وضاقت الأرض بي

البارت الخامس والثلاثون

#وضاقت_الأرض_بي

للكاتبة #لبنى_الموسوي

نايمة بالليل دگ جهازي
رفعت راسي بالگوة النومة بعدها بعيوني
باوعت للساعة بلا تركيز مدري شگد بس المهم الفجر
چان رقم غريب رديت وما اسمع إلا العياط

گمت على حيلي مخروعة
يا ستار يا ربي هاي منو وشنو هذا الصياح
شوية واجاني صوت بنية
تحچي وتناشغ اريد اركز بكلامها ماكو اخر شي خفت وسديت الخط

گمت طلعت للصالة
گعدت على التخم اباوع للرقم رجعت اتصلت جاوبتها
نعم عيني تفضلي منو وياية ؟!!

- عليا عليا شمس بت خالتچ

- ياااا ولچ شبيج تبچين خااالتي بيهاااا شي اااحچي

- ابوية... وبچت
ابوية مات شمس وامي واگعة ما اعرف بيها نفس لااا

- عزززة بعيني ان شاء الله
اخذوها للمستشفى شمنتظرين بسررعة ليصيرلها شي

- وجهالي منو الهم
تعالي انتِ يمهم حبابة لأن لميا مسافرة واسيل تدرين متزوجة بالموصل صعب تجي هسه

- رجلچ وين لعد
- هذا حاير بين امي وابوية ميدري شيسوي

- عليا ما اگدر
شلون اطلع وحدي بـ هالليل انتو جيبوهم الية

- نتأخر يمعودة هيچ امي تمووووت
- هذا رقم منو ؟!!
- رجلي
- انتظري شوية وارجع اتصل بيچ

سديت الخط منها اتصلت بصخر
أول مكالمة ما جاوب
بالثانية على نهايتها رد بنبرة خوف ها بوية خير شني الصاير وياچ

- رجل خالتي مات
- لاااااا انا لله وانا اليه راجعون
- صخر خالتي واگعة ويردون اروحلهم علمود الجهال

- وين وين ما تطلعين الوحيدچ
- لعد شلون
- ياهو الدگ اعليچ وبلغچ بالخبر
- بت خالتي وماكو احد يمها بس رجلها والجهال
- خلها تدزلچ رقمة
- عندي هذا اتصلت بية منه

- چا يلا بوية دزي بالعجل
- شراح تسوي
- آنه اتصرف لا يظل بالچ بس دزي
- اي هسه

حچيتها وسديت الخط جسمي كلة يرجف
رسلت الة الرقم
فوگ الربع ساعة يلا رجع اتصل علية گبل جاوبتة

- ها شسويت ترى گلبي راح يوگف
- شوي بعد ويجيچ زلمة يجيب الفروخ ليچ
- منو هذا ؟!!
- صاحبي ما تعرفينة استلميهم من الباب وفضيني

- وخالتي عفية شبيها
- ان شاء الله ما بيها شي بس لا تظلچ تنوحين هيچ

ظل وياية طمني شوية وراح
بقيت الوب
رايحة جاية افتر بالصالة من القهر حسيت نفسي راح اجيب بمكاني

نص ساعة واندگ الجرس
ركضت بسرعة حطيت الحجاب على راسي
باوعت من العين السحرية ولد شاب والجهال بـ ايدة بهالأثناء دگ صخر علية