الحلقة الخامسة والثلاثون
قيس:: ماسك البكية طمني يادكتور
ياسمين:: ها شنو يادكتور
الدكتور:: انت زوجها
قيس:: اهااا
الدكتور :: درنا الي نقدروا عليه بس للاسف
قيس:: دموعه نزلن شنوووووو شن تقول انت نسمة شن صارلها احكككي
الدكتور:: اهدا يااستاذ زوجتك بخير وتعدت مرحلة الخطر
قيس:: مالا شنو احكي شن في
الدكتور:: نحنا للاسف مقدرنش ننقذ الجنين لانها نزفت واجد والضربة كانت قوية
قيس:: الجنييين !!!! وحط يديه علي راسه يعني نوناا كانت حامل يعني الدوخة الي تجيها والنوم كله من الحمل
الدكتور:: حضرتك مكنتش تعرف المدام كانت ف بداية الشهر الثاني
قيس:: طاح علي ركبيه وقعد يبكي يبكي لان خسر الفرصة الي كان حيكون فيها اب يبكي لان ممكن عمره مايكونش طويل عشان نحمل من جديد ويبكي عشان يحس ف روحه سبب الي صارلي مع ان هضا كاين قدر ومكتوب
عمتي:: قعدت تبكي بعد شافت قيس يبكي لان حست بشعوره الي حسه ف اللحظه هذي
ياسمين:: نقدروا نشوفوها توا يادكتور
الدكتور:: توا عطيناها مهدئ ورقدت
ياسمين:: وامتا تطلع
الدكتور:: بكرا الصبح
ياسمين:: شكرا يادكتور تعبناك
عمتي:: نزلت علي قيس خلاص سلم وليدي صبي خليك قوي عشان نونا وربي ان شاء الله حيعوضكم
قيس:: مسح دموعه وكان ربي خذا امانته قبل مايعوضنا
عمتي:: معش تقول هكي بعيد السو عليك
قيس:: كله مني انا
ياسمين:: قيس نعرفك قوي انا لازم تشد حيلك مش اخر الدنيا الي صار ونسمة مش اول وحده تخسر جنينها الحمدلله ان هيا مصارلهش شي احمد ربك كنك هكي
قيس:: صبا محد حيحس بيا ويفهم شعوري كيفها هيا
وطلع من يلاهم وخش الحمام غسل وجه وطلع ف الجنان وقعد رافع راسه للسماء وماسك دموعه ويفكر ياربي انا عارف ان هضا قدر ومكتوب ولا اعتراض علي حكمك ياربي كون معايا وطول ف عمري ياربي اشفيني واحفظلي نسمة وخشن عليا وعمتي وياسمين ولقني راقده طلعن وقمعز برا. قدام الدار وقيس قعد برا شويه وخش
قيس:: قمعز جنب امه واخته ياامي نبي نطلب منك طلب
عمتي:: قول ياوليدي
قيس:: مانبيش نسمة تعرف انها خسرت جنينها
ياسمين :: كيف لامااتجيش
عمتي:: يعني تبي ادس عليها نفس موضوع مرضك
قيس:: بس نسمة عارفه بموضوع مرضي
عمتي:: امتا عرفت
قيس:: مش مهم امتا عرفت بس المهم عرفت
عمتي:: بس موضوع زي هضا متقدرش ادسه عليها
قيس:: بس انا مانبيش اندسه عليها بس نبيها تهدا قبل
وخلال كم يوم حنقوللها وحيكون عندها العلم
عمتي:: براحتك ماندخلش بينك وبينها
قيس:: رني علي ليث خليه يروح بيكم
عمتي:: لا خلينا معاها
قيس:: لا عدي شنو ناسيه ان. بكرا عيد وبكرا تو نطلعوا ونجو
عمتي:: براحتك رد بالك منها
قيس:: ان شاء الله
ورنت عمتي علي ليث وشويه وجاهن. وجابلي معاه دبشي وروح بيهن وخش قيس عليا لقاني راقده قمعز جنبي ع الكرسي ومسك يدي وقعد يبكي لما تحب حد من قلبك وتقعد مستعد انك تضحي بروحك عشانه ولدرجة متقدرش ترفضله طلب ولو طلب عيونك تعطيه تفرح لما تشوفه فرحان وتكره روحك لما تشوفه مضايق حتي لو مكنتش انت الي مزعله ف مابال لو صارتله حاجة وحسيت روحك بتخسره اليوم قيس حس بشعوري وانا خايفه نخسره لان للحظه حس ان حيخسرني بس ربي لطف بيا ولكن قيس خسر ولده وفرصته ان يقعد اب وكان قيس شخصيته قويه و علي صغر سنه كان فارض احترامه ع الناس بس كان مايتحمل فيا شي كنت انا نقطة ضعف قيس لو بزتني ابره يقوم الدنيا ويقعدها عشان هكي مقدرتش ننساه ومقدرتش نحب غيره والحمدلله ربي جمعني بيه كنت راقده ومش حاسه بشي بس كان قيس يبكي ويتعذب ويذكر ف كل ذكرياتي معاه كان يحس في روحه السبب ف الي صارلي لان طحت ف حوش هله بس هوا مكنش السبب هضا شي مكتوب وقعد قيس طول الليل وهوا ماسك يدي وبحتت ف الساعة امتاعه لقا ان موعد صلاة العيد قرب مني وجا عند وذني وعيونه معبيات دموع وقعد يقول بصوت واطي
