فوق جمرات الأنتقام

البارت الثاني

#بقلم إيـزابيـل
#البـارت الثاني
#فوق جمرات الأنتقام
..
مساء الحب جمعه مباركه

اكلكم اتمنى تعذروني اذا مرات خبط الكلام عندكم مره جنوبي مره بغدادي لان من اندمج انحرف عن الكلماات الي المفروض التزم بيهه وببدال ما اكتب اعاين اكتب اباوع فـ اعذروني وانتو حولو الكلام من يمكم

قراءه ممتعه
..
الطعنه  من تاخذك امواج بحر العذاب وتستقوي عليك وماتكدر ترد وتتمرد و مجاذيفك ملويه الضعف من تحس محاط بناس ربيت على ايدهم

كبروك وظلموك الخذلان من يباوع بعيونك ويحلف بالوفاء وبمجرد ما تسلمى نفسك يحطمك يتبخر الوفاء تختفي الوعد..

احط ايدي على كلبي كل عقلي ارد اشوفه شلون جاي يحترك مو بس عطابه بخشمي الذله صعبه
وطلب الامان من ناس اول مره تلمحهم اصعب..،

اصفن على نفسي واكول شني الغلط الطلع مني انه شرتكبت خطأ حتى يعتبروني عاررر...

انذبح بسبب واحد حقير طعن بيه وجذب ولفق مستحيل وحتى لو جان مكتوبلي الموت اذب روحي جوه سياره ولا اخليهم ينحروني...

طبطب الشيخ على جتفي وكلي انت بعيوني اعتبري روحج بأمان محد يكدر يوصلج...

دنكت راسي وامسح بعيوني واخفي الدموع حيل خجلانه انه لا اعرفه ولا شايفته هو مجرد صديق قديم الجدي وورطته وياي..

رفعت راسي علي واعاين بعيون مسلوبه منهه الروح
:شيخ اتمنى تعذرني والله انه خجلانه منك حيل لان ورطتك بشيء انت مالك علاقه بي..

: لا بويه شني هالحجي هذا واجبي وغصباً ما عليه اسوي..

سحبت نفس ولفيت عباتي الحضني واعصر بيهه بقوه صاح بصوت عالي
: ام احمد ام احمد

اجت المره تركض : ها شيخ أمرني

:ما يأمر عليج عدو بس اخذي البت شوفيلهه غرفه ترتاح بيهه

ام احمد
: شيخ الغرفه القديمه وسخه وينراد الهه تنظيف بس المخزن فرغته ومابي..

قاطعهه وعاط بصوت عالي
: شني هاييي مو عيب عليج تحجين هيج تردين اخلي ضيفتنه بالمخزن اطلع من غرفتي وهي ادش بيهه اذا تطلب الأمر..

ام احمد
: اعذرني مو قصدي انه هسه اروح انظفهه الهه

اشر بأيده بأنزعاج
: اخذيهه يم البنات وعود نظفي على راحتج

ماعلقت بو لا حرف اشرتلي براسهه اكوم وراهه..
هي مره جبيره خطيه مبينه مابيهه حيل تشتغل تعجب جا شموازيهه على الخدمه وهي تمشي وانه وراهه سألتهه..

: حجيه ولو ازعجج ليش تشتغيل هنا وانت مره جبيره

جان تعيط بيه
: انت الظيم حالج ووجهج مكلوب ودخيله والج خلك تسألين..