بطني وجعتني شديد حسيتو وجع ولاده نشوى جرت نادت امي وامي ضربت لخالي فرح اجرنا اقرب ركشه ومشينا المستشفى طوالي قالو لينا دا ما وجع ولاده وانا بطني عايزه تتشرط من الوجع ما فضل لي الا اكورك والم فيني الناس قالو نتنظر الدكتور المشرف علي، خالي فرح اتصل ليهو كذا مره والوضع مكهرب شديد وانا بديت ابكي ونفسي قام شديد واطرافي خلاص بدت تنمل الدكتور جاء وطوالي قال ليهم حالا تجهزو غرفه العمليات دي عندها قلب ما بتستحمل ثانيه قال لخالي انا مش كلمتكم اقل شي يحصل ليها تتصلو لي؟؟ خالي قال ليهو اتصلته ليك بس ما رديت قال ليهم عموما ما وقتو مبدئيا عايزين حكايه تلاته قزايز دم باقصى سرعه سامعني وضعها ما بتحمل اي تاخير ، جهزو غرفه العمليات وخالي ما لقى غير قزازه بس في البنك جابه ولقو يفتشو في فضيله نفس دمي فصيلتي o- مع الاسف نادره كل الموجودين فصايل دمهم ما مطابقه معاي عدا نشوى شالو منها قزازه وحلفت الا تديني التاني بس جدي رفض عشان داخت والدكتوره قالت ليها كدا كفايه وضعها ما بستحمل ، ما كنت حاسه بشي بسبب المخدر اثناء العمليه ضغطي انخفض ودخل اخصائي قلب معاهم العمليه اخدت ساعتين بعد جهد من الدكاتره العمليه نجحت طلعوني ودخولني غرفه خاصه كنت لسه تحت تأثير البنج وما واعيه فتحته عيوني لقيت امي وحبوبه ونشوى وفي قزازه دم مركبه لي لسه امي جابت لي الطفل وهي بتبكي قالت لي جاتك بت بعد ربع ساعه البنج فكاء مني وعيت بالكامل مكان العمليه كان بوجعني شويه امي ادتني البت رضعتها وشالته مني ختته جنبي قولته ليها شيليها ما تختيها جنبي امي عاينت لي مسافه وسكتت نشوى قالت لينا بستأذن انا بعد دا اتاخرته بكره بجي غشايكم امي قالت ليها ما قصرتي يا بتي تعبناك معانا اليله نشوى قالت ليها بزعل منك والله امي قالت ليها كلو الا زعلك ،،
تاني يوم جدي قال لينا اها دايرين تسموها منو عايزين نملا الاستماره امي قالت ليهو والله ما عارفه ديك امها اتصل خالي هشام سلم لي وسمعهم بتكلمو في الاسم قال ليهم تيسير لو بترضى اسميها انا قولته ليهو موافقه قال ليهم سموها دانه بحب الاسم دا شديد انا هاا تيسير موافقه ؟ هزيت ليهو راسي جدي قال ليهم ان شاءالله شايله اسمها نمشي انا اطلع الشهاده خالي فرح قال ليهو خليك انت انا بمش وبجي جدي قال ليهو لا عندي شغل ما فاضي في وقفتهم جاء عمي الامين واحمد يشوفوني ويشوفو بتهم شويه شويه صحبات امي والخخ...
ديل طالعين وديل داخلين طول فتره قعادي في المستشفي خالتي ما جات ولا اتصال ما اتصلت لي بناته كلهم جو عدا هي ..؟! امي كانت زعلانه شديد هي وحبوبه ،، انا كنت خايفه شديد اني اوقع دانه وما كنت بقرب ليها خالص بس برضعه وبعيد لبعيد بعد خروجنا رجعنا البيت نشوى وامها جونا امي حكت لنشوى قالت ليها تيسير ما بتريد بتها وما بتمسكه ما عارفاها ماله نشوى قالت ليها دي حاجه طبيعيه اديها فتره تتعود امي قالت ليها دي بتها تتعود على شنو ؟؟ والله ما عارفاها ماله والحاجه دي مخوافاني انا زاتي نشوى قالت ليها كدي جيبي دانه امي ادته ليها نشوى شالته وجاتني بيها جوه ختته جنبي قولته ليها لا شيليها ما دايره قالت لي اجي دي بتك اشيله ليه ؟؟ قولته ليها ما عارفه يا نشوى ما برتاح بتخنق لمن اشوفه وقعدته ابكي نشوى قالت لي تيسير تتضايقي من شنو عايني ليها صغيرونه كيف عايني يدينها حلوات كيف طول عمرك بتحبي البنات شوفيها اتلفته الجهه التانيه قولته ليها لا ما دايره اعاين ليها دانه قعدت تبكي بصوت عالي قفلته اضنيني من بكاها قولته ليها اطلعي بيها برا ما عايزه اسمع صوته دا نشوى شالته وفضلت تسكت فيها قالت لي شكله جعانه رضيعها قولته ليها ما بقدر قالت لي تموت جوع يعني ؟؟ انتي خايفه منها قولته ليها ما خايفه انا بخاف اوقعه وما بحب اشوفه يا نشوى ما عارفه مالي وقعدته ابكي نشوى قالت لي جريبي شيليها قولته ليها ما قادره قالت لي انتي حاولي افتحي يدينك قولته ليها نشوى بوقعه والله بوقعه قالت لي ما بتوقيعها انا ما بخليها تقع قربته مني قالت لي امسكي بسم الله افتحي يدك عشان تثبتيها قولته ليها لالا ختيها لي في السرير برضعه وشيليها مني قالت لي طيب بس انتي لازم تحاولي تتخلصي من خوفك دا ختته في السرير رضعته واثناء ما هي بترضع كنت بعاين ليها بعد رضعت شالته نيمته ، الضيوف كانو كتاار نشوى وساره كانو بساعدو في امي وبضيفو معاها ، كذا واحده بتجي ترمي لي كلام وتمشي ساعات بترد نشوى وساعات ساره وانا ما شغاله بيهم ولا ونسه ما بتونس معاهم حررفيا كدا ما كنت طايقه زول فيهم اليوم خلص ممل ، خالي اتصل لي ورقيه بتناقش معاهو في موضوع الطلاق وما الطلاق قال لي بحاول معاهو لكن قافل مني تلفونو وما قادر اصل ليهو وبكدا المحكمه ما حاتقدر تطلقك منو مالم نقدر نصل ليهو اضايقته شديد من كلامو حسيت الدنيا ضيقه شديد، بعد تميت سبعه يوم جدي قرر يعمل السمايه امي قالت ليهو لا ما تسويها بعد نشوف راي اهل راجله بعدين بتصل لمفيده وبشوف رايه شنو جدي قال ليها كويس شوفيها واديني خبر اها عمر ما اتصل سال منها ؟؟ امي سكتت مسافه وقالت ليهو ابدا قال ليها دي عوجه دي امي قالت ليهو ما مستنييه منو حاجه اذا امو اللهيا اختي جات زيها وزي الضيوف ومشت اقول شنو تاني ؟؟ حبوبه قالت ليها مفيده دي محيراني وفاقعه مرارتي تجي لمرت ولده يوم بس وتمشي ؟؟ ولا التلفون دا ما رفعتو قال اسال من بت اختي وبت ولدي ولا الششششغله ما اشتغلت بيها بناته ديل يمشن ويجين فينا يشيلين في البنيه وهي جيه واحده ما طبقته عاد دا كلام يا خواني ؟! امي قالت ليها تلاته ايام بتي قاعده في المستشفى استخسرت فينا السؤال حبوبه قالت ليها ما عارفه البدل حاله شنو لكن طبعه كعب وحركته شينه شديد جاراتي ديل ساااي كل يوم واحكه شايله بستلته وجاينا وبتي المشيه تاني اكان جارط بتجي وبتشوفو دي بت اختها خلي مرت ولده داك امي قالت ليها انسينا من سيرته عليك الله انا مفيده دي خلاص طلعت من نفسي تلفون امي رنه كانت خالتي مفيده سلمت عليها وحكت ليها انو السمايه وما السمايه خالتي قالت ليها اعملوها اي ما عندنا مشكله وفصلت الخط ، جدي قال ليها انا كلمته الامين امس في موضوع السمايه بصراحه هو الفتحو وجاب الخروف من امس ياهو الواقف برا دا وقال لي وقت ما تقولو عايزين تسمو اديني تلفون هسا انا بتصل ليهو وبكلمو اننا حانعمله بكرا وما عايزين اي جوطه تتوزع اللحمه بس والعيلين يتلمو هنا حسب الاصول حبوبه عاشه قالت ليهو صدقته انا حاكلم هديل وفرح كدا كدا كنت ماشه لهديل اليله اشوفه حتى هي فضل ليها شهر وتولد ...
تاني يوم عملو السمايه زي ما متفقين ونشوى جاتنا هي وساره ، طبعا ساره بعد راجله التزم بالشغل رجعته بيته ، نشوى قالت لي امي انا استشيرته دكتورنا قال لي دي اكتئاب بعد الولاده ادوها فنره شويه لو اتحسنت كويس ولو لا افضل تودوها لدكتور نفسي تتابع معاه خالتي قالت ليها يعني تيسير عندها نفسيات؟ كرعلي ياولدي على وقعتك نشوى قالت ليها ما قولته عندها نفسيات قولته دا حاله طبيعيه بتحصل للبنات اللي اول مره يولدو خالتي قالت ليها بناتنا ديل كلهن ولدن ما شفنا الشفناهو دا امي قالت ليها والله بناتك ما عملو فيهن زي ما عملو في تيسير خالتي قالت ليها ماله منقصين منها حاجه ؟؟ امي قالت ليها على اساس جبتو ليها حاجه ؟؟ مستخسرين فيها قولة كيفك لا هي ولا بتكم خالتي قالت ليها جابت بت كان جابت الولد كان عزوها لكن تقولي شنو البت ما زي الولد نشوى قالت ليها افتكر انتي زاتك بت وعندك البنات ولا شنو ؟؟ جاء خالي قال لينا جيبو دانا دقيقه امي ختته في البشكير واديته ليهو ما بيها الديوان بيغادي وجابه البشكير كان مليان ملي قروش نشوى قالت لينا حلاته دي كيف ما يدفعو فيها وباسته حبوبه لململت القروش وجابت ليها كمون ربطتو في ديها قالت ليها عشان العين ما تصيبيه والقروش دي ما صاح تكون جنب البت شلوها منها هاك يا نشوى مديها لي تيسير انا كنت قاعده في السرير التاني ونشوى ودانه قاعدين في السرير الجنبي قولته ليها ختيهم في اي مكان بعد البيت فضى نشوى قعدت تضاير مع امي هي وساره جابت لي دانه قالت لي تيسير اليله سمايته منفسسك تبوسيها ؟؟ غضبت وشي بيدي قولته ليها نشوى والله ما قادر اعاين ليها قالت لي كدي قومي نحاول عايني ليها دا بيابهو هسي ؟ ساره قالت لي قولي بسم الله وصلي على النبي وحاولي تشليها سميت وصليت على النبي حاولته ما قدرته قعدته ابكي نشوى قالت لي خلاص ما مشكله بكره بتتعودي عليها ، خالي هشام اتصل نشوى ادتني التلفون هزيت ليها راسي وزحيت التلفون بيدي اتكلمت معاهو شويه وادتو امي قالت لي قولته ليهو انك في الحمام عشان ما يتحسس تيسير انا عارفه انك ما طايقه زول فينا بس خالك هشام دا بريدك شديد انتي عارفه انو هو مربيك بيدو يعني بعتبرك بتو فاهمه علي ؟ هزيت ليها راسي قالت لي حاولي اتكلمي معاهو قولته ليها نشوى ما طايقه زول انا حاسه روحي مخنوقه ودموعي جات جاريه نشوى حضتني عليها قالت لي فتره وبتعدي ،،
عدت ايام الاربعين كلها وانا بنفس الحاله ما بتكلم ولا دايما بقعد براي والاكل دا يجبروني عليه تجبر ولسه ما اتعودته على دانه ولا بقدر اشيله بليل دانه قعدت تبكي حرارته كانت مرتفعه ما قدرته امشي عليها ولا اشيله وصوته كان مضايقني شديد امي قامت عليها وبقت تهدي فيها وتلولي قالت لي انتي وقت صاحيه مالك كان شلتيها ؟؟ سكته ما رديت ليها وقعدته ابكي امي قالت لي لا حوله ولا قوة الا بالله البحصل معاكي دا شنو يا بتي 💔 حبوبه جات قالت لينا ماله البنيه ؟، امي قالت ليها جسمه مسخن بكون من تغير الجو حبوبه قالت ليها اي بكون لسه ما اتعودت الصباح امي كلمت جدي ، جدي قال ليها في دكتور بجي بتكل جنبنا هناك بعدين بحكي ليهو ونشوف رايو شنو ، خشيت الغرفه لقيت دانه نايمه حاولته اشيله ما قدرته ولا قدرته اعاين ليها قعدته ابكيامي جات لقتني قاعده في الارض وببكي قالت لي تيسير ما قالو بسو كدا كدي قومي اقعدي في السرير جرحك لسه ما برا قولته ليها ما دايره يا امي انا عايزه اموت بس امي قالت لي لا اله الا الله انتي الحصل ليك شنو ؟؟ قولته ليها وانا ببكي ما عارفه يا امي ما عارفه امي عاينت لحبوبه الصباح خالي اتصل لي اتكلم معاي شويه قال لي انا كلمته امك تجي هنا الخرطوم تغيري جو واشبع منك احسن ليك من التوتر الحاصل هناك موافقه ؟ قولته ليهو ما عايزه اطلع مكان ابدا ما جاي على بالي ولسه علي قال لي لا ما لسه الدكتور قال بتقدري تسافري بمانك تميتي الاربعين ولا حا تخجليني ؟؟ فضل ساعه بحنس فيني وعشان ارضيهو وافقته قال لي اديني امك اديتو امي فضل يتكلم معاها شويه وفصلت قال لي حانسافر بكره حابدا اجهز الشنط هزيت ليها راسي امي سمعت صوت جدي بنادي برا مشت ليهو قال ليها اها رضت ؟ امي قالت ليهو اي هشام اخوي اقنعه وقال كلم فرح حيودينا بكره وفي الاسبوع الجاي حانمشي للدكتور القالو وزاتو الايام الفاتت كان ضربات قلبه ما منتظمه وكتير بتضايق بليل وتشيل اليل صاحيه نشوف دكتور القلب فد مره جدي قال ليها خلاص حا اكلم فرح يسحب ليكم قروش قبل البنك يقفل الايام دي سيوله مافي الله يصلح الحال بس ،،
زي الساعه 6 جهزنا حالنا وخالي طلع العربيه مشى يكب بنزين مشى وجاء كنا مجهزين شنطنا و قاعدين جوه حبوبه كانت شايله دانه قالت لي شوفي دكتور القلب مره واحده قولته ليها اي خالي قال كدا قالت اي افتحي يدك امسكك دانه اخش اجيب ليك البشكير من جوه نسيتو قولته ليها اديها لامي قالت لي امك مشت تلبس امسكي البت ساي قولته ليها حبوبه والله ما بقدر بوقعه شالت نفس شافت جدي جاي من الجامع قالت لي جدي تعال اقعد هنا امسك دانه بمشي وبجي جاء قعد جنبي قال ليها جيبها المبروكه بسم الله شاله منها وقعد يشاغل فيها وهي تبتسم ليهو وتحرك في عيونه يمين وشمال قال لي بتشبهك شبه صحي امها ههههه اليدين الصغيرونه دي حقت منو اااه هههههه ويشاغل فيها عاين لي لقاني بعاين ليهو وببكي قال لي امسكي يدها هزيت ليهو راسي لالا قال لي اسمعي كلامي وامسك يدها يدي كانت بتجرف وقت قربتها عليها عايزه اسحبه جدي مسك يدي وختاها في يد دانه ، دانه حركت راسه كنت خايفه شديد يدها كانت بارده وناعمه سحبتها سرعه خالي جاء داخل بعد رفع الشنط في العربيه قال لي مشينا ؟؟ امي جات قالت ليهو جهزته انا شالت من جدي دانه وحبوبه غطته بالبشكير ودعنا جدي وحبوبه قعدت تبكي مع امي جدي قال ليها ها مره هاا بس جنكن بكاء اقل شي تتباكن حبوبه قالت ليهو اول مره يمشو مني بعيد ويطلعو برا البيت هسي تاني اقعد براي قال ليها بعيد وين بكره بجو ناطين اسكت عليك الله وقشي دموعك ديل ركبنا وخالي دور مشى ...
لمن قربنا نصل الخرطوم جدي اتصل لخالي فرح وكان متوتر شديد ولونو اتخطف ....
#محبات🚶💙
عيد استغلال مجيد وان شاءالله كل امانيكم محققه 💙💛
