فوق جمرات الأنتقام

الفصل الحادي عشر

#بقلم ايزابيل
#الفصل الحادي عشر
#فوق جمرات الانتقام
..
قوت

مليت يوميه رايحه للمركز على ابو اقوال وجواد لحد الان بالمستشفى مامعروف مصيره..

اليوم بعد ما نومت عبدالله واكدت على حبوبتي اذا جاع تشربه حليب َولو اعرف راح تنسى بس بلكي تشوف الممه بصفهه وتتذكر..

رحت لبيت الشيخ اول ماوصلت ب٨ الصبح بعد تقريباً كلهه نايمه بس ام احمد موجوده هي اصلا
اكثر وقتهه يمهم ومرات تبات هناك ماخذه اقامه
وبيهه فسفوره هم..

رئساً بدلت ووكفت احضر الهم الريوك حطيت البيض على النار ينسلك والجاي هم..

اوف لو ابوي شيخ لو امي شيخه جا ما هسه انه نايمه بسابع نومه والشخير لابو موزه والناس تحضرلي الريوك..

اباوع الاديه نهلكت من كد الشغل الي بعمري من كد ما اديهن ترفه تلزمينهه توكع اله انه عبالك خشب حسبي الله ونعمه الوكيل بكل شخص جان سبب بحالتي هاي..

عمامي المفروض اتباهه بيهم وانه اصلا ماعرفهم منو تعاجزو من لكمتي وذبوني على خوالي...

يله ياربي راضين بأمتحانك بس كون تجازيني على تعبي شويه وحسيت بصوت خطواته تقترب
انه منطيه ضهري وواكفه على الطباخ..
..
صوت بسطاله يرن بأذني وحضوره جان يخليني لا ارادياً اسكت نداريت واشوفه واكف على المرايه الي على السنك ويعدل بياخه قميصه العسكري النضارات بجيب قميصه ومن النضافه احسه يلمع..

اي ليش لا همه ذوله الفايخين شوكت ماتشوفهم كاشخين حتى استحي من اباوعله بله انه بنيه وهو رجال..

باوعلي بطرف عين وكال
: شعجب اليوم من الصبح!

قلصت عيوني
: انه من النوع الي اذا اشتغل بشيء يبذل كل جهده بشغله اجيت من الصبح حتى احضر الريووك من وكت واخلص قبل لعصر..

رفع حاجبه وهز راسه بجمود بودي اكله مايلوكلك اسلوب الجمود انه ادري بيك خفيف..

راح كعد على ميز الطعام وكال
: خوش يعني ما راح انتضر الاكل هواي

كلت بضحكه مصطنعه
: للأسف راح تنتضر لان توني بديت..

ماجاوبني بس باوعلي بنظره مدري شلونهه وطلع موبايله يكلب بي..

سألني
: ام احمد وين! مو تدري انه ما احب اكل اذا مو من ايدهه..

قوت
: هههههه على بختك استاذ هنه بيضات قابل هي تسلكهن بدون مي لو تغير طعمهن..

رجع ضهره للكرسي
: لا بس تتبع النفسيات

هذا شبي شلون يخليني استعمل السجينه ضحكت بمجامله واضحه
: انت ما مجرب نفسيتي تاكل اصابعك وراهه..

ابتسم بسخريه كملت وتقدمت يمه خليت الاكل واستكان الجاي باوع وكال
: تره انه الصبح اشرب كهوه!!