وضاقت الأرض بي

البارت الثامن والأربعون

#وضاقت_الأرض_بي

للكاتبة #لبنى_الموسوي

اخذهم وطلع گبل الشيخ باوعلي وگال
من الأخير بنيتي
احچي انتِ تردين تتطلگين من زلمتچ خاطر من عين باچر اطلگنچ منة وكلمن يمشي بدربة

صفنت بوجهه مصدومة
هذا الما چنت اتوقعة لأن ادري بالشيخ من يقرر قرار يسوي حتى لو الكل چان معارض قراره

فزيت على صوتة
- ها بوية عليش صافنة ما تسمعيني حسچ

- لا عمو
صح بالبداية ردت اتطلگ بس هسه اختلف الوضع

يعني أربعة برگبتي
شنو فائدة الطلاگ قابل اتزوج واعوفهم !!!
اكيد لا وألف لا مستحيل اسويها
اني انحرمت من اهلي فـ ما أگدر احرمهم من ابوهم ولا احرمة منهم

- يعني بهاي تصرفاتچ جاي تگوليلة
يا تطلگ أمل
يا ما تصير لية زلمة حتى وأن ظليتني اعلة ذمتك

- لا ما اريد يطلگها
مو علمودها طبعاً بس علمود اطفالها اني هم أم والما ارضى على نفسي ما ارضى على غيري

ريحان گالت أمل هواي عانت بطفولتها من جدها
واذا تطلگت يصير واحد من الأثنين
يأما تنحرم من اطفالها للأبد وهالشي حرام
يأما تاخذهم وياها ويرجعون يعيشون نفس معاناة أمهم واكيد هنا لا انت تقبلها ولا اني

يجوز المقابل يشوفني مثالية
بس اني أنسانية عمو قبل لا اكون مثالية
لا الومك ولا الوم صخر
الظروف جبرتكم وجبرتني على هذا القرار ولو ما اني رحت ضحيتة چان غيري راحت

اني قبل لا اتزوج صخر اعرف انتم عرب
واعرف عدكم عادات
تروح اجيال وتجي اجيال ومتندثر مو بس العرب لا بالمجتمع الشرقي بشكل عام

وافقت وصار الي صار
وأمل تجاوزت حدودها وتمادت
وبعملتها هاي خلتني اعيد كل حساباتي وارجع للتفكير من نقطة الصفر

ممستعدة اظل عايشة بخوف
سنة سنتين عشرة عشرين إلا ما يجي يوم وتصير مرة الصخر مثل ما اني صرت بالضبط

أمل تريد تعيش عمي
لا عبالك تظل على ذكرى إلياس الله يرحمة
ترى الموضوع ما اخذ منها غير بس خمس أشهر نست بي الماضي وعينها صارت على صخر

بـ هالحالة شلون ؟!!!
نجي نخيرها يا أطفالچ يا حياتچ
مترهم نسويها
هي نفسها ضعيفة ومتتحمل بدون رجال فـ بالعافية عليها صخر شوكت ما صارت

اما اني فـ حياتي الأطفالي وبس
ما عندي غيرهم
ولا اريد غيرهم ذولة تعويض من ربي عن اهلي واكثر من هالشي ما اتمنى صدگني

لذلك ما اريد احرمهم من أبوهم
ولا احرمة من حياتة
خلي يتزوج أمل أو غيرها هو حر براحتة
بس المهم ما يقصر بحق اطفالة ولا يحرمهم من حبة وأهتمامة

- والحل ؟!!
شلون ما تحرمينهم منة وانتِ بمچان وهو بمچان

- عادي مو ديجي يشوفهم كل اسبوع
- وهذا وضع برايچ ؟!!
- صح هو متبهذل بس شسوي استقريت هناك بعد