الحلقة الأربعون
وعدا لقيس لباته وطقطق ع الباب وخش
قيس:: قالولي تبيني ياباتي
عمي:: اهاا تعال قمعز
قيس:: جا قمعز خير ان شاء الله
عمي:: في موضوع نبي نحكي معاك فيه
قيس:: خير شن في
عمي:: انت عارف ان نحنا جينا هنا بعد مرضت انت وسيبت شغلي غادي وكل حاجة
قيس:: باهي
عمي:: وانت توا الحمدلله بخير ومعاك مراتك ومحصل شغل هنا يعني معش تحتاجنا
قيس:: يعني قصدك تبو تروحو لبنغازي
عمي:: انت شايف بروحك شغلي غادي قعد معش حد ملاحقه وخوتك الي غادي مش غابي فيهم يلا دوب صباياهم وعيالهم
قيس:: خير ان شاء الله دير الي يريحك ياباتي
عمي:: وانت لو تبي تروح براحتك ونلقالك شغل غادي
قيس:: لا توا منبيش نروح نسمة تعبت معايا واجد وسيبت قراياتها عشاني ف لو قررت نروح بعد تكمل نسمة قرايتها نروحوا
عمي:: براحتك ياوليدي انا قلت نخليك ف الصورة
قيس:: وحتي ياسمين مروحه
عمي:: لا مازال وراجلها العقد امتاعه يكمل بعد 6 شهور ومشعارف لو يبي يجدد ولا يسيب براحتهم يعني
قيس:: اهاا فيها خيره ان شاء الله وامتا مروحين
عمي:: حاجة اسبوع اسبوعين ونروحوا ان شاء الله
قيس:: باهي تمام
عمي:: خلاص عدي تريح اكيده تعبان من الطريق
قيس:: خلاص تبي حاجة انت
عمي:: سلامتك
وطلع قيس وجانا ف الصالة وقالي هيا وسلمنا عليهم وروحنا خشينا لشقتنا وحطينا الشناطي ف الصالة وحولت اشربي وجاكتي وعزقتهن ع الصالون وجيت استلقيت
قيس:: ههههه تعباانه
نا:: بككل حاسه كرعيا مقسومات نصين
قيس:: صبي دوشي وارقدي
نا:: تو شويه ونصبي
قيس:: توا حسيت روحي ردتلي الروح بعد روحت
نا:: حتي نا حسيت روحي تريحت لنقنها حوشك حوشك غير زايد
قيس:: مش غير والله
نا:: خش دوش انت وانا تو بعدها نخش
قيس:: باهي هياا غير طلعيلي حاجة نلبسها
نا:: باهي حاضر
وصبا قيس خش الحمام ( حشاكم ) ونا خشيت الشناطي في الدار وطلعتله بيجامة رمادية وحطيتهن ع السرير وحطيت راسي ع المخدة وقعدت نستني فيه يطلع وخذاني النوم ودوش قيس وطلع ولقاني راقده لبس دبشه وجا لعندي وحط يده علي شعري وقعد يملس عليا ويبحت فيا ومبتسم
قيس:: شن داير ف دنيتي انا لعند ربي كافاني بيكي حبك ف قلبي كل يوم يزيد عن يوم خايف ف بوم نزعلك وتنزل دمعتك بسببي منقدرش نتحملك تبكي بسببي امتا ربي يرزقني ببنيه حلوه كيفك تملا عليا الحوش وتملا علينا حياتنا ربي يحفظك ليا ياروحي ويقدرني نسعدك لو وحده غيرك كانت مستحيل تبحت ف وجي بعد الي درته فيكي بس انتي تمسكتي بيا وحويتيني ووقفتي معايا ف مرضتي وان شاء الله ربي يقدرني ونعوضك وباسني علي راسي
نا:: فتحت عيوني حبيبي طلعت
قيس:: صح النوم ياروحي
نا:: كنت نستني فيك محسيتش بروحي
قيس:: هيا ياروحي صبي عشان ادوشي وترقدي
نا:: هياا
وصبيت ونا نحس ف روحي متكسرة و خشيت للحمام ( حشاكم) ودوشت وطلعت لقيت قيس مستلقي ع السرير ودهنت كريمة لجسمي ولبست استرتش قهوي وفانيليا صوف خفيف لونها بيج منقطه بالقهوي ونشفت شعري ودهنت مرطب لوجي وصبيت وجيت خشيت للسرير
