#وضاقت_الأرض_بي
للكاتبة #لبنى_الموسوي
ملاحظة/ ان شاء الله بس باچر وراها نرجع للنظام القديم (يومين نشر بيوم استراحة)
متابعة شيقة ❤🥀
فجأة صارت هوسة برة
ما نسمع إلا صهيب يصيح ولك ماااااااات
ركضنا نباوع من الشباك نريد نعرف منو وشنو ماكو بس الزلم تتطافر گدامنة
شوية واجة حنظل شايل ولد بـ ايدة
ممبين منو لأن الدم تارس جسمة من فوگ ليجوة
فتح صهيب باب السيارة وصعدوا
صاح حنظل چا وين ابو
رد علي صخر هذا وينة واگف جارك
درت وجهي وچان انصدم بـ إلياس
هنا الدنيا انخبصت خو أمة گعدت بالگاع تملخ بشعرها وتنوح علي
سمعت واحد صاح بيهم
- چم مرة گلتلكم الجهال عينكم عليهم لا يگمزون مثل القرودة گدام السيارات
باوعت علي هذا جمار
ركض اخذ السويچ من صهيب وساق السيارة هو
بقينة بالبيت بس حالتنة حالة
كلها بكوم وأمل بكوم ثاني
إلا شوية ويوگف گلبها على گد ما بچت وصيحت بحرگة
الجهال صاروا يتصارخون بخوف
حضنت ود احاول اهدي بيها كلما تشوفهم يبچون تبچي على بچيهم
ما اگدر اخذها واصعد
لازم ابقى وياهم خصوصاً واني اشوف الكل موجودين حتى اقاربهم اجو من سمعوا بالحادث
گاعدة وحاضنة ود على صدري
باوعت للحجية مدري شصارلها رجعت راسها ع التخم ولزمت گلبها بـ ايدها
گمت ع السريع
انطيت ود الريحان وركضت عليها اضرب بخدها حيل
- يمة تسمعيني يييمة
ريحان.. يا شمالها امي دخيلك رببببي
ثناء.. ماي ماي بسرعة نشمر على وجها
عفتهم وركضت للمطبخ
ترست الگلاص ورجعت لگيت عمة سكينة تهفيلها بشيلتها دخلت بنصهم رشت عليها بـ ايدي
گبل فتحت عيونها
النسوان گامن يجرن صلوات بكل صوتهن
باوعت علينة وصاحت الفرخ ولكم الفرخ خوبن ما مااااات
ريحان.. لا يمة اسم الله اعلي
كل شي ما بي ان شاء الله بس گولي يا الله
الحجية هيلة.. يا الله
يا ربي دخيلك لا تفجع وليدي بوليدة امشي اعليك نبيك واهل بيتة
سكينة.. امين خية امييين
فاتن.. يمة نهلة
جيبي گلاص ماي وغسلي المرت ابن عمچ مو راح تموت
نهلة.. صار يمة
راحت نهلة جابت مي من المطبخ ورجعت
رؤى وريحان يم أمل يحاولون يهدون بيها بس هي شبه الفاقدة وكأنوا ابنها مات وخلص
اباوع عليها ودموعي تجري
حقها ماكو أم تتحمل تشوف ابنها بهذا المنظر ومتنهار من الصدمة
أنت تقرأ
وضاقت الأرض بي
Adventureعندما تجتمع مجموعة من الوحوش الجائعة على فتاة صعبة المنال تكون النتيجة كارثة بشرية إغتصاب جماعي وعادات متخلفة وظلم لا متناهي وأًناس لا ترحم إن كانت السماء تنصف فـ كيف السبيل الى الخلاص على هذه الأرض ؟!!
