امو قالت لي لو فاكره انو ولدي حا يقعد يربي ليك في بتك دي تكوني غلطانه وايااكي تحلمي حلم انك تعرسي آدم ولو رفعتي فيهو عينك بس انا حا اغطس حجرك سامعه الكلام دا ولا ما سامعه ولدي حا يخطب ريم البتشبهو المن توبو انتي امشي شوفي ليك ارمل ولا مطلق زيك ما تجي تملي بلاك علينا،، قولته ليها انتي التسمعي ما انا ، انا ما رميت شي عليكم ولا عندي شي لولدك عشان اخت عيني عليهو فاياكي ترفعي صوتك فيني واوعك تتكلمي معاي بالطريقه دي تاني قالت لي وكمان لسانك طويل ؟ قولته ليها و اطول اكتر لو عايزه بس حدك معاي ما تتخطي ولا سنتي ، انتي مره في عمر امي لغايه اللحظه انا بتكلم معاك بأدب بس اذا حا تزيدي حرف واحد بشيل الاحترام الخاته ليك ، انا ما عارفه ولدك قال ليك شنو عني ولا ايا كان السبب المهيجكم علي كدا بس ولدك مجرد زميل في الشغل وصاحب اخوي وبس ... دا العارفاهو انا اي شي تاني ما بخصني لكن لا انتي ولا راجلك ولا ايا مخلوق في الارض بسمح ليهو يتكلم معاي بالطريقه دي ويدوس علي برجلو وولدك هدا قدامك اشبعي بيهو ااتصافو بيناتكم بعيد مني ما تدخليني قالت لي زميل شغل يا مفتريه قاطعته قولته ليها كلمه زياده وانسى انك مره كبيره آدم قال لي تيسير انا آسف ما تنفعلي امو قالت ليهو كمان شايل همها هي ؟؟ بدل تواسيني اناااا امك خايف عليها هي ؟ آدم قال ليها هي عندها قلب وهي معارفه شي اساسآ ولا حكيت ليها بشي ، انا حكيت ليك انتي وشنو عملتي ؟ جايه من البيت لغايه المكتب وعامله مشكله من فراغ وقللتي مني قدام الكل ، الحاجات دي بينا نحنا بنحلها بينا بس بينا ما بتطلع بس انتي طلعتيها .. ادم ساق امو بعيد واتكلم معاها كان زعلان شديد منها شويه وطلع اتجه على الباب ، قولته ليهو انت وين ماشي ؟ اهلك يشاكلوني وينبزوني ويسمعوني فارغه وانت عايز تمشي بالسهل كدا ؟ ما اشتغل بي وطلع وامو طلعت وراهو ، قعدته اخد في نفسي شهيق وزفير جسمي كان بارد وخدر ، وعد جابت لي مويه قالت لي اتفضلي ما تضغطي على روحك قولته ليها وانتي عايزه شنو مني انتي التانيه ؟ وعد قالت لي ولاشي انا جيت عشان اقول ليك ناويه تجيك حاولي اتفاديها لكن ما لحقتها وحصل الحصل قولته ليها حاتقولي لي في شنو ولا حا افضل اتبهدل كدا زي الاطرش في الزفه ؟ قالت لي تيسير انتي جد ما عارفه اقصد آدم ما حكى ليك ؟ قولته ليها ما تردي لي السؤال بسؤال قالت لي بفضل يحكي ليك هو ما عايز اخش بيناتكم حمرته ليها قالت لي شوفي .... ادم فاتح اهلي في موضوعكم اقصد قال انو عايز يتقدم ليك وامي وابوي عارضو ابوي شويه متقبل الموضوع بس امي رافضه بتاتا وادم امس فاتحه في الموضوع تاني والنقاش بينهم احتدا شديد وآدم بيت برا البيت والحصل اليله كان غبينه امي جات فشته فيكي انتي قولته ليها كيف اخوك يفاتحكم من غير ما يعرف راي ؟ وعد قالت لي ماعارفه السبب ادم عاقل وما بتصرف من راسو يمكن عشان الوضع حا يكون صعب على اهلي يتقبلوك ... انا اسفه ما قصدي بس انتي عارفه الاهل وحركاتهم عشان كدا هو حب يسلك الموضوع اول عندنا بعد داك يجي يكلمك في حال وافقتي واذا رفضتي الصراحه هو كان ناوي ينقعك ،،
انا حا اخليكم تحلو مشاكلكم براكم عن اذنك ، مشت مني وانا راسي يودي ويجيب كيف يعني آدم يتقدم لي عند اهلو وهو ما عارف اذا حا اقبل انا او ارفض ؟؟ في نفس الوقت حسيت بسعاده كونو فاتح اهلو في زواجنا دا بيعني انو عندو لي مشاعر ، مشاعري كانت ملخبطه بين حزن وسعاده وحيره ان اهلو وبالاخص امو توافق دي معجزه وشايفاها مستحيل تتحقق ، حاجه بعيده شديد طول اليوم ما لمحتو ابدااا ، الوقت كلو اتقلب و افكر انا اتصرف كيف مع زاهير اوفق ولا ارفض هسا ؟؟ اعملو شنو ؟ راسي كان جايط شديد وامي ابدا ما بقدر افاتح امي في الموضوع انا عارفه ردها سلفاا بقى ما عندي غير نشوى ولو حكيت ليها انا حافظه الحاتقولو صم ،،بعد تفكييير حسيت راسي حا يطق من التفكير قومته صليت لي ركعتين وتاني و اليوم البعدو كان عندي موعد مع زاهير جاء وقت اني امشي لزهير طلعته من الشغل على المطعم اللي مفروض نتلاقى فيهو انا وهو كان قاعد منظرني لابس جلابيه بيضاء ومرتبه شديد سلمته عليهو وقعدته زاهير قال لي وين دانه كان تجيبها اتعرف عليها قولته ليهو خليتها مع امي الصباح انا جايه من الشغل لهنا طوالي ما لقيت فرصه قال لي ما مشكله تتعوض الايام جايه ، زاهير كان هادي جدآ في اي شي فيهو حتى كلامو بتعد باليد ودي اكتر حاجه ضايقتني ي القعده بعد شويه حسيت بصوت بقول السلام عليكم معليش على الازعاج بس عندي شغل مع تيسير مستعجل شويه زاهير قال ليهو اتفضل اخدو راحتكم عاين لي قال لي مافي رسميه بينا نحنا نبقى عيله اتفضلي انا حا اتصل اطمن على الاولاد ، آدم وقف بي وراء حيطه عشان زاهير ما يلاحظ قال لي دا منو القاعده معاهو دا ؟؟ وكيف بتقعدي معاهو اصلا ؟ قولته ليهو دا واحد متقدم لي اسمو زاهير قال لي ما ... شنو ما سامع ...؟ عيدي كدا تاني !!وانتي قاعده بكل اريحيه وبتقابلي كمان ؟ ولمن هو يتقدم ليك انا بعمل في شنو برقص ؟؟ بتعارك مع اهلي عشانك قولته ليهو ما دخلي في اهلك انتو حرين والله ثم ثانيا كيف بتجي تكرني قدامو كدا ؟ قال لي والمفروض اني اعمل شنو ؟ استناكم بعد تقرو الفاتحه من سكات صاح ؟؟ قولته ليهو ما يخصك قال لي لا معليش يخصني انتي تخصيني ، عاين لي مسافه قال لي تيسير الكلام القولتي لامي الصباح دا حقيقي ؟؟ انك ما عندك لي مشاعر واننا زملاء بس ؟ قولته ليهو صاح اي قال لي ما تكذبي انا لي شهر بقنع في اهلك وعشمان في النظرات في البينا قولته ليهو آدم مافي بينا .... قاطعني قال لي ردي لي بصدق عشان ردك بترتب عليهو حاجات كتيره وكلها جواي ووجع قلبك الانتي بتحسي بيهو لمن تتعبي انا حا يوجعني اضعافو ، هاين علي اسمع كل شي في الدنيا الا الكلمه دي لو تقيله علي تقيله شديد ، قولته ليهو آدم انت كيف بتكلم اهلك وانت ما عارف ردي اساسآ ؟؟ للدرجه دي شايفني ما بستاهلك اتسأل حتى وجاريه على العرس ؟ قال لي بصوت هادي لا للدرجه دي انتي غاليه علي انتي اخت صحبي وانا ما بقدر اجي اتكلم معاك في موضوع زي دا من غير ما هو يعرف وناوي افاتحك بوجود وقدامو بس اجي اطلب يدك بفم مليان كنت عارف اني ما حا اطولك بسهوله عشان كدا فتحته المضوع مع اهلي اول عشان نجي ندق بابكم وانتي معززه ومكرمه ما كنت حابي تسمعي الاهانات السمعتيها قبيل دي وصدقيني الموضوع فلت مني وامي مره طيبه شديد والله لو عرفتك قولته ليهو حتى لو دا كلو حقيقي انا وانت صعب يا ادم شوفته رد فعل اهلك وانا ما بلومهم انا لوومحلهم كنت فكرته نفس الشي اي ام او اب عايزين لو ولدهم السمح قال لي وولدهم دا ما شايف سمح غيرك قولته ليهو لمتين يا آدم قال لي طول ما جواي الشي السمح دا اتجاهك انا حا عافر عشانك يا تيسير قولته ليهو آدم صعب. .. قال لي عند الله ساهل ، سكته قال لي ما جاوبتني عايز اعرف اذا البحس بيهو انا متبادل ولا .... عاين لي ابتسمته مسح وشو ورجع لورا قال لي جد ؟ هزيت ليهو راسي بخجل عاين لي مسااافه وحول عينو قال لي مشكلتك اخت صحبي ،، يلا لفي قولي لفلان دا ما عندنا بنات للعرس ولا تحبي اكلمو انا ؟؟ اتحرك مسكتو من يدو قولته ليهو انت مجنون ؟؟ شنو تكلمو انت بكلمو انا بتصرف عايز امشي جاء مصعب آدم قال ليهو انا بجاهد جهاد عشان اتزوج اختك وانت مخليها تقعد مع واحد متقدم ليها ؟؟ شكرآ يا اصلي ياكلب مصعب قال ليهو واحد متقدم ليهت اعمل شنو؟ العيله كلها موافقه عليهو !! آدم قال ليهو تقيف مع صاحبك لكن كويس مصعب قاال ليهو آدم فكرك ما عايز ليك اختي والله متمني لكن هي اخدت قراره براها آدم قال ليهو تعقله شنو اخدت قراره دي تعقله انا عندي مصران ما تطلع ميتني انت واختك قولته ليهو شنو ميتني دي ؟ ؟ قال لي ببسمه انا اسف ما حا اتلفظ قدامك تاني امسحيها في وش مصعب وهسي امشي للمرزوعه هناك دا وقولي ليهو ما معليش مخطوبه انا عزمه راجل ؟ يا ام عيون سمحه انتي مصعب قال ليهو شنو ياااا... ديوث انا في نصكم تتغزل في اختي قدامي ؟؟ ما تخليني اسب ليك آدم قال ليهو قولنا شنو هسي ؟ ما صاح عيونه سمحه مصعب قال ليهو بنهره آدم ،، عايز امشي مصعب قال لي قولي ليهو اديني فرصه افكر ما تحسسي بشي لغايه اهل امير البحرين دا يوافقو آدم قال لي ماشه وين ؟ قولته ليهو ماشه لزاهير قال لي وهو بقلدني ماشه لزاهير ! عايز وقفت عسكري وعينك في الارض يمين بالله ترفعيها اغطسكم انتو الاتنين في الارض قدام اخوك سامعه ؟ ابتسمه قال لي ودي برضو ما عايز اشوفه معاهو دي لي انا بس قولته ليهو اها في شنو تاني ؟؟ قال لي وما تطولي معاهو خمسه دقايق بس وتقومي من عندو مصعب قال ليهو حنك العيال دا ما حا يخلص ارح قدامي انت قبل اطلع بروحك في يدي ومسك آدم من قميصو،، مشيت لزاهير كان بتكلم بالتلفون قال لي بتو ما تفتحي الانبوبه انتي خلي عمتك تفتحه ليك، اي اي ، طيب يلا يا بابا انتبهي لاخوانك مع السلامه ، قفل منها قال لي بضحكه يدوب عمره عشره سنه بتي الكبيره قولته ليهو ربنا يحفظه باين عليها شاطره قاال لي زي امها قولته ليهو ربنا يخليها قال لي امها كانت كويسه شديد معاي وانا كنت بريده ولهسي .. بس الحياة لازم تكمل واولادي عايزين ام خصوصي انو خلفتي كلها بنات حوجتهم للام ما زي حوجتهم للاب قولته ليهو فعلا قال لي بتك حاتكون من بناتي تاني وبختها جوه عيونك بس بصراحه انا ما بحب اللف والدوران مرتي الله يرحمه وبقول مرتي عشان لسه في زمتي انا ما قادر اتعود على غيابه لهسي فاخد وقت عشان اتعود عليك بس حقوقك التانيه كلها انا تحت امرك فيها بتمنى تتفهمني قولته ليهو فهماك بس طالما لسه ما متعود على غيابه لي مزوج قال لي عشان امي اصرت اني اعرس وانا ما بقدر ارفض لامي طلب سكته وطول الوقت كان بحكي لي عن اولادو عشان ابقى على نور معاهم وفي نص سيرت اولادو كان بجيب سيرت مرتو الله يرحمه حسيتو متعلق بيها شديد ،، استأذنته منو وطلعته البيت هنا بقيت مشوشه اكتر من قبيل يعني لو افترضنا انو قصتي مع آدم دا خلصت وميؤس منها رسمي انا كيف حا اقدر اعيش مع راجل مستني مني اكون نسخه طبق الأصل عن مرتو وسمع كلام امو في الصاح والغلط ؟ يعني ما يكون لينا خصوصيه والحصل مع خالتي مفيده حا يحصل مره تانيه والقصه تطول ..!!!؟
وصلته البيت لقت امي جهزت كل شي وخاته الشنط في الباب قالت لي مالك اتاخرتي كدا ؟؟ قولته ليها لاقيت زاهير قالت لي اجهزي ونكمل كلامنا في العربيه مشيت استحميت وغيرته وطوالي طلعنا لافانا مصعب في الميناء البري كان معاهو آدم " جوز اللوز اللي ما بتفارق 🌚" انبسطته شديد لما شوفتو اشرليناا بيدو من بعيد وابتسم لي كنت عارفه انو الابتسامه دي لي انا بس♡،، مصعب ركب مع خالي بقدام امي قالت ليهو آدم ما جاي ؟ قال ليها بجي يوم الاربع المساء قال امي قالت ليهو عديله مصعب مد لينا كيس قال لينا لو جوعتو في الطريق امي قالت ليهو شلنا معانا اكل ومويه كنت تسألنا مصعب قال ليها جابو آدم وما حبيت احرجو انا ما اتذكرتكم زاتي ،، امي قالت ليهو الود دا الله يجعلو من نصيب واحده من بناتنا لو عندي بت كنت دفعتها ليهو لله من غير مهر مصعب ضحك قال ليها عندك بت والله ما تحججي آدم رسل لي تصلي بالسلامه ♡ رديت ليهو بقلب ♡ امي قالت لي نشوى دي اتاخرت كدي شوفيها قولته ليها هدي بتتصل لي هديك ليها قولته ليها نشوى هنا رافعه ليك يدي قالت لي خلاص شوفتكم وفصلت الخط مصعب قال لي نشوى ماشه معانا ؟ قولته ليهو اي راجعه اهله تاني جات دخلت قالت لينا برد كعب مره واحده امي قالت ليها كنتي تلبسي ليك شي يا بتي نشوى قالت ليها ما كنت قايلاهو شديد كدا انا، مصعب كان لابس سيوتر طلعو واداهو ليها قالت ليهو لالا يااخ هسي بدفى قال ليها انا ما حاسي ببرد البسي يدفيك انا عاينته ليهم وضحكته مصعب قفل قزاز العربيه المقاصدو قولته ليهو هسي ما قولته ما بردان ؟؟ قال لي لا عشان الغبار بس قولته ليهو اهاااا مصعب طول الطريق كان بحاول يفتح مواضيع مع نشوى الوحيدين الكانو بتكلمو العربيه كلها صانه الا هم امي نامت وخالي ساكت بعد وصلنا نص المسافه خالي بدل مصعب عشان تعب من السواقه ،، آدم رسل لي مقطع صوتي شلته سماعه نشوى سمعتو كان بغني بقول ...
