وضاقت الأرض بي

الجزء الثاني البارت الثاني

#وضاقت_الأرض_بي

للكاتبة #لبنى_الموسوي

ظليت واگفة بمكاني
يجوز شي خاص ميصير اتطفل عليها
طلعت منه مدري شنو وبدت تقرا شوية وصارت ايدها ترجف بوضوح

خليت الملازم ع المصطبة ورحتلها
بعدني ما واصله ما احس إلا ريحان تكومت من طولها بالگاع

صحت ريحان شبيچ
على صوتي اجو الولد القريبين يركضون
خلوها ع المصطبة وواحد منهم طلع العطر رش بيدة وحطة على خشمها

باوعت عليها الشفة زرگة ويابسة
ادري ارتفع سكرها بس شنو شافت بـ هالظرف وهيچ صار بيها

التفتت وراية لگيته مشمور ويا غراضها
شلتة من الگاع هذا كارت دعوة بديت اقرا بصدمة

تتشرف عائلة ******
بدعوتكم لحضور حفل زفاف ولدها جمار
وذالك يوم الخميس المصادف 10/24 تمام الساعة الرابعة مساءاً في قاعة ******** وبحضوركم يتم الفرح والسرور

اختنگت من يمي
التفتت عليها چانت صاحية والطلاب داير مدايرها يسألوها شجاي تحسين

رحت يمهم وحچيت بصوت عالي
- مشكورين ما قصرتوا
بس هي عدها سكر والضاهر ارتفع
هسه بس نوصل للبيت تاخذ علاجها وتصير احسن

- اخاف تحتاج ناخذها للمستشفى

- لا شكراً
اصلاً اخوها بالطريق يعني مو وحدها لتخافون

- شتحتاجون احنه بالخدمة

- العفو خوية خادم ربك ان شاء الله

بس حچيتها راحوا
باوعت الريحان صافنة والجسم يرجف شلت موبايلها اتصلت بحبيب

- الو ها خوية خلصتن

- ها حبيب اني غسق
خلصنا اي بس ياريت تستعجل لأن ريحان تعبانه شوية

- خير شني تهيس خوبن ما بيها شي ؟!!!

- يمكن سكرها صعد
لتطول عفيه حتى تضرب الابرة ترى وضعها مو تمام

- جاي جاي مسافة الدرب

حچاها وسد الخط
رجعت يم ريحان لزمت ايدها افرك بيها بهدوء
اريدها تصحصح ماكو جسمها صار مثل السعفة بس ينفض والوجه مگلوب لونه

- ريحان تسمعيني
ريحان جاوبي ترى حبيب ديجي بالطريق راح اگولة على سالفة البطاقة

گبل باوعتلي
- لا غسق ديري بالچ تحچين
ما اريدن اي ادمي يعرف بـ هالسالفة لا هساع ولا بعدين

- يعني منگول حتى الحبيب ؟!!

- لا حبيب ولا إسحاق ولا حتى الابوي

- اي ميخالف مراح احچي بس اهدي لترجفين

- ناوليني الملازم بلايه امر اعليچ

گمت جبتهن وبقى الظرف بمكانه
اشرت علي يعني جيبي شلته انطيتهيا چان تشگگة بحرگة وتطشرة على كبر الگاع