الحلقة السادسة
ونزلنا وقعدنا نختاروا ف الحلويات الي موصيه عليهن ماما وسمعت حد قال نونا وبرمت وجي ونلقاه هيثم من الصدمة معش عرفت شن نقول لان لما شفته اذكرت كل حاجه مريت بيها من سنتين
هيثم:: نونا شن اديري هنا
نا:: نسمة لو سمحت وملكش شغل شن اندير هنا هيا ي رؤى
رؤى:: هيا
وجينا نبو نطلعوا
هيثم:: استني شويه بس. نا طالع وخوذي حاجتك الي جاية عشانها
نا:: سكتت
وطلع هيثم وخذينا حاجتنا كلها وطلعنا
هيثم:: نسمة اسمعيني بس
نا:: مزلت قاعد انت
هيثم:: اسمعيني ومتحكميش عليا
نا:: تهيالي الي عندي قلته لو تحبها جديات اصبر عليها لعند تاخذها بالحلال اما جو علاقات مش حيصير
هيثم:: خلاص اليوم امي حتجيكم وتعطي فيها كلمة تمام هكي
نا:: حنشوفوا
ومشيت وسيبته وركبت ف السيارة
رؤى:: حسيته يبيها صاح
نا:: والله عاد لو جاب امه معناها يبيها صاح خاطيها معناها كذاب
ومشينا جبنا باقي الحاجات وروحنا
نا:: السلام عليكم
ماما:: وعليكم السلام ها جبتي كل حاجه
نا:: الي كتبتيهن جبتهن واتي الغدااء جعانه بكل
ماما:: واتي اها عدن صلن وغيرن دبشكن وانزلن
وركبنا صلينا وغيرنا ونزلنا انتغدوا
بابا:: نسمة كملتي اوراقك
نا:: اهااا كملن مازال ورقة الحساب
امجد:: لا درتها اليوم
اريج :: انا بطاقتي ملقيتهش رايحه
بابا:: تو نكلم عمك علي يديرلك وحده
نا:: امتا حنقدمو ع التأشيرة
بابا:: الاسبوع الجاي ان شاء الله نقدمو وبعد شهر يعطونا الرد
ماما:: عيونها دمعن هانت خلاص
بابا:: تو ترفعي راسك بيهم بعدين
وكملنا غدانا وكل واحد عدا لداره وماما بدت توتي عشان ام صهيب وميرا توتي ف روحها خشيت لداري انا ورؤى بنرقدو ودق باب الدار
نا:: من
ميرال:: انا افتحي
نا:: مفتوح خشي
ميرال:: كنك معش نشوف فيكي من اول ماخذيتي الرخصة
نا:: لا والله بس انتي معش تقعدي واجد تعالي قمعزي
ميرال:: شنو وافقتي علي محمد
نا:: انصدمت كيف عرفتي
ميرال:: شفتك امس ف الليل مقمعزة معاه ف الجنان
نا:: طلعتوا كلكم شايفيني
ميرال:: يعني وافقتي
نا:: مبدئيا بس
ميرال:: وقيس
نا:: ربي يوفقه
ميرال:: مزلتي تحبيه
نا:: مزلت نحبه بس محمد يحبني ومن يوم وغادي حنتبع عقلي مش قلبي
ميرال:: بس ردي بالك تظلمي محمد معاكي
نا:: ان شاء الله مش حنظلمه
ميرال:: نسألك سؤال وجاوبيني بصراحه
نا:: قولي
ميرال:: لو جاكي قيس وطلب منك اترديله اتردي
نا:: قيس لو بيجي كان جا من زمان لاه سنتين لا دورني ولا سأل عليا
ميرال:: بس متنسيش انك مخليتش طريقة يوصلك بيها غيرتي رقمك درتيلا بلوك من النت
نا:: هضا مش عذر ولو كان يبيني كان عرف كيف يوصلني
ميرال:: كل حد وظرفه متعرفيش ظروفه انتي
نا:: كنك ادافعي عليه ي ليلو انتي ناسية شن قالي ناسية كيف عانيت من بعده وكيف كرهت الرجالة وكنتي تقنعي فيا بمحمد ليش توا غيرتي رايك
ميرال:: انا مغيرتش رايي محمد ماشالله عليه والف وحده اتمناه وقيس برضوا شاب ماشالله وانا متأكدة ان حبك جديات ومتندريش ع الظروف الي خلنه ايدير هكي
نا:: بس قيس جرحني وسيبني ومكلفش روحه يسأل عليا
ميرال:: انتي ادرى بس انا منبيكيش تندمي
نا:: لا مش حنندم
رؤى:: اسكتن خلاص بنرقد
نا:: ارقدي وانتي ماغلى عليكي النوم
ميرال:: صبي البسي خلاص وقت
نا :: هيا هي
وصبيت دوشت ولبست تنورة سودة قصيرة فوق الركبة وبلوزة بيضا كمها طويل وفيها رسمه سوده من عند اليد من فوق ورقبتها مسكرة وخششتها ف التنورة ولبست كندرة سودا ودرت ميك اب خفيف ورفعت شعري فوق ونزلت
