فوق جمرات الأنتقام

البارت الثالث

#بقلم إيـزابيـل
#البـارت الـثالـث
#فــوق جمرات الأنتقام
..
يالبعـادك خنجَر بحـدّيـن وسنيني ذبيحـَه..
شلون يالشوگك جبل  بالـرّوح  ياچِلمة التّزيحه؟

كاظم إسماعيل الگاطع
..
هلاو ياحلوين مساء الخير لكل شخص موجود حالياً 🌹🌹

موعد النشر حسب تفاعلكم احتمال يتأخر البارت اسبوع ويمكن ثاني يوم انزل الكم البعده
فـ انتو وتفاعلكم مو تنسووون المشاركه والتاك..

ََ..
غزلان

الرهبه بذيج الساعه جان كتلتني منا خوفي اخاف يطلعون اهلي ومنا صوت الرمي..

كامو كلهم فد كومه وبنفس اللحضه مادري ليش عيني اجت صوب برهان ملامحه متجمده والغضب تمثل بخطوط على وجهه عيونه عبالك تريد تزئر..

كام الشيخ وباوعلي فورا يمكن هو هم حس مثلي.

مروان
: منو هذا اليتجرأ يرمي بيت الشيخ فالح ال ثابت حجي سلوم وولده اعرفهم خيخيه ومايسوونهه..

برهان
: انه اعرفهم كلش عدل بويه انت اكعد باسل ومروان ومعاذ ديربالكم تطلعون هسه وانتن..

باوع النه انه وسما وحور جنه كاعدين وحده بصف الثانيه

برهان : ادخلن جوه بالغرفه لان رمي كلشي يصير خاف يلوحجن طشار..ام احمد ماكو داعي اوصي..

ام احمد
: بعيوني

لتاف من ورا ضهرنه ومشى رغم ما يركض بس احس خطواته سريعه..

دموعي بعيني وارجف اذا اهلي شلون والله اموت بدمي كدام الشيخ هو كعدني يمه وأواني وفوك كل هذا تجي المصايب بسببي..

باسل كام من مكانه نفض ايده وكعد على التخم براحه تعجبت عليهم ولا جن طلق وصوت صياح..

ومروان كعد بصفه ويحجون عادي وانه ضاله اتبلعم..

باوعت للشيخ ََمنزل راسه وحاد سنونه ويفك ويرجع يسد بأصابعه على راس العصى الازمهه..

معاذ
بويه انت شني مخلي برهان يتصرف بكيفه راح يودينه بستين داهيه ماتعاين ذوله شلون راح يهدون البيت فوك روسنه ليش خاتلين وما نطلع الهم نرد الهم الصاع صاعين..

باسل
: مرخصتك شيخ انچب ولك خاتلين شني غير اذا اريد هسه اطلع اسحك روسهم بس تدري كلش زين برهان چبيرنه هو والشيخ  ومن حقه يسيرنه وبعيد عن كل هذا هو يتصرف صح ويعرف شجاي يسوي ويحسب للخطوه الف احساب..

كمت من مكاني ولطشت بسما الي هم راحت على التخم وام احمد تلم بالمواعين..

ماكو ثواني وحسيت بصوته يرج المكان
: عوفه باسل عوفه..

تقدم وكف كدام معاذ الي مصوفر جر ايده وخله بيهه سلاح وصاح بيه
: اطلع يله اريدك تمردهم مرد يله محد يمنعك