الحلقة الخامسة والأربعون
ياسمين:: اهلين
قيس:: فاضيه تقدري تجي
ياسمين :: نجيك وين شن في
قيس:: نسمة طاحت من ع الدروج وقاعدة ف المستشفى
ياسمين:: شنوووو مستشفى شنو وشن صارلها
قيس:: كان في خطر علي حياتها لو خلت الجنين وخليتهم يجهضوه
ياسمين:: شنووو من دون ماتعرف
قيس:: اهاا تعالي توا لمستشفى **** لاني بنمشي
ياسمين:: وين تمشي
قيس:: بنمشي وخلاص عندي شغل
ياسمين:: شغل وين
قيس:: ياسمين خلاص تعالي توا المستشفى
ياسمين:: وامتا جاي انت
قيس:: مشعارف امتا جاي المهم انتي مطوليش عليها لان وليد معاها واكيده بيروح
ياسمين:: وليد من
قيس:: ولد عمتها عايش هنا المهم بعد توصلي قوليلي
ياسمين:: حاضر
وسكرت ياسمين من قيس ومشت لبست دبشها بسرعة وكلمت رياض روح عشان يقعد مع العيال وهياا طلعت ومشت للمستشفي دغري اما قيس ف طلع من المستشفى وهوا كأنه مخلي روحه وراه ومشاه شور الشقة وطول الطريق. سارح ويفكر هل الشي الي يدير فيه صاح بس كانت صورتي بين عيونه والي صار كله بسببه هوا ووصل للشقة وحاس ان اخر مره بيشوفها وخش دغري لدار النوم وطلع الشنطة امتاعه وقعد يلم ف الدبش ويبكي كأنه عيل صغير يبو يبعدوه عن امه والشعور الي كان حاسه. قيس وقتها كان شعور بالذنب علي خوف علي حزن كان حاس ان وجه نحس عليا ومن يوم ماارتبط بيا وانا كل مره سايرتلي حاجة كان يحس ان الشي هضا من ربي مكتبليش نجيب المرتين هذينا عشان هوا يبعد عليا كان حاس ان بالطريقة هذي يحميني
هذي الحياة فيها الزين وفيها الشين فيها السعادة وفيها الحزن مش ديما تمشي كل حاجة كيف مانبو لازم يسرن حاجات عشان يثبتن قوة الانسان والي كان يصير معانا اختبار من ربي. وامتحان لصبرنا بس الفكرة الي كانت ادور ف راس قيس ان مستعد يعيش حزين طول حياته بس انا مايسيرلي شي بس الله غالب هضا قدر ربي ولازم يسير وهذي الحياة مش رول مفروش قدامنا بالورود وكمل قيس شنطتة ولقا بيجامتي الي كنت لابستها معزوقة ع السرير خذا وحضنها وقعد يشم فيها ويبكي وكانت هذي اكثر بيجاما يحبها وحطها ف الشنطة امتاعه ودز ايميل للشركة وقدم طلب علي اجازة لمدة شهر من دون راتب وطفا الضوايا وقفل الموبايل امتاعه وحطه ع المدخل وقفل الشقة وطلع ومش عارف وين بيمشي وهل حيرد ولالا
ياسمين:: عدت سألت علي رقم الغرفة امتاعي وركبت ولقت وليد قدام الباب.
وليد:: انتي اخت قيس
ياسمين:: اهاا انا ياسمين انت ولد عمة نمسة
وليد:: اهاا انا وليد قيس وين
ياسمين:: كلمني وقالي بنمشي وانتي تعالي هنا
وليد:: وين ماشي
ياسمين:: علمي علمك والله شن اخبارها نسمة
وليد:: مازالت تحت تأثير البنج
ياسمين:: مازلت مش فاهمة كيف طاحت وصار هضا كله
وليد:: كانت نازله من الدروج وطاحت من بدايتهن ووقت الي طاحت جت الضربه علي راسها داخت دغري عشان هكي موقفتش الا وهيا لوطا
ياسمين:: لا حول ولا قوة الا بالله
وليد:: خشيلها انتي توا لان مشعارف شن ممكن ادير لو عرفت ان خسرت طفلها
ياسمين:: حاضر ربي يعينها
وليد:: انا ماشي وتو نمر عليها ف الليل
ياسمين:: اوك
