الحلقة الثانية
وخشيت لدراي ولحقتني ميرال
نا:: خشي وصكري الباب وراك
ميرال:: كنك شن في
نا:: انا الي نبي نسألك كنك متقعدة
ميرال:: لا شي بي عشان ميرا
نا:: بطلي كذب عارفتك انا
ميرال:: مصعب
نا:: كنه
ميرال:: قالي ان يبي العرس توا ويبيه بعد يروح صهيب واحتمال كبير ان ندير عرسي انا وميرا مع بعضنا
نا:: باهي تمام ليش متعقدة توا
ميرال:: شنو ليش متعقدة دبشي كله مش.مكملته ونقصدتني ستين حاجة وبعدين ف 3 شهور تقعدي انتي مش قاعده
نا:: كيف انتي عارفه ان بنمشي
ميرال:: عارفه اها ماما قالتلي
نا:: شنو تحسابي مش.حنحظر عرسك وبعدين مشيتي نقدر نأجلها مازال الجامعة عليها 4 شهور وانا الحمدلله لغة عندي
ميرال:: بس هكي التسجيل حيفوت عليكي
نا:: لا مش حيفوت حنسجل من هنا ولا نمشي غادي نسجل واندير جوي وانروح عادي يعني مش قضية شنو تبي تأجلي ليلة عمرك عشان سبب كيف هضا
ميرال:: باهي ودبشي
نا:: نبدو نطلعوا من بكرا ونكملوه كله ومتنسيش ان مصعب قالك جيبي معاكي دبش لبسك بس انا الحوش مكملها كلها
ميرال:: مشعارف مازالت محتارة
نا:: لا متحتاريش كلميه وقوليلا باهي.
ميرال::هكي رايك انتي
نا:: اها هضا رايي
ميرال:: خلاص تو نكلمه بعدين قبل مانرقد
نا:: ايوه وخليك حنونه مش كيف ميرو عاد
ميرال:: ههههه ميرو هذي حالة
نا:: شن رايك نطلعوا اليوم نرن علي رؤى تجي ونمشوا كلنا
ميرال:: اووك باه نمشي نقول لماما بس المشكلة المصرف مسكر توا ومش ساحبه فلوس
نا:: عادي نمرو علي عماد ناخذو منه ديما عنده مبالغ هوا
ميرال:: خلاص اوك نمشي نقول لماما معناها نا
نا:: اوك ونا نرن علي رؤى
طبعا رؤى هذي بنت خالتي. مواليد.91 مخطوبه لولد عمي اسمه عمر وقريبه مني واجد
وعندي خالة وحده واسمها ابتسام وعندها بنت اخرا اسمها سهى مواليد 87 وتستغل ف مصرف ومخطوبة وخطيبها اسمه يوسف
نا:: خير ياكلبه
رؤى :: كلبة اسمك يافرخة شن جوك
نا:: جوي فوق الريح
رؤى :: اووو تطورات شن في
نا:: تو بعدين نحكيلك قتلك تعالي عندنا اليوم
رؤى :: ليش شن في
نا:: مفيش شي بس نبو نطلعوا انا وميرا وميرال نشروا دبش البنات ونبيكي تطلعي معانا
رؤى :: معنديش من يجيبني ماما طالعه وسهى بتمشي توا لصحبتها
نا:: خلي سهى تجيبك توا اصلا شويه اخرا ونطلعوا
رؤى :: باهي تو نشوفها يلا وجك
نا:: اوك باي
وسكرت منها وصبيت خشيت دوشت وطلعت جففت شعري ولبست استرتش اسود وقميص ابيض وجاكة رسميه سودا ولبست بوت اسود فرو ومزلت نلبس رنت عليا رؤى
نا:: ايوا جيتي
رؤى:: اها جيت ومفيش حد فتحلي
نا:: يييه الغفير ف اجازة تو ننزل انا نفتحلك
رؤى :: بسرعة باهي جمدت م الصقع
نا:: هيا هي
ونزلت عشان نفتحلها ونا نازله كانوا بابا وماما ف الصالة ويهدرزوا
بابا:: قتلك ياليلي
ماما:: نعم
بابا :: شن رايك ف محمد ولد خويا
ماما:: من اي ناحية
بابا:: من جميع النواحي
ماما :: ماشالله عليه بس شن خطره توا
بابا:: اليوم جاني ف المكتب وقالي انا ياعمي دكتور ومتخرج وبشغلي وبحوشي ومش ناقصني الا بنت الحلال وقاصدك
ماما:: من يبي قصده
بابا :: يبي نسمة
ماما:: بس نسمة قاعده صغيرة وعمرها 18 سنة واختها الي اكبر منها مازالت قاعده
بابا:: هوا قالي ان حيخليها تكمل قرايتها وخصوصا ان بتطلع برا وقال العرس مش توا كم سنة اخرى بس هوا ميبيهش تضيع من يده يبي خطوة رسمية بس
ماما:: والله ماني عارفه شن نقولك بس نونا عارفتها مش حتوافق
بابا:: انتي شوفيها العيل ماشالله عليه والنعم فيه
ماما:: تو نشوفها انا
