الحلقة التاسعة والخمسون
مــا قبـل الأخيــرة
ليث:: ماشالله طلعتيها انتي
نا:: اهاا
ليث:: شن في باهي شغلتيني
نا:: امشي وتو نحكيلك
ليث:: حاضر ياستي وداس بنزين ومشاا وطلعنا من شارعنا
نا:: الموضوع الي بنحكيه توا مانبيش حد يعرفه راه
ليث:: خير ان شاء الله
نا:: اول حاجة نبيك تخشيني لحوشكم ناخذ دبشي بلا ماحد يشوفني
ليث:: ليش
نا:: تقدر ولالا
ليث:: نقدر اهاا بس ليش
نا:: والحاجة التانيه نبيك تحصلي حجز بطاقة طياره لروما الايام هذي وبأي سعر عادي لان التأشيرة امتاعي مازال اسبوعين وتكمل
ليث:: بتسافري
نا:: مانبيش حد يعرف راه حتي هلي مش عارفين
ليث:: يعني بتسافري بلا ماتقوليلهم
نا:: اليوم او بكرا نبيك تخشيني ناخذ دبشي ويوم الي نبي نسافر نبيك تجي لحوش هلي وتقول انك تبي تاخذي معاك مشوار
ليث:: وهلك
نا:: هلي اساساً هضا الي يبوه وحتي قيس مانبيش نعرف ان بنجي
ليث:: ليش باهي
نا:: لان لو حد عرف مرات نغير رايي انا كلما نقعد بنمشي لقيس حاجة تمنعني بس المره هذي مانبيش شي يمنعني وانا لو مش واثقه فيك مكنتش قتلك
ليث:: خلاص كوني هانيه ان شاء الله نحاول نحصلك الايام هذي
نا:: ياريت والله تكون درتلي معروف مستحيل ننساه
ليث:: هضا احسن قرار اتخذتيه
نا:: ياريت نقدر نكمله
ليث:: حتقدري انتي بس حطي قيس بين عيونك
نا:: ان شاء الله خلاص نزلني هناا وبينا اتصال
ليث:: تو نوصلك للحوش
نا:: لا نبي شويه حاجات اصلا ونبي انتمشي ساد عطلتلك علي جامعتك
ليث:: براحتك
ونزلت وعدا ليث لجامعته ونا قعدت انتمشي ف المحلات لعند الساعة 1 الظهر وبعدها روحت للحوش خشيت لقيت ماما ف المطبخ
نا:: السلام عليكم
ماما:: وين كنتي من صبح ربي
نا:: كنت مع سلفي
ماما:: من من سلوفاكي
نا:: من يعني صلاح ولا ايمن اكيد ليث
ماما:: وشن عندك معاه
نا:: يعني كان طلعت مش عاجبكم وكان قعدت مش عاجبكم شن اندير انا اه
ماما:: امشي من وجي اصلاً شن الي يخلي فياا نحكي معاك
نا:: وين بابا
ماما:: مازال ماروح
نا:: بعد يروح خلي اسيا تقولي
وطلعت وركبت فوق لداري وقفلت الباب وغيرت دبشي ولبست بيجامتي وتوضيت وصليت الظهر وفتحت الدولاب امتاعي و وطلعت الشناطي وقعدت نرتب ف الدبش امتاعي وحطيت دبشي كله وقعدت نرتب ف باقي حاجاتي ومكنتش جايبه دبش واجد اصلاً وخليت قطعتين برا وبجامة وسكرت الشناطي وحطيتهن تحت السرير وجت اسيآ ادق علياا وقالتلي تعالي تغدي وبابا جا رفعت شعري فوق ولبست الشبشب امتاعي ونزلت خشيت عليهم لقيتهم كلهم مقمعزين ع الطاولة وياكلوا الا بابا كان مقمعز ومايكلش
نا:: السلام عليكم
كلهم:: وعليكم السلام
بابا:: تعالي من امبدري ونا نستني فيكي ومابتش ناكل لعند نجي
نا:: ابتسمت ومشيت حبيت علي راس بابا ربي يخليك ليا ياغالي وقمعزت وبديت ناكل ولاول مره من يوم ماسافر قيس ونا ناكل عادي وطبيعي كيف قبل
سراج:: ياباتي سيارتي لقيتها مخبوطه امبدري ونا مدرسها ف الباركي
بابا:: بحت فيه ومرفع حاجبه لقيتها مخبوطه ولا متعت بيها وخبطتها
سراج:: والله لقيتها مخبوطه واسأل حتي عثمان ( صاحبه) كان مش مصدقني
بابا:: وريها لعماد بعدين تو يديرها لاه
شهد:: يابابا راه استاذ الرياضيات منفهمش منه بكل
بابا:: باهي
شهد:: نبي مدرس خصوصي هضا الباهي
بابا:: لو تحطي عقلك ف راسك تو تفهمي
نا:: صاح يابابا رياضيات امتاع الهندسية واعر راه
بابا:: خلاص باهي تو نشوفلك واحد
شهد:: لا لقيت واحد كويس بكل ومشهور تو نعطيك رقمه تكلمه
بابا:: مخططه يعني انتي
شهد:: هههه عارفتك مش حتقول لا
ماما:: ف ورقة كتبتلك فيها حاجات قاعده عند اسيا بيش تجيبهن بعد تطلع
نا:: ناكل وساكته
بابا:: حط يده علي كتفي وانتي يابابا ماتبي شي
نا:: لالا
بابا:: بس اسيا قالتلي تبيني
نا:: نبي نحكي معاك ف موضوع بس بعد تكمل تو نقولك
بابا:: براحتك
نا:: كنت ناكل رن الموبايل امتاعي وكان ليث درته صامت وكملت وكالي
بابا:: من
نا:: رؤى تو نحكي معاها بعدين
