وضاقت الأرض بي

البارت التاسع والعشرون

#وضاقت_الأرض_بي

للكاتبة #لبنى_الموسوي

تقربت منة بخوف
شيريد مني شكلة ضاملي مصيبة وراح يطلع الونسة التونستها بعرس ريحان من خشمي

چان اكو قرص ع الميز
طلعة من غلافة وحطة باللابتوب
گام من الكرسي سحبني من ايدي گعدني بمكانة وشغل القرص

شگد رسم عقلي شغلات ممكن اشوفها بي
بس ابد ما تصورت ولا حتى خطر على بالي الشي الچبير الي شفتة ساعتها بداخل هالقرص الصغير

چان الدكتور مؤيد گاعد بغرفة التحقيق
يحققون ويا بشغلات تخص شغلة وثانية بعيدة عنة
منها الادوية الممنوعة والتواجد بالأماكن المشبوهة بس هو كل كلمة والثانية ينكرها

بعدين مصورين محاكمته
انحكم سبع سنوات وبغرامة مالية مع العزل من الوظيفة العامة بعد ما اعترف على نفسة اعتراف واضح وصريح بوجود الادلة القاطعة

اباوع ع الدكتور
شلون واگف بقفص الأتهام مذلول ودموعي تجري
هذا چان أول حق يرجعي وراح ابقى انتظر عدالة رب العالمين تتحقق بكل شخص ظلمني قريب چان او بعيد

رفعت راسي على إسحاق
واگف وراية ومبتسم بـ ابتسامة خفيفة
گمت من مكاني امسح بدموعي وحضنتة هالمرة بكامل ارادتي بدون خجل ولا خوف

رفع ايدة يمسح على ظهري
وراها نزعني العباية والحجاب ورجع حضني وهو يگول هيچ الحضن يصير احلى بوية

- احچيلي الله عليك شلون وگعتة هيچ

- آنه شلي غرض
هو فرد واحد وسخ وزايعتة الدنيا
كل الموضوع آنه گدرت اوصل القذارتة عن طريق معارفي

واكيدن لمن كضو بالجرم المشهود
ما گدر ينكر بعد وهل صار الي تنوعتي بعينچ گبل شوي

- يعني طلع هذا شغلة واني عبالي هو...

- بسچ لا تكملين

- زين بس گولي مرتة عرفت لو لا

- اي وحتى هي الاخرى خسرها مثلها مثل غيرها

- خطية والله متستاهل چانت كلش حبابة

- عليش الخطاية
شلها بذكر ما عندة ذرة رجولة وكل يوم ويا وحدة لون

هاي وانتِ چنتي شاهدة اعلة عمايلة
حتى دارها همينة ما سلم من قذارتة ونزاوتة
هيچ احسن الها خلها تشوف حياتها بعيد عن واحد ما تأمن ترمش گدامة خاطر لا يغدرها

- اي صح
يلا اروح اغير ملابسي

بس حچيتها باوعلي من فوگ ليجوة
چنت لابسة عادي بنطرون وبدي ربع ردان علمود الزفة مدري ليش خفت من نظراتة

گبل ركضت للكنتور
طلعت تراك ورحت بدلت بالحمام ما بية اسبح من التعب عود ع الصبح

توني اريد اطلع سمعت جهازة يدگ
بقيت واگفة بمكاني سمعتة گال ها خوية خالد جريت نفس براحة وطلعت من الحمام