فوق جمرات الأنتقام

الفصل العاشر

#بقلم إيـزابيـل
#الفصل العاشر
#فوق جمرات الأنتقام
..
غزلان

بعدت تقريباً بعد شارع ووكفت بمكاني الهث وانفض عرك فورا نزلت دموعي وبجيت بألم..
ياربي ساعدني دخيلك والله مالي غيرك وين اولي هسه شسوي بروحي والله لو حلال جان حركت نفسي وخلصت من هالهم..

التفتت ورجعت بخطواتي البيتنه امشي بجسد هزيل وخطوات بطيئه تعبانه كلش تعبانه احس نفسي راح اموت فتحت الباب ودخلت..

جان اشوف امي واكفتلي بالباب من شافتني دخلت جرتني من جتفي وتصيح بوجهي
: وين وليتي ولج الله يصخم وجهج ماتتوبين انت اله تخلينهم يكتلونج يله ترتاحين..

صحت بيهه
: يكتلوووني على شنووو غير اعرف شكو وشمسويه من ذنب انه جاي اتعاقب وماعرف شني ذنبي ابن حماج الحاطينه على روسكم يهدد بيه ويتوعد واحرككم واحرك اهلج ونصيبي ابوج وانه اريد اطيح سمعتكم شصايرررر فهمنييي يمه راح اصعد اذب روحي من السطح ومحد يوكف بعيني وكولي نعلان غزلان ماكالت..

اجيت اروح جان تلزمني من جتفي وتوكفني مقابيلهه : شكلج..؟!

: باليوم الي طلعت للبستان ولحكني وانتم ما صدكتوني هو بوكتهه اجاني وهيج هددني...

عضت شفتهه بخوف وخلت اثنين اديهه على راسهه : عرفته عرفته مو خالي جاي وجايب وويااا مصايبببب وعمايل جا انه شكتله موش كتله لا تثق بي يرائد تره الولد مبينه نيته كشره لا يغرك بمضهره الخارجي بس ما اقتنع..

جرتني من اجتافي وحضنتني وتبجي
: الذنب مو ذنبج حبوبتج وابوج لعبو لعب يمه قبل ٢٠ سنه حولو هذا البيت الرعب..

شلت راسي واباوع الهه بملامح حايره
: شصاررر

بلعت ريكهه ومسحت دموعهه ووجهه بقوه واشرتلي ادخل للغرفه : امشي بغرفتج وديربالج تفكرين تخطين خطوه تره باقر هي هاي نيته..

عفتهه ورحت بدون ما اعلق على شيء بس داخلي جان رافض يعوف امي قبل لا افتهم شصاررر..بس اضطريت اروح دخلت للغرفه قفلت الباب ذبيت العبايه بالكاع احس على جتفي جبال هموم؟

تمددت وفكرت! شيصير لو ما حوراء مفتنه عليه
وكايله الحبوبتي على مكاني! هم جان كدرو يلكوني

بس خطيه هي صغيره كل عمرهه ١٥ سنه اكيد
حبوبتي خوفتهه وجبرتهه تحجي نفخت بجزع

وغمضت عيوني نمت ثاني يوم كعدت الصبح غسلت وكفت الم بشعري وامسح بوجهي من بقايا المي نفتح الباب ودخلت امي..

باوعتلي بقهر وكالت
: ها يمه شلون صرتي!

تعجبت المفروض امي هسه ما طايقتني وضايجه مني بسبب محاوله هروبي البارحه بس ليش هيج مستعطفه وياي..

كلت الهه وانه اتمشى اكعد على الجربايه
: مابيه شيء الحمدلله..

كعدت بصفي على الجربايه وجهه مكلوب اصفر
: احجيلي بعد شكلج باقر