وضاقت الأرض بي

البارت السادس والأربعون

#وضاقت_الأرض_بي

للكاتبة #لبنى_الموسوي

ملاحظة/ بارت مفاجئ لعيونكم حتى تحچون علية زين خصوصاً جماعة الفيس ممقصرين والله....

- چانت تصرخ من البچي بس حطيتها بحلگها سكتت
باوعت علي مستغربة
إسحاق وين رايحين دفهمني شبيك !!!
رد وعيونة على الطريق
اليغلط غلطة لزوم يتحاسب اعليها وحان اليوم موعد الحساب ي ام رقية

- شنو يعني مفهمت ؟!!
- شوي بعد وتفهمين انطري عليش مستعجلة

درت وجهي ع الطريق خايفة كلش
شنو يقصد بكلامة !!
هو مو گال لأن اني هم غلطت فـ مراح احاسبچ على غلطتچ لعد هذا كلامة شلون افسرة

معقولة چان يضحك علية
بس لا تقصد يستدرجني لحد ما اطمأنيت الة وهسه اجة حتى يحاسبني وبعيد عن الكل

لا لا مستحيل
إسحاق اكبر من هيچ شي
ميغدر اي اي ميغدر قابل اني غشيمة عنة
عاشرتة سنين اعرفة شنو من شي مستحيل يستخدم هالأساليب لا وياية ولا ويا غيري

التفتت باوعت علي خلي اختبرة
- إسحاق
- نعم
- شسويت بالفترة الأني غبت بيها وصلت الشي يعني

ما سويت شي
خلصتها جالس وانطر ردتچ
لا استغفر الله رب العالمين نسيت واسمع هاي همينة

حچاها وطلع جهازة من جيبة
ربطة وظل يگلب بي
معقولة گاعد يستهزأ بية سالفتة مو طبيعية اووووف يربي هالأنسان راح يخبلني لا اصلاً خبلني وراح

فجأة شغل أغنية
أول مرة اسمعها ومبينة قديمة كلش لان هو ميسمع إلا القديم ونادراً ما يسمع أغاني

ارجعيلي
أنا من غيرك صدى لخيال أنسان مضى
وانتِ شمس بتلمعي مستحيل يوم ترجعي
كنتِ طيري كنتِ طيري وأنا هديتك للفضى
ارجعيلي

كلمات الأغنية اثرت بية بشكل
فعلاً مثلت حالتي
چنتلك طير إسحاق وراضية بالقفص الحكمت علية انحبس بي كل العمر بس انت شسويت ؟!!

فتحت الباب وگتلي روحي
وما اتصور اكو طير يجرب الحرية ويرجع مرة ثانية للقفص حتى لو هالقفص چان من ذهب

مسحت دموعي الخانتني ونزلت
قوي نفسچ
مو مهم اذا صدگ بيچ مظلومة او لا
المهم انتِ تعرفين بروحچ اشرف من الشرف نفسه متحتاجين شهادة من أي بشر

الطريق طويل وهو ساكت
رقاوي تبهذلت تنام شوية وتگعد تبچي
خطية من اجت للدنيا وهي من محافظة المحافظة مثل أمها بالضبط

باوعت الإسحاق شوكت نوصل تعبت والله
- هساع ما ظل شي
- يعني مراح تگول وين ماخذني ؟!!
- شوي وتتنوعين بعيونچ والعين افضل من السمع

درت وجهي ضايجة
هالرجال عبارة عن الغاز وغموووض
تعبت واني احاول احصل منة جواب يشفي الگلب بس ماكو نتيجة فالح بس يحاسبني