ليهو ينفع اسالك سؤال وتجاوبني بصراحه ؟؟ شال نفس قال لي امك وين ؟ قولته ليهو بتتكلم بالتلفون مع حبوبه قال لي بحب واحده واتقدمته ليها واهله رفضوني قولته ليها اتقدمته ليها ميتن ما سمعته بيك ؟؟ قال لي انو هي حاولت تفتح الموضوع مع ابوها وابوها مصر تعرس ود عمها و انا من جهتي فاتحته ابوي في الموضوع رفض قال عشان جنسه وكذا ما بدخل غريبه علينا عارفه عقد ابوي دي غريبه وما بعرف شنو والا تعرس من الاهل قولته ليهو عشان جنسه ؟؟ دا شنو التخلف دا طيب خلي حبوبه تتكلم معاهو قال لي كلمتها بتحاول تتفاهم معاهو هسي وانا خايف ابوها يتهور ويعرس ليها قبل ابوي يقتنع بريده شديد يا تيسير انا حاموت لو عرسه واحد غيري حاموت فاهمه علي ؟ قولته ليهو اذا هي من نصيبك لا ود عمها ولا حتى جدي ما حايقدر يمنعكم تكونو مع بعض بتتسهل ما تشيل هم قال لي ان شاءالله انا راسي ضرب من التفكير وهي ما بتتخيلي حاله بقت كيف ما عارف اتصرف كيف ما عارف قولته ليهو ما تفكر كتير كلو بترتب من ربنا فوق وانت بس اتمسك بيها عشان هي تتطمن انها مافي المعركه دي براها قال لي ان شاءالله ادعي لي يا تيسير ادعي لي وحضن دانه عليهو شديد ،، خالي كان شكلو مرهق شديد وشارد طول الوقت حابه اساعدو بس ما عارفه كيف قولته في نفس اتكلم مع جدي واحاول اقنعو اذا حبوبه ما قدرت تقنعو قولته ليهو انت كلمته بقيت خوالي ؟؟ قال لي فرح عندو خبر وموافق بس عبدالاله بتعرفي انو افكارو وابوي واحد قولته ليهو كونو خالي فرح في صفك دي حاجه كويسه عشان جدي بتسشيرو كتير انت امسك فيهو وحاول اقنع خالي عبدالاله اذا وافقو كلهم بضغطوهو و بوافق قال لي بحاول معاه ما حاسيبهم الا يوافقو ما بقدر اعيش من غير انا قولته ليهو هي منو يعني ما حصل حكيت لي عنها ولا انت كمان عملته ليك اسرار ابتسم خفيف قال لي مذكره مره حكيت ليك عن محاميه معاي في الشغل قولته ليك فكاها في روحه وثقيله ؟؟ ضحكته بخباثه قولته ليهو اااااااي وقولتا ليك حاتجري وراها يوم صاااح صر لي وشو قال لي شنو تجري وراها دي قولته ليهو ما هسا انت جاري وراها يعني قال لي بس خلاص اسكتي وهاك بتي دي انا قايم منكم اصلو الزول ما يحكي ليك شي مسكتو من يدو قولته ليهو ما قلبنا مشحتف عليها ولا شنو ؟ قال لي شديد يااخ قولته ليهو بختها بيك شششششديد لو ما خالي كنت عرستك انا والله ضحكك وتلفوني اتصل رفعته التلفون كان ادم عاينته للتلفون وجدعتو قولته في نفسي والله ما ارد ليهو المفتري العواليق قولته لي خالي ما تجي نطلع نغير جو قال لي طوالي اجهزو حابين تمشو وين ؟؟ قولته ليهو ارح ساحه الحريه حابه اقعد في مكان مفتوح بدل القفله دي قال لي تمام كلمي امك مسافه اجهز كلمته امي وجهزنا طلعته لي توب ختيتو في السرير برا خالي جاء شافو قال لي بس ما تقول لي دا ليك ؟ هزيت ليهو راسي دخل الغرفه طلع لي فستان منقاوي سااده قال لي البسي دا وتعالي ما تكمكمي بالتياب سااي ياخ بعدين في مصممه ازياء بتلبس تياب ياااا شييخه امي قالت ليهو اجي يا ولد هي ببتها خالي هشام قال ليها واذا البسي يا تيسير مسافه اجهز العربيه قولته ليهو جبته ليك عربيه متين ؟؟ قال لي تبع الشركه رقوني في الشغل ما عارفه؟؟ قولته ليهو ابداا والله مبرووووووك فرحته ليك شديد قال لي الله يبارك فيك ولفي اجهزي سرعه مشيت غيرته ملابسي لبسته لي طرحه بيج خفيييف تحته توربان بالابيض عشان يمسك لي الطرحه وعندي سااعه دهبيه لبستها وشبط واطي بيجي مشينا الساحه الجو كان هادي وفي اسر قاعده مع بعض واصحاب خالي واقف مع واحد مع اصحابو عطشته قولته لامي ماشه اجيب مويه وجايه امسكي دندونه ثواني مشيت جبته موسه جايه راجعه صادفته ادم في الطريق طوالي عملته رايحه كاني ما شايفه وقفني قال لي شنو عامله رايحه مني اها الصور عجبوك ؟؟ قولته ليها اي تسلم كيف صحتك ؟ قال لي الحمدلله وانتي ؟ قولته ليهو تمام عن اذنك قال لي مالك مستعجله كدا ثواني بس عايزك في موضوع اذا ممكن عايز اعرف بناس قولته ليهو تعرفني بناس ؟، قال لي اذا ما عندك مانع طبعا قولته ليهو لا عندي مانع في الحقيقه عايز امشي جا واحد من اصحابو سلم علي قال لي دا مصعب ، مصعب دي تيسير قولته ليهو كويس يعني عارف اسمي عاين لاي باستغراب قال لي هو انتي ليه بتكلميني كدا ؟؟ قولته ليهو والله اسال نفسك قال لي لحظه في شنو ؟ مصعب قال لينا اي شي تمام ؟؟ قولته ليهو تمام شديد عن اذنكم اهلي مستنيني يااا كان اسمك منو انت ؟؟ وعاينته لادم عايزه امشي ادم قال لي يعني بعرف انو الواحد بس يخلص مصلحتوو منك بنكرك بس ما بالسرعه دي قولته ليهو الكلام دا انت اولى بيهو شال نفس قال لي حاتحكي بوضوح ولالا ؟؟ ما ناقص عقد البنات دي انا عايز افتح خشمي قال لي شوفي انسي كل العايزو منك جايب ليك شغل والا ما كنت وقفتك اساسا فاهمه ؟؟ ومشى خلاني واقفه مصعب قال لي معليش ادم ثقيل شويه ما تختي في بالك قولته ليهو صحبك دا مقرف مش ثقيل قال لي صاح صاح بخصوص الشغل هو حكى لينا انك مصممه ازياء بعرف الوقت ما مناسب بس اذا ممكن تسمعني ؟؟؟ قولته ليهو اتفضل قال لي شكرا نرجع لموضوعنا نحنا فاتحين شركه هي ما جديده بس المهم غيرناها لتبقى شركه ازياء ومحاتجين مصممين زيك وهو ورانا الفساتين الصممتيها شوفي الشركه ناشئه يدوب اذا حبيتي الفكره فدا عنوان الشركه طلع لي كرت زورينا وحاشرح ليك كل شي بالتفصيل او اتصلي الرقم مكتوب في الكرت بورا قولته ليهو بضحكه شكرا قال لي هو انا قولته شي بضحك ؟ قولته ليهو اسفه ما قصدته بس عشان اتكلمته بسرعه وتمتمه قال لي وانتي شايفه انو دا شي مضحك ؟ قولته ليهو الصراحه اي انا كمان بس اكون متوتره او بتكلم مع حد جديد بتكلم بسرعه وبتمتم بعض الكلمات فشوفته شخص تاني بتكلم كدا وكنت متعقده من الحته دي فعرفته يعني .. ضحك قال لي واضح شديد من طريقه كلامك قولته ليهو اسفه ما تزعل مني جد ما قصدته قال لي اول اتحسسته بس بعد عرفته السبب فااا في الهوا سوا ولاشنو ؟ قولته ليهو صاح صاح اتشرفته بيك مصعب صاح ؟ قال لي ايووه صدفه سعيده نتلاقى هزيت ليهو راسي وابتسمته خفيف ومشيت امي قالت لي اب شعر كتير عرفتو ياهو الجا صورك الا الوقفتي معاهو دا منو ؟ قولته ليها صاحب ادم اسمو مصعب شلته نفس قولتهم ليهم عرضو علي شغل خالي قال لي شغل شنو ؟ قولته ليهو في شركه ازياء حا احكي ليكم التفاصيل بس نرجع البيت خالي قال لي متفائل شديد انا ♡♡
اول ما رجعته البيت نشوى اتصلت لي قالت لي مصممتنا المشهوووووره قولته ليها بسم الله مالك قالت لي انشهرتي يا صحبتي قولته ليها مافهمه قالت لي عارفه المنشورات النشرتيهم في قروبات البنات عملو كم لايك ؟؟ عارفه كم واحده طلبت الفستان جهزي نفسك وامشب خيطي سااااي راجيك سهر بقرووووش قولته ليها احلفييي عمل كم اصلو ؟؟؟ قالت لي اقل منشور عمل 700 لايك قعدته اصرخ قولته ليها يعني نجحته ؟؟ واي ما مصدقه انتي جاده الناس حبتهم قالت لي جررري امشي صممي غيرهم قولته ليها ما مصدقه والله دموعي جات جاريه قولته ليها افصلي افصلي اشوف الحاصل فصلته منها وخشيت الفيس لقيت كميه بتاعت مسجات في المسنجر بعد تلفوني علق فرحته شديد مشيت كلمته خالي و امي العشره فساتين ديل انا عامله من كل فستان 6 قطع بس ما كنت خاته انو الاقبال حايكون عليهم كدا قولته ليهم هسي حاقدر اوفر الكميه دي كيف كلها ؟؟ خال لي قال من الشركه الازياء مثلاااا ...؟؟ قولته ليهو صاح صاح بكره الصباح تمشي معاي عشان الشروط وكدا فهمتني قال لي عيوني ليك انا عيوني شلته دانه قولته ليها امك بقت مصممه مرغوبه يابت الااييييههه امووووح ،، اكدته كذا طلبيه قدر العندي وقولته للباقين اني حا اصممم العايزنو في الايام الجايه وطلبته من الاكدته ليهم طلباتهم يجو بكره يستلمو وحددته ليهم معاد عشان ما عندي توصيل ،، تاني يوم اتصلته لمصعب برقم الشركه الاداني ليهو في الكرت لاقتني موظفه ثقيله كدا قالت لي تعالي بكره وجيبي معاك شهاداتك قولته ليها شهاده شنو انا ... قاطعتني قالت لي عايني تعالي بكره وقولي الكلام دا لمستر مصعب وادم اوكيييههه ؟؟ وفصلت فيني الخط قولته في نفسي دي شنو العويره الموظفنها دي ؟؟ جوني البنات الاكدته ليهم الطلبيات جو حكايه 10 بنات استلمو مني اطرو على الفساتين شديد والتعليقات عجبتني جدن جدن جدن ، اليوم البعدو خليت لامي اسماء البنات الجايات والفساتين الطالبينها و جهزته عشان امشي المقابله او الانترفيو زي ما بقولو مشى معاي خالي اول ما وصلنا لقينا السكرتيره كلمناها قالت لي المعاينات في المكتب التاني على الشمال اهم شي جبتي شهاداتك و باقي الاوراق قولته ليها اوراق شنو وشهاده شنو ؟ انتي شكلك ما فهمتني مصعب قاطعتني قالت لي مستتر مصعب لو سمحتي قولته ليها اي ياهو مستر مصعب ما فرث المهم هو طلب مني اجي واقابلو هو شخصيا قالت لي اسمعي ما تعملي حركات البنات دي وانا بعرف مستر فولان ومستر علان جيبي اوراقك يا بت الناس انا عندي مراره ما تفقعو مرارتي دي انتي البت الالف تقول لي الكلام دا اذا غشوكم دي ما مشكلتي انا اوووف ....
#محبات🚶💙
