الحلقة السابعة والأربعون
وقعدت ياسمين تحاول تهديني بكلامها ومابتش تقولي ان لقت قيس فاتح ومبش يرد عليها وشويه هكي ونسمع ف حاجة تهز لقيته موبايلي بحتت بنشوف من ولقيته محمد مكنش عندي نيه نرد عليه لان لو رديت حيعرف ف حاجة من صوتي وانا كان نلقا منبيش حد يحكي علي قيس مانبيش انزل من قيمته قدام الناس بس بعد قعد يرن واجد اضطريت نرد لان لو مرديتش ف حيشك ف الموضوع
نا:: بصوت واطئ ايوا
محمد:: كنك ماتردي
نا:: مكنتش تالاه
محمد:: شن اخبارك وشن دايره
نا:: تمام الحمدلله انت شن اخبارك
محمد:: الحمدلله ماشي الجو وين قاعدة ف الجامعة ولا ف الحوش
نا:: لا ف الحوش
محمد:: { يبي يزلقني ف الدوة } باهي قيس وينه انرن عليه من كم يوم نلقا فيه مقفل
نا:: اه قيس
محمد:: اهاا قيس كيف في حاجه
نا:: اه لالا غير موبايله راح هضا عليش
محمد:: باهي عطيه ليا كذا
نا:: مش قاعد توا ف الشغل
محمد:: كنه صوتك باهي شكلك مريضه
نا:: اها مزكومة شويه
محمد:: اها باهي لاباس عليكي
نا:: الله لا يوريك باس
محمد:: متأكدة مفيش شي
نا:: اهاا شن بيكون في يعني
محمد:: مشعارف خلاص معناها ردي بالك من روحك رنيت نسأل عليكي بس لانك لكي كم مكلمتيش
نا:: بارك الله فيك ربي مايغيبك
محمد:: سلمك يلا سلام وسلمي ع قيس وامجد
نا:: يوصل سلام
ياسمين:: عليش كذبتي عليه
نا:: خنقتني العبرة شن تبيني نقوله اه نقوله راجلي لاه كم اسبوع مسيبني ومانندريش عليه وين ولا نقوله راجلي يبي يطلقني بلا سبب
ياسمين:: اضبطتني خلاص باهي اسفه عشان حكيت بس معش تبكي عشان خاطري بتقتلي روحك انتي
نا:: ياريتني انموت وانتفكى يااايرتني. عارفه روحي مش مكتوبلي الفرح عارفه روحي
ياسمين:: بعيد السو عليكي معش تحكي هكي شدة وتزول ان شاء الله شدة وتزول
نا:: قعدت نبكي امتااا قوليلي امتااا مليت وحق ربي مليت
ياسمين:: خلاص اهدي مش كويس لكي التعصيب حاولي تهدي هيا سلم خيتي وتو ربي يحلها
وليد:: تي كنك سكنت اززف نفصل فيك وترد ترن
محمد:: تي وجك يابهيم كان منبيكش ضروري مادورتكش
وليد:: ها باهي شن تبي
محمد:: توا كنت نكلم ف نسمة
وليد:: تي انت حمار ولا حمار البنت متجوزة خلاص
محمد:: وليد ازف ماو حتي نا خاطب وعرسي قريب تي كنك تافهة
وليد:: خايفك تحن بس
محمد:: لا مش حنحن مروة خذتلي عقلي هبل انت نخرب حوش بنت عمي
وليد:: خلصني شن تبي توا طلعتني من المحاظرة
محمد:: نسمة توا مش قتلك كلمتها مبتش تحكيلي شي وقالت ان قيس قاعد ولا حرف ماحكت
وليد:: هبل انت اكيده مش حتحكيلك يعني ف نظرك بتشوه صورة راجلها قدام خطيبها القديم وهلها
محمد:: بس صوتها كان تعبان
وليد:: حالها مش تمام بكل وخايف عليها امس لقيناها دايخه ف الشقة شلناها للمستشفى
محمد:: كيييف اخرا قصدك بعد طلعت
وليد:: اهاااا
محمد:: اسمعني كان ماتبيش ادير حل معناها حنجي انا واندير حل بروحي
وليد:: ريح روحك كذا بعد بدال المشكلة نقعدو ف اثنين انت عارف قيس غيور علي نسمة لو عرف انك جيتها حتخرب القصة زياده
محمد:: تي هاااا مالا تبيني انتفرج وساكت
وليد:: اهاااا لانك انت ملكش علاقة بالموضوع فاهم ولالا
محمد:: بس
وليد:: تي خلاص ازف كنك تشادي ماتفهمش انت سيب البنت ف حالها مشكلة بينها وبين راجلها انت شن دخلك بيها
محمد:: حلوه شن دخلني ولد عمها
وليد:: اهوو قلتها بروحك ولد عمها لانك خوها ولانك باتها ف خليك برا الموضوع اللع يربحك
محمد:: يسير خير يسير خير
