الحلقة الخامسة والعشرون
وخذا دبش من الدولاب وخش الحمام ايدوش ونا قعدت انضم ف داره وطلعت للصالة لقيت بخارة بخرتلا داره وطلع من الحمام
محمد:: اووو سريعه بكل ف الضم
نا:: كنها دارك هكي وكلها دخان من امتا ادخن واجد هكي
محمد:: من بعدك
نا:: قمعز باهي خلينا نحكو
محمد:: حاضر واهو قمعزت احكي شن في
نا:: سمعت انك تبي تسافر
محمد:: عمر قالك صاح الفرخ هضا مايبيش يعقل بكل
نا:: باهي ليش تبي تسيب بلادك وهلك وتمشي
محمد:: نونا ردي بالك تفكري انك السبب را والله الي صار ملكش ذنب فيه وانك تحبي حد اخرا هذي حاجة مش بيدك وانا منيش زعلان منك ولا شايل عليكي بس انا محتاج اني نقعد بروحي لفترة نبي نعيد حساباتي كلهن
نا:: باهي مفيش داعي تسافر خليك هنا والله معزتك مايعلم بيها الا ربي وانا مش زعلانه منك
محمد:: لو تعزيني ولو شويه وافقي انك تردي لقيس لما نشوفك فرحانه صدقيني نفرح
نا:: محمد نبي نقولك حاجة بس متزعلش وبصراحة مش حابة تسمع من غيري
محمد:: احكي شن في
نا:: قيس خطبني وانا وافقت وعرسنا ف بداية الشهر الجاي
محمد:: عيونه دمعن مع ضحكة مبرووك اخيراً سمعتي الكلام ف حاجة وحده
نا:: يبارك فيك متمشيش عشان خاطري
محمد:: صدقيني لازم نمشي حتى نستفيد ونطور روحي ف شغلي انتِ بس كوني سعيده ومتريحة مع قيس وهضا يكفيني
نا:: عيوني تعبن دموع وخنقتني العبرة قيس
محمد:: كنك شن في كنه قيس
نا:: .......
محمد:: احكي شن في
نا:: قيس مريض
محمد:: كيف يعني مريض شن عنده حاجة خطيرة
نا:: انهرت بالبكاء عنده القلب وحالته تعبانه والدكتور قال معش عنده وقت
محمد:: نونااا وغلاتي عندك ماتبكيش مانتحملش دموعك اهدي بس واحكي بالشويه
نا:: مسحت دموعي اسفه جيت عشان نهون عليك شكلي زدتها
محمد:: هبلة انتِ اهدي بس واحكيلي بالتفصيل
نا:: تذكر وقت الي سألتك علي زرع القلب وهكي
محمد:: باهي
نا:: كنت نسأل علي قيس لان مريض من ثلاث سنين والدكتور قال عضلات قلبه معش ايتحملن ومفيش حل الا زرع
محمد:: مسكلي يديا بين يديه باهي متبكيش بس حنلقوا حل واهو مرات تكون سفرتي فيها خير ونلقوا قلب ونحصلوا صدقيني مفيش حد يموت الا بيومه
نا:: عارفه كل شي مكتوب بس انا ديما هكي متكملش فرحتي
محمد:: تي قولي خير بس
نا:: متقولش لحد علي مرض قيس لان محد يعرف الا انت وحتي هوا يحسابني مش عارفه
محمد:: متخفيش كوني هانية
نا:: حاسة اني دمرتلك حياتك
محمد:: معقوله عاد متحكيش هكي والله فترة وحنروح وانتِ حتقعدي بنية عمي الجالطة
نا:: ههههه نضحك والدموع ف عيوني نبيك تكمل حياتك
محمد:: ان شاء الله
نا:: وامتا حتسافر باهي
محمد:: حنحظر عرسك ونسافر
نا:: تحكي جد
محمد:: جد الجد غير معش تبكي بس
نا:: مسحت دموعي خلاص هاه معش حنبكي
محمد:: طلع طرف دخان وجا يبي يولعه
نا:: خديته من فمه مش كويس عليك معش ادخن هكي
محمد:: حاضر من جاي معاك انتِ
نا:: عمر ورؤى قاعدين لوطا
محمد:: خلاص باهي هيا ننزلو
نا:: هيا
أنت تقرأ
#لعبة_القدر 💚(روايات ليبية) بقلم الكاتبةBent_benghazi#
Lãng mạnرواية ليبية شرقاوية مميزة 💚
