တကယ်တမ်းတော့အချစ်ဆိုတာ....(Completed)(တကယ္တမ္းေတာ့အခ်စ္ဆိုတာ....)(Completed)

Part 37(Final)

(Unicode)

လက်ထပ်ပွဲအတွက် အကုန်လုံးမှာ အလုပ်ရှုပ်လို့နေတော့သည်။ ဝတ်စုံသွားကြည့်ရ၊ ပရိဘောဂသွားကြည့်ရနှင့် အားကို အားရသည်မရှိပါ။လက်ထပ်ပွဲအတွက် ပြင်ဆင်ရာတွင် ‌အလုပ်အရှုပ်ဆုံး ခေါင်းအစားဆုံးရ သူများကတော့ ကာယကံရှင်များဖြစ်ကြသည့် မြတ်မင်းခန့်နှင့်ညဉ့်ဦးယံတို့ပါပဲ။

ညဉ့်ဦးမှာလည်း အလုပ်မှ ခွင့်ယူထားကာ စီစဉ်နေရသလိုမြတ်မင်းခန့်မှာလည်း အလုပ်ကို ခန့်မင်းပိုင်အား ထုံးစံအတိုင်း လွှဲရပြန်သည်။ညဉ့်ဦးနှင့်နှစ်ယောက်နေမည့်အိမ်ကို လက်ထပ်ခွင့်မတောင်းခင်တည်းက နှစ်ရှည်စီမံကိန်းအဖြစ် ကြိုတင်ဝယ်ပြီး စိတ်တိုင်းကျ အလှဆင်ထားပြီမို့နေစရာအိမ်အတွက်က တစ်ပူငြိမ်းနေသည်။

မငြိမ်းနိုင်သေးသည့်နှစ်ပူအတွက် နှစ်ယောက်စလုံးမှာ ပြေးလွှားလှုပ်ရှားနေရသေး၏။ဒီနေ့လည်း ဝတ်စုံဆိုင်သို့ suitရွေးရန်ရောက်ရှိနေကြသည်။အဆင်သင့်သည်ပဲ ပြောရမလား ဝတ်စုံဆိုင်မှာ အချိန်ဘယ်လောက်မှမကုန်လိုက်ဘဲ ကိုက်ညီပြီး အကြိုက်တွေ့သည့်suitနှစ်စုံကို  ရွေးချယ်နိုင်ခဲ့သည်။ပြီးတာနဲ့တစ်ပြိုင်နက် ပရိဘောဂရွေးရန် ဆိုင်သို့ အပြေးအလွှားသွားရပြန်သေး၏။

အမှန်ဆို မြတ်မင်းခန့် အိမ်အလှဆင်တည်းက ပရိဘောဂပါ တစ်ခါတည်း ဝယ်ထည့်ထားလို့ရသည်။ သို့ပေမယ့်လည်း သူ့ယံငယ် စိတ်တိုင်းကျမယ့်ဟာကိုပဲ ‌သုံးချင်တာကြောင့် ညဉ့်ဦးကိုသာ ဦးဆောင်ကာ ရွေးချယ်ဝယ်ယူစေသည်။ သူကတော့ ညဉ့်ဦးရွေးထားတာတွေကို အိမ်ပြင်ထားတဲ့ပုံစံနှင့် လိုက်မလိုက်ကြည့်ပေးရုံသာဖြစ်သည်။ နှစ်ယောက်သား အခုလိုမျိုး တိုင်တိုင်ပင်ပင်နှင့် အတူနေမယ့်အိမ်လေးအတွက် ပြင်ဆင်နေတာ မောတယ်လို့လည်းမထင်မိကြပေ။

.........

မြတ်မင်းခန့်နှင့် ညဉ့်ဦးတို့ အချစ်အိမ်လေး၌ မကြာခင်မှာ လက်ထပ်ကြတော့မည့် အချစ်ငှက်လေးနှစ်ကောင်မှာ သူငယ်ချင်းများနှင့်အတူ ဆူညံကာ အလုပ်ရှူပ်နေကြပြန်လေသည်။

နှစ်ယောက်စလုံး၏ အဝတ်အစားများနှင့် အသုံးအဆောင်များကို တစ်ခါတည်းနေရာချကာ လက်ထပ်ပြီးတာနဲ့ အဆင်သင့်နေရန် တစ်လက်စတည်း ရှင်းလင်းနေကြသောကြောင့်ဖြစ်သည်။