الحلقة الثامنة عشر
ونا راقده نسمع ف فوني يرن بحتت لقيتها الساعه 4 الفجر ونبحت نلقاه قيس يرن
نا:: بصوت نعسان وراقد ايوا
قيس:: "بصوت مخنوق وكأنه كان يبكي" سامحيني نوضتك
نا:: عادي ولا يهمك اساسا كنت بنوض
قيس:: "مع ضحكة ممزوجة بدموع" ههههه لعند امتا بتقعدي تكذبي ف نفس الكذبة كلما انوضك من النوم
نا:: قعدت نحك ف شعري. كيف مزلت مانسيت
قيس:: هههه كذبتك المعهودة منقدرش ننساها
نا:: كنه صوتك هكي شن في
قيس:: مفيش شي مضايق شوية بس
نا:: بس صوتك مش عاجبني
قيس:: طربيقتي صدقيني مضايق بس ولقيت روحي ران عليكي لاني عارف انك حتسمعيني
نا:: باهي احكيلي شن مضايقك
قيس:: مواضيع واجد انتي خليكي احكي معايا ومتحرمينيش من صوتك حنقعد تمام
نا:: بديت تخوفني
قيس:: عارفك خوافة مفيش شي ياهبلة
نا:: اه
قيس:: خلاص امشي ارقدي اسف عشان نوضتك
نا:: بعد انوض خلاص معش حنرقد
قيس:: كيف تأنبيلي ف ضميري
نا:: هههههه حاجة كيف هكي
قيس:: ياستي احسن عشان نوضتك اصلا سادك ديما راقده
نا:: ههههههه دروحك انت متحبش النوم يعني نسيت كم كنت انرن عليك مره عشان تنوض
قيس:: مزلتي تذكري ابسط التفاصيل
نا:: "تلخبطت ومعش عرفت شن نقول" لا عادي بس خطرت عليا
قيس:: لعند امتا حنقعدو هكي
نا:: كيف هكي يعني شن تقصد
قيس:: انتي عارفه شن نقصد لكن حنوصحك
نا:: باهي
قيس:: يعني انا مزلت نحبك وعمري مانسيتك وبرضوا انتي عمرك مانسيتي والدليل انك مقدرتيش تكملي مع محمد
نا:: بس انفصالي عن محمد ملش علاقة فيك
قيس:: عارف بس خليني نكمل ليش نعذبوا ف بعضنا خلينا نعيشوا حياتنا مع بعضنا ليش هكي
نا:: قيس بس الي صار مش سهل عليا وانا انكسرت مرتين والشي هضا سببلي خوف من كل حاجة
قيس:: معش تقوليلي قيس را نضربك
نا:: بصوت هادئ وواطي مالا شن تبيني نقولك
قيس:: قولي مجنوني كيف ماكنتي تقوليلي
نا:: كيف انت مجنون
قيس:: مجنون فيكي
نا:: اه مزلت مانعست انت
قيس:: تي مشفتش اشطر منك ف تغيير المواضيع
نا:: هههههه
قيس:: تضحك
نا:: مالا تبيني نبكي
قيس:: لا ردي بالك تبكي نبيكي مهما صار معاكي متبكيش دموعك منبيش نشوفهن خلي ديما ضحكتك علي وجك والاهم تردي بالك علي صحتك
نا:: ليش تحكي هكي
قيس:: لاعادي بس مهما صار خليكي نسمة القوية
نا:: بديت تخوف فيا جديات راه
قيس:: ههههه لا ياهبلة عادي
نا:: ........
قيس:: " تنهد "طربيقتي
نا:: معاك
قيس:: تبكي عليا لو صارتلي حاجة
نا:: تي كنك انت اليوم شن في
قيس::" ضحك مع رشفة خشم " لا مفيش شي غير بنشوف غلاتي عندك
نا:: مش طبيعي انت شكلك شاربلك شي حاجة
قيس:: لا وين نا حتي الدخان سيبته
نا:: اه خلاص نا بنصبي نقرا شويه قبل ماتنوض اريج
قيس:: حتمشي معاها للمطار
نا:: اهااا
قيس:: وجاية للجامعة
نا:: شن دخلك
قيس:: بسم الله مش توا.كنتي كويسه
نا:: ماو حكيت معاك باادب تحسابها خلاص هيا بنسكر باي
قيس:: باي يامكلوبه
وسكرت منه وقعدت نضحك ومعرفتش ليش نضحك هل لاني اذكرت ايامي زمان معاه وحنيت او لاني تأكدت اني منقدرش بلاه غير نكابر بس كسر فرحتي كلامه ليا وطول المكالمة وهوا يهيئ فيا كأنه بيقولي حاجة ومش قادر يقولها
أنت تقرأ
#لعبة_القدر 💚(روايات ليبية) بقلم الكاتبةBent_benghazi#
Любовные романыرواية ليبية شرقاوية مميزة 💚
