الحلقة الثالثة والخمسون
وقمعزنا كلنا وقعدنا نهدرزو ونضحكوا وفرحانين وانا قاعده جنب بابا وحط يده علي كتوفي ولافني شوره كنت دلوعة بابا من وانا صغيرة ديما كل شي الا نسمة وماما فرحانه باان بناتها ملتمات حواليها وشويه هكي ونسمعوا الباب يدق وتطلع اسيا تفتح الباب ويخش حد وراها ونلقوه امجد كلنا انصدمنا لان مقالش ان مروح وكان علي اساس مايقدرش يجي وانا بعد شفته عيوني تعبن دموع لان من يوم مشكلته مع قيس وهوا معش جاني ولا كلمني خذا علي خاطره مني وصبت ماما تسلم عليه و فرحانه مش مصدقه روحها ان شافااتني انا وامجد الي لنا سنة غايبين عليهاا والحوش تعالن فيه اصوات الضحك والفرح وكلهم يضبطوا فيه وبابا والبنات وجا حتي سراج وعماد روح وسلموا علياا وعلي امجد وقمعزنا كلنا ف الصالة ونهدرزو وانا وجعتني ان امجد ماسلمش علياا كيفهن مجرد ان مدلي يده وهلي مااستغربوش لان كنا ف روما مع بعضنا ف يحسابو ان ديما انتلاقو وقعدنا نهدرزو لعند الساعة 6 العشيه وبدو الناس يجو صبا بابا وخوتي للمربوعه وماما والبنات قعدن يستقبلن فيهم وانا حسيت راسي وجعني خذيت مفتاح داري القديمة من ماما وركبت فوق وفتحت داري الي ليا سنة مسيبتها وكانت كيف ماهيااا الحاجة الي كانت ادير فيهااا ماما اي حد يطلع من الحوش داره وحاجاته يقعدن كيف ماهنا تنقفل. لعند يجي صاحبها وتقعدلا بعدين هواا وعياله ونحنا صغار بعد كانت تقول فيها لنا كنا نضحكوا بس توا بعد كبرنا حسيناها حاجة حلوه تحسي بشعور غريب لما تخشي لدارك الي كنتي فيها زمان وتلقيها نفس ماهياا قمعزت ع السرير وقعدت نذكر ف كل زاوية ذكرى كتت ديما غ الروشن بعد نبي نشوف قيس اول ماانوض دغري نمشي نفتح الروشن لاني نقعد متأكدة اني حنلقى وردة جوري الي كان قيس زارعهن ف جنانهم بس عشان يعطيهن ليااا وكم ذكرى وذكري مرت ف عقلي وحولت عبايتي واستلقيت شويه ع السرير لعند حسيت روحي تمام صبيت وواسيت روحي وطلعت ونا طالعه ف الممر يقابلني امجد ماشي شور داره بس الي وجعتني ان محكش معايا شي وخطم من قدامي ومشا لداره وفتح الباب وخش وسكرها حسيت روحي اعي خويااا يدير هكي معقوله انا اخته مليش غيره ليش هكي ومشيت شور داره وطقطقت ع الباب
امجد:: مفتوح خش
نا:: فتحت الباب وخشيت وكان امجد معاطيني بظهرة ويطلع ف حاجة من شنطته
امجد:: عماد هضا انت
نا:: لا هذي انا
امجد:: طالع انا توا
نا:: قمعزت ع السرير ودمعتي ف عيني ليش تعامل فياا هكي اختك راه
امجد:: يحكي ومايبحتش فياا عادي مفيش حاجة
نا:: كان مافيش حاجة نقعد شهر مانشوفكش ونحنا ف نفس المكان
امجد:: شن تبي فياا عندك قيس اهو
نا:: قيس راجلي بس انت خويا من لحمي ودمي
امجد:: لو كنت خوكي ونهمك كنتي مكسرتيش كلمتي وطلعتيني صغير قدامه تي انتي مكلفتيش روحك حتي تكلميني وقت الي صارت معاكي المشكلة كلمتي وليد وانا ماعبرتينيش
نا:: ماسكة البكية ونحكي بعبرتي وليد كان معايا وحضرها المشكلة ماكلمتش حد انا حتي ماما وبابا مايعرفوش بيها
امجد:: ووقت الي جيتك كنت خايف عليكي وقتلك هياا معايا قلتي مانيش طالعه من حوشي
نا:: قعدت نبكي شن كنت تبيني اندير نطلع معاك ونسيب الحوش ونطلق قبل مانسكر سنة علي زواجي تبي ماما تسيرلها حاجة الناس مش حترحم حيقولو اكيد فيهاا حاجة. هضا عليش اطلقت يوم عرسي قالتلي ماما مهما يسير بينكم حوشك ماتطلعيش منه هذينا مشاكل يسيرن بين كل الناس شي عادي بس ان خوياا يقاطعني عشان مانبيش نخرب حوشي هضا هوا الشي الي مش عادي و عمري ماسمعت بيه
امجد:: يبحت فياا ومنصدم من الكلام الي قلته
نا:: صبيت وجيت بنطلع شكراً ياخوياا ياسندي وعزوتي قدام الناس
