مصعب جاء قعد جنبي قال لي بفكر اكلم ادم اليله حا امشي ليهو كمان شويه الاقي ومنو احكي ليهو انا لمحته ليهو بس ما وضحته ليهو اننا اخوان قولته ليهو احسن برضو ،، كان عندي فكره جلابيه استقبال في راسي بديت انفذ فيها جبته تصميم لمصعب قال لي حلوة دي شنو ؟ ضحكته قولته ليهو جلابيه استقبال حديثه قال لي حلو التصميم عجبني بس الالوان قويه شويه جيبي درجه اخف قولته ليهو انا برضو حسيت كدا بكره حا اراجع الشغل مع سمؤال وادم عشان يصور لي الموديل بعد التنفيذ مصعب قال لي حاولي اقنعيهو يصور ليك الموديل هو عشان بعرف ما زي الفتوغرافر البنجيبهم قولته ليهو اي اصلا بكره عندي شغل معاه فا حا احاول اقنعو ،، تاني يوم وانا ماشه كان الشمس قويه شديد عيوني طششت لبين ما وصلته تحس دا نص الصيف ما الشتاء قعدته اعرك في عيوني ادم عاين لي مسااافه ودخل طول الوقت كان بحاول يتجنبني حتى الشغل البينا أجلو استغربته جدا تصرفاتو واليوم البعدو برضو أجلو وكل ما احاول اتكلم معاه يختصرني عدا اسبوعين على الحال دا وشغلي بقى واقف تمام كل ما اجي يقول لي ما فاضي شلته فايل الشغل ومشيت عليهو صادفتو في الباب قولته ليهو ناوي تأجل شغل اليله لبكره برضو ؟ قال لي لا ابدا ارح المكتب دخلنا مصعب قال لينا اطلعو الاتنين عندي شغل ادم قال لي ارح الكافتريا قولته ليهو في زحمه فيها شال نفس قال لي ارح المطعم البجاي دا مشينا قعدنا قولته ليهو جعانه ناكل وبعد داك نشتغل نادا النادل طلب سندوتش قولته ما جعان ؟ هز لي راسو بمعنى لا قولته ليهو في البرد دا 24 ساعه خشمي فاتح سكت ما رد لي بعد حسيت روحي بتكلم براي سكته طول الوقت كان بتجنبني وحتى كلامو معاي في حدود الشغل بس ما زي زمان بتظارف تلفوني اتصل كان مصعب رديت بعد فصل قولته ليهو دا مصعب ...قاطعني قال لي ما سالتك قولته ليهو عارفه قال ليك افتح تلفونك طلع تلفونو من سكات كان فاصل شحن كان في كوبس جنبنا قولته ليهو معاي شاحن مديتو ليهو قال لي بس ارجع بشحنو قولته ليهو انت مالك معاي ؟ قال لي مالي ؟ قولته ليهو ليك يومين بترد لي بطرف لسانك وبتعاملني كيف كيف انا قاتله ليك زول ؟ قال لي انتي زميلتي في الشغل المفروض اعاملك كيف؟ قولته ليهو بطريقه الطف من دي ومن غير احراجات وانا جايه هنا اشتغل معاك ما جايه اتفسح لو ما عايز ما مضطر قال لي انتي نضامه وكلامك كتير وياريت كلامك معاي يكون في الشغل بعد قال لي كدا عاينته ليهو بضيق قولته ليهو تمام كلامو حرقني شديد يعني يدوب بتكلم كلمتين عشان افصل من الشغل يقول لي نضامه ؟؟ كيف يحرجني بالطريقه دي ويتكلم عني كدا في وشي ؟ بعد مسافه قال لي ما قصدته ما تزعلي قولته ليهو ولو تقصد عايز يتكلم قاطعتو قولته ليهو الوقت اتاخر نمر على دا سرعه ونرجع بعد شويه لاحظته لنفسي اني صرفته عربي كتير في الجمله الفاتت فضلته ساكته وبحدد بالقلم بس خلصنا شغل شلته شنطتي ومشيت البيت اتحسسسته شديد من الكلام القالو انا عارفه اني عفويه بزياده وبحكي اي شي من غير حساب واخدت عهد على نفسي اني اتكلم في حدود بس ،، تاني يوم رجعنا كملنا شغلنا اخدنا برك طلبته قهوه فتحته واتس جاتني مسج في الواتس من مصعب كان متصور مع دانه في البيت شكلو رجع شوفتها ضحكته جات واحده بعرفه سلمت علي ومشت ادم قال لي زعلتي ؟ قولته ليهو انت عملته شي يزعل ؟ قال لي معليش انا نيرفز الايام دي وما فيني امس ما قصدته اضايقك انا اسف قولته ليهو عادي قال لي تيسير جد ما قاصد قولته ليهو حصل خير ورجعته للتلفون كنت بكبر في صوره دانه ومصعب ، ادم نظام عايز يشيل التوتر قال لي وريني كدا بتضحكي على شنو وعاين لتلفوني قال لي بهدوء اااه مصعب سكت مسافه قال لي حلوة علاقتكم ابتسمته ليهو بس ، جاتني مكالمه من نشوى رديت عليها وزحيت من ادم عشان الموقف الامس اتونسته معاها حسيت براحه وانا بتكلم مع نشوى من غير ما اعمل حساب لشي او انها تختني زي ادم وتتضايق من عفويتي فصلته منها وانا راجعه التربيزه جات بت لابسه قميص حلو عجبني قولته ليها حلو قميصك البت تلقائيا ضحكت قال لي بجد ؟ شكرا كنت حاسه ما حلو قولته ليها بالعكس والحلق عجبني ما شاءالله زوقك حلو ابتسمت لي ابتسامه عريضه بادلتها نفس الشي ورجعته قعدته ادم قال لي انتي بتعلقي على كل شي بعجبك ؟ لمن قال لي كدا اضايقته من جواي ، سكته ما رديت ليهو ورجعنا الشغل مصعب كان واقف مع موظف عاين لي من بعيد وجاء على قال لي مالك مكشره انتي اليله ؟ قولته ليهو مامكشره انا بس عشان الشغل و... لمن حسيت روحي كلامي كتير سكته قال لي وشنو ؟ قولته ليهو وبس قال لي اكيد ؟ هزيت ليهو راسي قال لي ما مقتنع لكن نتفتهم بعدين بعد مشى ادم قال لي كابلز حلوين قولته ليهو اممم قال لي صارحتو بعض ولا لسه ؟ قولته ليهو هو ما حكى ليك ؟ قال لي ما حكى بس لاحظته ليكم قولته ليهو للدرجه دي ظاهر علينا ؟ قال لي شديييد قولته ليهو من اسبوعين كان معانا في البيت كان عايز يكلمك ويحكي ليك فكرتو كلمك قال لي في البيت ؟ هو وصل البيت ؟ قولته ليهو كيف يعني وصل البيت ؟ قال لي اقصد الموضوع بقى رسمي وجادي قولته ليهو موضوع شنو البقى رسمي ؟ قال لي مش بتتكلمي عن علاقتكم ؟ قولته ليهو علاقتنا اللهيا؟ قال لي انكم ناوين ترتبطو ضحكته قولته ليهو كيف يعني نرتبط ؟ قال لي يعني حنك سااي ولا البيت دا شنو ما فهمته ؟ قولته ليهو ادم انت فهمته شنو من كلامي ومن علاقتنا ؟ قال لي انكم بتحبو بعض يعني ما عايزه شرح دي قولته ليهو في اخوان في الدنيا برتبط دا شنو الخمج دا ؟؟ قال لي عادي كل العلاقات بتبدي بخوه واختي واخوك وبتتطور قولته ليهو انت طالعته ولاااا هنا الحاله قال لي انو لمح ليك شوف انا ومصعب اخوان اخوان يعني من رحم واحد فاهمني ؟ ضحك قال لي دا شنو الفيلم الهندي دا كيف يعني اخوان ؟ قولته ليهو بفضل يحكي ليك هو قال لي طالما انت بديتي الكلام كمليهو شلته نفس وجريت ورقه وقلم قولته ليهو وانا بكبت في البقولو امي وابوي منفصلين انا مع امي واخوي التاني مع ابوي حسب اتفاقهم هم وامي بعد انفصلت عن ابوي اي واحد عاش في بلد وابوي حرم امي من مصعب وهدده انو حاياخدني لغايه هنا كويسين قال لي كملي .. قولته ليهو وخالي هشام لمن جاء يقرا الجامعه هنا من 4 سنه فاتت فتش عن مصعب ولقاهو واتقرب ليهو وبس جينا الفتره دي خالي عرفنا على مصعب ادم قال لي يعني انتي اخت مصعب بت ابو الكان بحكي لي عنها ولمن قال اهلكم واحد كان قصدو انك انتي اختو تيسير و.... ثواني ثواني لحظه انتو اخوان اخ واختو قولته ليهو ايوووه مسح وشو قال لي طيب دي محمده ولا مفسده هسي ؟ قولته ليهو كيف يعني محمد ولا مفسده اقولك اخوي اخووووي قال لي حلو حلو يعني انتي هسي اخت صحبي ؟ قولته ليهو ايوه ضحك ضحكت مجامله قال لي لا ظريف شديد فرحته ليكم جدااا ، سكت مسافه بعدين حسيت روحي كترته كلام فمسكته خشمي علي قال لي في كل الحالات كاتمه كنت عايز اقول ليهو شنو الكاتمه ؟ بس قولته ما يخصني فضل ينقنق تحت تحت مع نفسو ولا قولته ليهو حنى انت بتقول في شنو قال لي قصه غريبه هزيت ليهو راسي قال لي سبحان الله كويس انكم اتلميتو قولته ليهو امم قال لي المشروع دا انا ما فهمتو تعالي نراجعو تاني عشان قبيل ما كنت مركز قولته ليهو وانت وقت ما فاهم ما تقول لي ممشيني ليه مستحيل اعيدو من البدايه واقعد ساعتين تاني قال لي وراك شي ؟ قولته ليهو وراي بتي قال لي ببسمه دانه ♡ عايز تشيل شنطتي قال لي هي مش مع حبوبته اقصد امك خليها معاها يعني ما بحصل شي اذا اتاخرتي شويه قولته ليهو ما بقدر اليله عيد ميلاده قال لي جد وليه ما كلمتيني قولته ليهو ما شي مهم انت قاعد راجع بتفهم دا دفتر ملاحظتي بفيدك ختيتو ليهو قال لي يعني ما ناويه تعزيمني ؟ قولته ليهو ااه اذا لقيت وقت تعال ،، غشيت السوق عشان اجيب لدانه هديه كان في دبدوب باندا ظريف كدا شلتو ليها معاهو لبسه زيو واشتريت حاجات الكيك وشموع معاي لمن وصلته لقيت امي حتى عملت الكيكه ومصعب ماسك دانه بلعب بيها وبنفخو في البالونات قولته ليهم احساس حايجي زول يعني حابه يكون في اطفال معاها امي قالت لي نرجع كوستي الشفع بفرحو بيها لكن دا عشان مصعب بس اصر انو يتعمل ليها قبيل ما دايرين احتفال وكلام من دا مصعب قال لي عزمته وعد وآدم عندهم اولاد اخوان قولته ليهم جيبوهم معاكم عشان يفرحوها ويدوني احساس انو عيد ميلاد ما تحسو بايخ ووعدوني يبجو لسه قافل من ادم قولته ليهو تمام اخش اجهز العشاء قرب مصعب لحقني قال لي توته انتي كويسه ؟ قولته ليهو كويسه اي عاين لي وقال لي اتمنيت اندمج معاك واخد الاخ السند بسرعه لكن شكلو عايز وقت قولته ليهو دانه من قبل ما تتولد ابوها نكرها من غير سبب وخلى الناس كلها تشمت فيها ومتاكده بكره بعد تكبر ما حا يرحموها واليله اول عيد ميلاد ليها ومافي زول من عيله ابوها فكر يسال عنها حتى اخواتو البنات خالاتي مع ان دي بت اخوهم وانا في الحق اختهم بس ما سالو عنها الاحساس دا انا جربتو ومؤذي شديد دايما لمن اسال امي عن ابوي تقول لي سافر فضلت مفهماني انو سافر لغايه ما وعيت وفهمته شي مؤلم كونو بدايات حياتك تكون بالطريقه دي مصعب حضني قال لي ما بقدر اغير في الماضي حاجه لكن بوعدك طول ما انا عايش لا انتي ولا دانه حا يقربكم شعور زي دا ولا حا اسمح بانو تعيش عيشه زي الحصل معاك ومعاي الخلقه ما ناسيها وكلو لخير وما معروف يمكن الله مخبي ليها حاجه اجمل كلو مترتب ولخير والله في ابتلاء بخبي رحمتو اتكليها على الله ما تفكري بسلبيه اليله طالما انتي مع دانه هي ما حا تحتاج لشي اتاكدي انو بتك بتحبك انتي وبس وما بهمها الباقي البت بكسره بعد الام ما الاب وانتي هدا معاها يبقى في شنو تاني ناقص ؟ انا متاكد انك حا تحتوي دانه لدرجه بعيده شديد وزي ما قولته ليك ملو مترتب امسحي دموعك وما تفكيري في شي غيرم انتي ودانه وبس حاضر؟ هزيت ليهو راسي قال لي حا استناك برا شكلو ادم وعد وصلو مسكتو من يدو قولته ليهو ما اتحرم منك قال لي ولا منك جضمني وشد جضومي شديد قال لي زلابيه زي دي بتزعل ياااخ قال حساسه زي البنات ارجع لاصلك يا جعفر ضحكته قال لي تموتي موت في النكد ،، غيرته ملابسه ولبسته جلابيه بيت من الصممتهم عشان تساعدني في الحركه خالي كان عازم ريناد نظام تخش فينا وكذا وعد قالت لي عندي صحبتي عيانه في الداخليه ما معاها زول ماشه اوديها الدكتور دي هديه دانا قولته اديك ليها بنفسي عشان ما تزعلي قولته ليها مافي زعل شكرا ليك والله يواليها العافيه ان شاءالله قالت لي اميين يارب ادعي ليها ادم قال ليها بعد تخلصي اضربي هزيت ليهو راسه وباست دانا ومشت ، ادم جاب معاهو اولاد اختو اتنين وريناد جابت بت اخته معاها جبنا الكيكه وطفينا االشمعه ادم جاب الكاميرو بتاعتو وكان بصور فيها وفينا ولحظه طفي الشمعه صوره فديو دانه خمشت الكيكه بيدها ووبهدلت بيها نفسه كانت مبسوطه شديد طول الوقت تلعب مع الشفع وتخمشهم في وشهم وتضحك على حركاتهم طبعا يدوب بتمشي خطوتين وتقع خليته مع الشفع وجيت قعدته مع ناس امي وبراقبه من هناك بت اخت ريناد كانت كبيره شويه قالت لي خليها يا خالتو انا بعمل حسابي عليها ، شويه دانه جات لمصعب طبعا بتنادي هشام ومصعب بابا مصعب وادم قاعدين جنب بعض ادم كان ماسك الكاميرا ومايل لتحت دانه بقت بتعاين معاهو حسب هو وين خاتي عينو اظنها ما فهمت شي دخلت راسه بين يديننو وهو رفعهم لفوق شويه دخله فضلت تتناطا عايزه تصل لحيتو هو كان مطوله شويه مره ينزل ليها لتحت تهبشه وتاتي يرفعه فوق منها وهي تضضضحك عليهو وهم الاتنين مستمعتين شديد شاله رفعه ختاها في رجلو اليسار وهي تصفق ريناد قالت لي بتك دي ما شاءالله عليها عسل شديد حصنيها ادم قال ليها لام.... ام امها طالعه لام امها مش يا خالتو ؟ امي ضحكت قالت ليهو بري والله نسخه طبق الاصل عن تيسير وحبوبتها ادم قال ليها حبوبه عاشه؟ امي ضحكت قالت ليهو تيسير حكت ليك مافي زول بعرف تيسير دي وما بعرف حبوبتها بتريده اكتر مني حكايه للناس كلها عنها ادم قال ليها الله يديم المحبه بينهم مافي زي دفى الام هشام قال لي مالك انتي ساكته من قبيل ما سمعنا ليك صوت انتي كويسه ؟ قولته ليهو كويسه اي هشام قال لي اول مره تكوني فرحانه وتسكتي انتي وقت تنبسطي من شي خشمك ما بنقدر ليهو مصعب قال لي ليكون لمتنا دي ما باسطاك ؟ قولته ليهم بالعكس مبسسوطه شديد بس بحاول ابقى هاديه وابطل نضمي ورقي كتير لمن قولته ابطل كلام كتير ادم رفع راسو وعاين لي مسااافه حسيت زي الزعل ما اشتغلته بيهو كنت كارهو شديد ووجودو مضايقني عشان ما قادر راحتي مع اهلي ، في واحد من الشفع قال عطشان قولته ليهو تعال سوقتو ومشيت المطبخ اديتو مويه قال لي لا حاره عايز ابرد طلعته تلج وكبيت فيهو المويه بردتها واديتها ليهو شرب وجرى دخلته التلج التلاجه قفلتها ادم كان واقف مربع يدينو وخالفي رجلو قال لي يعني زعلانه مني ؟؟ ...
#محبات🚶💙🔕
