وضاقت الأرض بي

البارت الخامس

#وضاقت_الأرض_بي

للكاتبة #لبنى_الموسوي

بعدني اركض احاول ارجع للمكان احتمي بي
ما احس إلا وفجأة تقيدت حركتي من الخلف جمدت بمكاني

خايفة اباوع وراية
كل الافكار السلبية راودت عقلي بهذاك الوقت
منو ممكن يكون لزمني معقولة واحد من عديمين الشرف

سمعت صوت الكلاب بدت تقترب كلش
درت وجهي سريع واشوف تنورتي مشكلة بأسلاك شائكة ممدودة على طول الگاع لذالك تقيدت حركتي

دنگت حتى افتح السلك منها
ما اشوف إلا الكلاب اجت تركض علية
جريت تنورتي حيل بحيث انشگت وصرت اركض بكل قوتي وهن يركضن وراية

انگطع نفسي من سرعتهن
الأصوات چانت مرعبة مبين جوعانات وما صدگن يشوفن فريسة گدامهم ترحمهن من هذا الجوع

الدنيا ظلمة ومداشوف الطريق گدامي
عثرت بالصخرة وگعت على وجهي اخذن ملابسي بأنيابهن صرخت خوف بكل صوتي

يا رب ساعدني ياااااا رررررب
شلت حجار من الگاع ضربت عليهن بقوة
رجعن خطوة للخف گدرت اگوم واركض لحد ما وصلت للمكان

طبيت سريع وقفلت الباب
ظلن بالمكان ينبحن قريب الخمس دقايق
اما اني فـ ما اگدر اسحب النفس الصدري من التعب الچنت احس بي وقتها

شوية واختفى الصوت معناها راحن
جريت نفسي بالگوة احاول اشوفلي مكان اگعد بي حتى ارتاح

چان جسمي ثگيل بشكل
اسحب بي بالگوة مثل النملة التحمل الطعام على ظهرها علمود تخزنة وتحافظ على حياتها من الموت

اما روحي فـ شي ثاني
ثقلها چان يعادل ثقل السماوات والأراضين ورغم كل هذا اصرت تتمسك بجسمي ومتغادرة علمود تشاركة تعب هالدنيا الظالمة

گعدت يم الحايط وسندت نفسي علي
والله وكت هاي الظلمة الچنت اخاف منها طول حياتي هسه صارت متهز مني شعرة

نزلت دموعي بحرگة
فجأة انعاد الشريط گبال عيني واني اتذكر شلون اغتصبوني واحد ورى الثاني لا ارادياً گلبت معدتي

الله لا يوفقك مهيمن الكلب
لك شلون گدرت تسويها راح اتخبببببل؟!
شلون قبلت غيرك يعتدي على عرضك گبال عيونك وتوگف تتفرج !!!!

انهاريت بالبچي ودموعي تسابقت على وجهي
صرت اشهگ بحرگة واحچي ويا روحي لحد ما تعبت وانگطع نفسي

حسيت جسمي ثلج
الگاع باردة وملابسي مو ذاك الثخن شوية وگمت ارجف من البرد اريد شي يدفي جسمي ماكو

بين وجع روحي والألم اليحفر بگلبي مر الوقت
طلع الضوة واني منايمة دقيقة وحدة
طول الليل افكر شلون ارجع الأهلي وشراح يكون مصيري بعد هذا اليوم

باوعت الملابسي مو عدلات
سندت نفسي وصرت ورى الباب عدلتهن ولبست حجابي وطلعت

المكان مثل ما گالوا چولة
عبارة عن صحراء وبس الحيوانات منتشرة بيها