وضاقت الأرض بي

الجزء الثاني البارت السادس

#وضاقت_الأرض_بي

للكاتبة #لبنى_الموسوي

غسق.. بالليل گاعدين بالصالة نتعلل
اجة للشيخ اتصال باوع للتلفون واخذة وراح للديوان

تأخر هواي
قريب النص ساعة رجع للصالة سألتة الحجية ياهو الدگ اعليك

باوع للولد وگال
عمتكم صبيحة راح ترد للبصرة عگب اسبوع وآنه بلغتها تسكن ويانة بـ هالدار

صفنت بـ استغراب
ما ادري الشيخ عندة اخت ثانية غير عمة سكينة

الكل رحب بيها
ما لمحت احد اعتراض عن هالخبر غير الحجية
واعتراضها مچان بالكلام لكن ملامحها بينت بوضوح عدم الرضا عن قرار الشيخ

بيني وبين نفسي خفت
اني ما صدگت اتعود عليهم واتقبل الكل بسلبياتهم قبل ايجابياتهم

وهسه عمة إسحاق راح تجي تعيش هنا
يا ترى راح تطلع مثل العمة سكينة لو لا تاخذلي دور نجيبة النسخة الأصلية بما انو هي عمتها هماتين

تركت مخاوفي للزمن
فترة بسيطة تجي لهنا وراح اتعرف عليها مباشرتاً وتبين منو هي وشنو تركيبتها

وان شاء الله حتى لو ما طلعت مثل عمة سكينة قابلة تطلع مثل الحجية ساعاتها براحتها
المهم عندي متأذيني وتشد وياية لأن ادري بحظي شگد نحس

مشت الأيام ومر الأسبوع
يوم الأحد إسحاق طلب مني ما اداوم لا اني ولا ريحان

ومن سألتة ليش
گال اليوم توصل عمة صبيحة ومن كل وبد تستقبلنها ويا البنيات

اباوع للبيت بيومها انخبص
البنات يركضن تعزيل وترتيب وطبخ اشكال الوان اليگول راح تجي عشيرة كاملة مو نفر واحد

ومن اسألهن
ماعدهن وقت حتى يجاوبني على سؤالي
ياهي الأسلها ليش كل هذا تگولي بعدين احچيلچ

مشكلتي فضولية كلش
وبنفس الوقت خجولة بحيث اسبوع كامل
ما تجرأت اسأل إسحاق عن عمتة وين چانت وليش جاية تعيش يمنا

للضهر سمعنا صوت الباب
اول ما گامت الحجية بعدين البنات راحن وراها
شلت ود خليتها بحضني وظليت گاعدة بمكاني انتظر طبتها

هن واگفات بأول المرر اشوفهن من يمي
انفتحت الباب الداخلي وطب الشيخ لازم ايدها

باوعت بتعجب
ما توقعتها مرة چبيرة بهالعمر حتى اكبر من الحجية مبينة وتمشي ع العكازة

دخلت الكل بوسوا راسها
بعدين الشيخ بعدهم حتى تطب ترتاح
من وصلت يمي باوعتلي ورفعت مناظرها هاي ياهي

إسحاق.. حرمتي عمة

صبيحة.. يييع مريت الغالي تعالي انطيني حبة

لزمتني شبعتني بوس
ود بيناتنا صارت تدفع بيها وتصيح (اختندت) عود اختنگت وهي مستمرة تبوس